YOEL 2 - Nanduk Ngget Tul Pidnak Wene

Nagawan Indo-nen idnak tarem wok ma-o luk yeberak pidnak wene 2:1-11

¹ ”Lak tak nunpurak wok yamu-o” luk yenggerak puwakluk, Mbal Pem Nagawan woraso sa Sion ndobo marak iri na bem-nen terompet ene pu yer-o. Ene pu yogolat kwarer-o. Nagawan Indo-nen idnak tarem-e panggo yosolat, ndag-et nak wok ma me, Yewura woragwi nap wa-e. Kwiye-nen ye le mber-o.

² Iri tarem-e mondok muruk tak, ndamuk mom ki irit ma-o. Nde, sil-e mondok kwarat ndobo bem nggan nggan langgurak ereba nggal-et lobok yuwa-o. Nde, sil ereba nggal-e nanduk woragolar-e, iri nggal-e mondok kagwi bug-o. Iri-nen abok na iri nggal-e mondok kwat ma bug-o.

³ Kanduk-nen nuruk lak tak poso nggal yagidnak mende oboksa sil-nen nuruk lak tak puwa-o. Nde, ninggit lak ma-ge o iri me-ge Nagawan Indo-nen idnak Eren nggal-et woraso-t nde, abok nujwama-ge, nggweyak umbuk nembaga nggal kwat yusu-o. Yi mende ndi mende misiger-o luk keya buwama wolma bug-o.

⁴ Nde, sil ereba abage-ge kura wam abage nggal. Nde, pong kasolar-e, kura wam wim pem-nen pong kaso nggal-o.

⁵ Sil ereba na mbisingsa mborosolar-e, ndobo nggwe-t nde, ya kud mbok mborosolat, ijok ene mbirib-e wim koma ene mbirip nggal. Nde, enemu-ge terak kani pagosolat enemu nggal. San ombo kere kwarat obo nesa keya buruk, mabunuruk wim pil ngguwokluk nggal irit lid lud tak puruk worali-o.

⁶ Nde, it-nen nde enpem mbud yogola-ge, ap oboksa-nen kwiye-nen lele yogolat, entare min nden kil lobok yuwa-o.

⁷ It iri-ge wim wari nggal enpem mbud yogolat, wam ombo enmawi worak-nen yugwi nggal kerep pak leget anggul pem lasolat kwatli-o. It iri-ge mondok obo nesa mot nirik mborok tak nggwe mbirigit lak irit mbitli-o.

⁸ It iri-ge anggam-nen anggam pelek pelek mbirigit lak, konak nirig-et mbitli-o. It-nen-e pak pidnak ereba na-ge ndamerak pili-o. Nde, it-nen mabunuruk mbitli ereba na-ge ap-nen-e ndong tak purag-e meya-o.

⁹ Nde, it-nen o silmu-t enpem mbud yil nggogolar-e, pak leget abandok nggogolat, it-nen o ma nggogolar-e, yariya wanugwi nap-nen kwarugwi nggal papalo tumende nggwe-t nggwili-o.

¹⁰ Nde, enpem mbud yuwokluk it mborogola-ge, nggweyak min lele yosolat, mbal min tugup yosolat, iri kwarosolar-e, waneya min mo min-e mondok lumu yosolat, wonaru yaya min-et lak yusu-o.

¹¹ Nde, Nagawan Indo-nen-e at-nen idnak san ombo ereba na ene o nggu nggal pem-nen ”Yu nggal kwarurak, iri nggal kwarurak” yak undusu-o. At-nen yidnak yidnak kwatli esan ombo-ge enpe na kwarat, mondok enmawi worak irir-o. Nde, Nagawan Indo-nen idnak tarem iri-ge ndemeret mondok ija kwiye worak-nen yusu-o! Ap misiger-o luk mbi mondok mamak puwa bug-o.

