YOEL 1 - Nanduk Ngget Tul Pidnak Wene

Yoel

¹ Nagawan Indo-nen Petuel ambara Yoel ebem pidnak wene-ge yu-o.

It-nen yaidnak mende sil-nen nasola, Isarael nap inndi abi kalok yidnak wene 1:2-20

² Kit ap inndi worak-nen-e kwara koler-o. Yewura iri me woragwi nab-e kwara lombot per-o. Kit woragolat tarem-nen na irit, nanduk konmborak woragolat tarem-nen na irit, yu nggal-e kwar-et yoso-a?

³ Iri kwat yusu wene-ge kit-nen-e kit kinlirak yak undurag-o. Iri yugupmu, it-nen na iri wene-ge it inlirak yak ondogola, iri nggal-et kwasa it-nen na ap pem lud yak ondogolat wolmag-o.

⁴ Sil oro kwarat wonarurak puk ereba na yagidnak sa yapmu ereba na yak pak lobok yosolar-e, ebe pidnak oboksa leraben nuruk, lak tak pij-o. Nde, sil oro erep-nen nasolat, erep keya bidnak ereba na-ge sil oro erep-nen nuruk, lak tak pij-o.

⁵ Indi nden kaso yi nak nok tenak woragwi nap wa-e. Men mer-o! Anggut engen amburu ndonggosa nunggwi nap wa-e. Yip ter-o! Yip tugup iri-ge anggut engen amburu ngget mbilik kenemndam-nen mengga wanidnak iri bem yip tugub-o.

⁶ Sil oro kwarat lobok yosolat, nit nunuwi nggweyak pem mbud yusu-o. Sil ereba-ge amawi worak, wonarurak puk-nen yusu-o. Nde, eyak anggar-e singa ija eyak yengge eyak anggat nggal-o.

⁷ Nde, sil ereba-nen-e nit-nen idnak anggut ari ereba na lak tak posolat, e ara elem ereba na lak tak posolat, undugwal nak keya bij-o. E ebe min inggi angga min ngen waga nuruk, loro mberengsa keya bij-o.

⁸ Kir-e kweyap ndugum-nen it enabi pugwi inndi kundik iri na wat yosoma, inndi abi kalok yogolat yip tugwi nggal yip ter-o.

⁹ Nggandum mbato min anggut min Nagawan Indo ama pugwi ereba na-ge pusa lak yamu me, tepan ombo pempa tugup lak Nagawan Indo ama yabu wanugwi ereba na-ge yip nggu lek tenak worali-o.

¹⁰ Nggandum oboksa lak tak posolat, anggut engen na amburu lak yosolat, saitun amburu min lak yosolat kwaridnak me, yawo keneyabu yeba-ge meya yosola, nggweyak iri bem worali nab-e yip tili-o.

¹¹ Yabu wanugwi nap wa-e. Yip nggu lek ker-o! Nggandum mbato min jelai mbato min mbarurak mende oboksa min lak tak pidnak me, anggut yabu wanugwi nap wa-e. Yip ter-o!

¹² Anggut ari min apel ari min e ara ari min kuruma ari min ndelima ari min yapmu woraso ereba na oboksa-nen umbuk le yij-o. Ap oboksa enalen elem lak yij-o.

¹³ Kit tepan ombo Mbal Pem Nagawan amanggim wam wosa kan pugwi sa iri na me yabu wanugwi nap wa-e. Karung sum yutluk, yip ter-o. Mbal Pem Nagawan amanggim purak nggandum mbato min anggut engen min-e lak yidnak me, kir-e Mbal Pem Nagawan ama nggugupndik, yip tenak nak worakmu, o nda mag-o!

¹⁴ ”Nunggwi mende ninggit lak, tepan nak yogolat wolmer-o” luk, kenlem nap yak ondogolat, nggok ndok wururak wene naru karu rak per-o! Enne kulugwi nap min Yewura woragwi nap oboksa min-e Nagawan Indo Kenmbal Pem Nagawan ama ngguruk, at eram wene mbo bil lujwakluk, yonggo enper-o!

¹⁵ Mondok Amawi Worak iri na-nen yigisa lak tak unpurak tarem, kwiye-nen enaboro min wat yurak tarem, Nagawan Indo-nen idnak tarem iri na-ge panggo yij-o.

¹⁶ Nit nenlengen pem-et nit Nenmbal Pem Nagawan iri na ama-nen nunggwi mende-ge mondok meya yij-o. Iri ala, nenalen-nen kek kok lel kagit lag-o.

¹⁷ Uwi-ge nggweyak umbuk pem me, mondok umbuk yusu-o. Iri yosolat, ndok worak purak nggandum-e lak yij-o. Nde, nggandum ndok wosa pugwi o ereba na-ge arem-e nggandum purak mondok lak, keya bosoma, tudsa labuk yusu-o.

¹⁸ Nde, sapi ereba na-ge at norak tusuangge lak me, no norak nggal yosolat ini ene mbusu-o. Lomba wam oro ereba na-ge meya yi li mbusu-o.

¹⁹ Tusuangge worak sa ereba na-ge mondok umbuk ye le mbosolat, e oboksa kan-nen ninggidnak nggal umbuk yidnak me, Nagawan Indo wa-e. Yongga noronokluk nggi yak kurusu-o.

²⁰ Yi oboksa eberek yidnak me, ir-e yi nere-nen ndowaga towe mena erambet walma woraso-nen na yongga undurak kar-et kemengen mbatli-o.