”Kit-nen woragwi kenpage tuguruk konuruk wolmer-o” luk yak indidnak wene 2:12-17

¹² Nagawan Indo-nen yosolar-e: ”Alat nde, yawo-ge kinndi puru min-et nunggwi mende keya buruk, tepan nak yogolat, yip-nen ndemeret kinndi-net an neram tuguruk lobok yer-o.

¹³ Kunsum ndela keya bili iri na-ge ndag-e lag-o. Are, niri nera-o luk yip min-et kinndi puru yurag-o” luk yij-o. Nden karuk Nagawan Indo Kenmbal Pem Nagawan eram lobok yer-o. At iri-ge mamak puruk worasolat, enabuwa kasolat, ndag-et nak isilepma yoso buk, indi konak unpud kaso-nen yusu-o. Ap meya yidnak emberam tak poso indingen, ndag-et nak enpem wene mbarurak isili-nen yusu-o.

¹⁴ Erep-nen-e Nagawan Indo Kenmbal Pem Nagawan-e indi nden karuk, imbiringgat kwarat wok kunduwa nde ma-o. Iri kwarosola-ge, kit-nen-e nggandum mbato min anggut min-e Nagawan Indo Kenmbal Pem Nagawan amanggim pugub-o.

¹⁵ Mbal Pem Nagawan Ondobo Sion iri na bem-nen ene pu yer-o. Mburu ninggit lak, tepan nak yogolat wolmomtak wene wirik per-o. Ap oboksa-nen mondok nggok irit ndok wuruwakluk yak ender-o.

¹⁶ Ap oboksa ndok worak enper-o. Ap oboksa marak wolmomtak wene yak ondogolat, ap indi worak min li marik min li nggisiya min-et oboksa lobok yer-o yogolat, nggeret kwe ap wok kerak mbidnag-et nde, it-nen-e it nene yugwi ondoro mondok keya buruk, lobok yuwag-o.

¹⁷ Nde, tepan ombo Nagawan Indo ama iri na me yabu wanugwi nab-e Nagawan Indo amanggim kan pugwi iri na wok, iri-nen o panggo tumende bem iri na wok, enggendumu iri na me-nen yip togolat-nen tepan yogolar-e: ”Nagawan Indo wa-e. Kat kilirag-e enabuwa ki-o. Kat kilirag-e kat-nen keya unpugunmu, kopkap tobok yogola, ap enlem erep-nen eneyaruk yogolar-e: ’It Enmbal Pem Nagawan-e ngge me worasu-o?’ luk yuwa naru, keya unpurak pug-o” luk yuwakluk yak ender-o.

Mbal Pem Nagawan-nen nggweyak tuguruk amburu rak pidnak wene 2:18-27

¹⁸ Iri yogola-ge, Nagawan Indo-nen-e o nggweyak iri yeber-et kasolat, at ilirag-e enabuwa-t yij-o.

¹⁹ Iri luk, at-nen wene onggo it yak ondosolar-e: ”Yawo-ge nggandum mbato min anggut amburu min saitun amburu min irit kit-nen nonggolat kinmbit worabok-nen wok kindimin-o. An-nen-e kir-e ap enlem erep-nen pesel konpogolat, nda kondogolat wolmakluk keya kinpimin pug-o.

²⁰ Sil kwarat abare abam (utara) nggwe-nen lobok yidnak ereba na-ge langgara wirik pimin-o. Nde, ereb-e nembaga karu me nggwe wirik pimin-o. Nde, kere nanduk mboroso ereba na-ge Wat Yoso Yi Koma ambigit nggwe pil mbirimin-o. Nde, kere abok mboroso ereba na-ge Yi Koma Nggok ambigit nggwe pil mbirimin-o. Iri rak unpumu, orogwak ereba na-ge enmben to yuwa-o. Ereba-ge kit andi bandi rak kinpidnak me, mondok lak tak inpimin-o.

²¹ Nggweyak wa-e. Kwiye yurak pug-o. Nagawan Indo-nen kat kamanggim kwiye worak kwarid iri kindi yebet karug-e, kindi-ge alen pem-et wolmin-o.

²² Lok lok noso mende wa-e. Yawo-ge tusundumu tusuangge-ge miri rak pusu me, kunmud kudtak pug-o. E na engen-e kwarat utlud pusu-o. Nde, anggut engen min e ara engen min-e kwarat emben to yusu-o.

²³ Sion woragwi nap wa-e. Nagawan Indo Kenmbal Pem Nagawan nak-nen konak nak kwat kunpusu pem-e kenalin kenalen yogolat, kijik kijak worogolat kenne lek ker-o! Iri kwat konposolar-e, engga lera mboso tarem-e talme kwarat wok kondoso-o. Nde, toro wok yoso tarem-e talme nggilara mberak pil mbuwaso-o. O sumbat woraruk, engga ambarok posolat tarem na, talme nanduk mboso ereba na nggal-et pil mboso-o.

²⁴ Nde, nggandum engen mbilarugwi sa ereba na me-ge nggandum-nen kobong ma-o. Nde, anggut engen min saitun engen min amburu mbulugwi sa-ge amburu-nen kobong kobong mburuwa-o.

²⁵ Olengen ereba arem woragolat kit-nen yagidnak mende sil-nen ninggid ereba na-ge an-nen uwi yagimin-o. Nde, uwi yagimin iri-ge an-net sil kere ereba-ge pil lobok yigirik me, uwi yagimin-o.

²⁶ Kir-e nunggwi mende-ge ndak irit nonggolat kinmbit ma-o. Nagawan Indo-nen-e kir-e kwiye worak kwarat kwat kunpusu me, kir-e Nagawan Indo Kenmbal Pem Nagawan kek tak pugub-o. An nilirag-e pesel kunpugwi enne are kwat yugup pug-o!

²⁷ Kit-nen yebet kagolar-e: ’Nagawan Indo-ge nit Isarael nap nennggendumu-t worasu-o’ luk kenaru yogolat, ’Nagawan Indo iri-ge nit Nenmbal Pem Nagawan-net yusu-o’ luk yebet kagolat woragub-o. Mbal Pem Nagawan nin mbi worasu-ge mondok lag-o. An narig-et nak worasu-o. An nilirag-e tuguruk innggiri rak puwa bug-o!” luk yij-o.

Nagawan Indo-nen idnak tarem 2:28-32

²⁸ ”Iri kwatluk ombol nggwe-ge ap oboksa enpem nindi-ge nggilara mberak pil mbuwamin-o. Iri yosola, kin kinliap min kinligwami min-e an-nen enpem pidnak wene ap yak ondogolat, kit kennggendumu ap indi worak-nen-e nabi kagolat, sujwe-nen-e nabi nggal pem yik kagolat ma-o.

²⁹ Nde, iri tarem-e an nindi-ge ndegel unpugwi kweyap min ap min enpem nggilara mberak pil mbuwamin-o.

³⁰ Mbal pem-nen na irit, nggweyakma-nen na irit, an-nen kwiye worak mende kwarat kwarimin-o. Iri yosolar-e, eneyabi liring yosolat, kan mare mborosolat, kule kwarat yosolat ma-o.

³¹ Molengen mom ki yosolat, waneya-ge mep worok yosolat kwaruwa-o. Nde, ereba kwat ma iri-ge Nagawan Indo-nen idnak tarem mondok kwiye worak kwiye-nen enaboro min linggi yurak iri na awo wok yigit lak ma nandug-et kwat ma-o.

³² Alat nde, ta-nen nde ’Yongga niri-o’ luk Nagawan Indo emengen mbaruwa nab-e inmiri-t yuwa-o. Ndobo Sion min Yerusalem min iri me-ge inmiri yurak elem-e wolma-o. Nagawan Indo-nen yid iri na ndak ndag-et Nagawan Indo-nen wene mbo unpuwa nab-e inmiri yuwa-o” luk yij-o.