YOANES 20 - Nanduk Ngget Tul Pidnak Wene

Yesus uruk agaid wene 20:1-10

¹ Hari Minggu bem kuplila kubu kabusa-ge Maria Magaralena na-ge at yapma bidnak sa mbiridnggal-e, tumende nggelak pidnak kerep na lembera wabidnak nde kagaij-o.

² Karug-e kwe na puburak mborosolar-e, Simon Peterus min Yesus imin noso nap indi kundik na min endam mberarik, it yak ondosolar-e: ”Nagawan Indo orogwak na-ge yapma pidnak sa-nen waruk mbirigarik, ngge me piga-o? Nir-e nenaru bug-o!” luk yak indij-o.

³ Yak ondosoloma-ge, Peterus min Yesus imin noso nap misik iri na min mbirigarik, kerep ndome na mbiriga-o.

⁴ Mborogolar-e, it enmberek na puburak mbiriga-t nde, at misik na-ge Peterus na abok tak puruk, ar-e nandug-et Yesus yapma pidnak sa wok yij-o.

⁵ Wok yosolar-e, ar-e tebe luk, nggwal kagaidnggal-e, sum loro na yunggurik worala kagaij-et nde, at ebe-ge nggwigit lag-o.

⁶ Nggwigit lak worasoma-ge, Simon Peterus imbirik lobok yosolar-e, wor-et yapma pidnak sa na nggwidnggal-e, sum loro na yunggurik min

⁷ Yesus anggulwak perenak pidnak sum na min iri me worasoma, kagaij-o. Nde, at anggulwak perena kamaridnak sum na-ge sum loro na eralu-ge lak, are, iri na arig-et mboksa yunggwirik worasoma kagaij-o.

⁸ Iri ala-ge, at nandug-et wok yid iri na ndome na nggwarik, erengen-nen karuk, ndemeret kagi luk peragaij-o.

⁹ (Nde, Mbal Pem Nagawan engga bem-nen yosolar-e: ”Wat yidnak nap ennggendumu-nen mondok urug-et ma-o” yidnak na-ge iri tarem-e it-nen awo yenggerak pigit lag-et woraiga-o.)

¹⁰ Iri rak purug-e, Yesus owosirak mberen na mbiriga-o.

Yesus o Magaralena kwe Maria imbiri bem nam yid wene 20:11-18

¹¹ Enma mborogola-ge, Maria na-ge yip tosolar-e, kerep ndome na eralu mendak woragaij-o. Nde, yip tosolar-e, tebe luk, yapma pidnak sa nggwal kagaidnggal-e,

¹² sum loro yirik aid nap mberen-e Yesus orogwak woraidnak sa koreyak woragolar-e, misig-e at anggulwak woraidnak sa koreyak, misig-e at ijok woraidnak sa koreyak woragola, eneyagaij-o.

¹³ Eneyasoloma-ge, aid nap na-nen kwe na kin wok obogolar-e: ”Kwe yu-ge wa-e. Kar-e noluk-nen yip tusu-o?” luk yogolikma-ge, kwe na-nen it yak ondosolar-e: ”An Nagawan Indo waga ngge me piga-o? Piga sa an-e kabak alat-nen yip tusu-o!” luk yak indij-o.

¹⁴ Yak unduruk, kwe na nden kaga yik kagaidnggal-e, Yesus iri me mendak worala kagaij-et nde, ar-e Yesus-net yusu-o luk yenggerak pigit lag-o.

¹⁵ Alama-ge, Yesus-nen kwe na kin wok obosolar-e: ”Kwe yu-ge wa-e. Kar-e noluk-nen yip tusu-o? Ta ogore yusu-o?” luk yak tij-o. Yak tosoloma-ge, yu-ge engen uwi towarak woraso nap-nen yusu-o eberasoluk, kwe na-nen at yak tosolar-e: ”Nab-o. Kat-nen nde waga nin me pidnak ala-ge, waneyek-nen pigen sa iri yak niri-o” luk yak tij-o.

¹⁶ Yak tosoloma-ge, Yesus-nen kwe na yak tosolar-e: ”Maria-o” luk yak tosoloma-ge, kwe na-ge at ambigit nggwe nden karuk, Iberani wene bem-nen at yak tosolar-e: ”Arabuni” yij-o. (Iri-ge Mul Nondoso Nab-o yosolat-nen yij-o.)

¹⁷ Yosoloma-ge, Yesus-nen kwe na yak tosolar-e: ”An Neid eram awo lagit lak me, an tena nubusu meyog-o. Are, an nowosirak endam mburugundik, an-nen yidnak wene yu yak ondosolar-e: ’An min kit min Nineid Mbal Pem Nagawan na eram-et lasu-o’ yij-o luk yak undugun-o” luk yak tij-o.

¹⁸ Yak tosoloma-ge, Magaralena kwe Maria na-nen mberarig-e, Yesus owosirak na yak ondosolar-e: ”Nagawan Indo-ge kagi-o. Nde, wene yu yak nirij-o” luk ndegera yak indij-o.

Yesus owosirak inmbiri bem nam yid wene 20:19-23

¹⁹ Hari Minggu iri na bem-et kubu nggwe-ge Yawuri nap enaye-nen Yesus owosirak na-ge tumende pidsa imig worak puruk, ndok worak woraiga-o. Worakmu-ge, Yesus na lobok yarik, mimo it ennggendumu mendak worasolat-nen yak ondosolar-e: ”Nowosirag-o. Kinndi-ge yek tag-et wolmer-o” luk yij-o.

²⁰ Yurug-e, at inggi min araptap min na nuk eneyasola-ge, Nagawan Indo na karuk, Yesus owosirag-e enalin enalen yiga-o.

²¹ Yogolikma-ge, Yesus-nen tuguruk it yak ondosolar-e: ”Nowosirag-o. Kinndi yek tag-et wolmer-o. Neid-nen an wirik nibil lobok yid nggal-et, an-nen na kit wirik kunpusu-o” luk yij-o.

²² Iri yurug-e, emende pu it enpem posolat-nen yosolar-e: ”Konak Indi waner-o.

²³ Kit-nen-e ap-nen meya yidnak na kenmberam tak pogola-ge, Mbal Pem Nagawan-nen na amberam tak puwa-o. Nde, kit-nen-e ap-nen meya yidnak na kenmberam tak pigit lak ala-ge, Mbal Pem Nagawan-nen na amberam tak pigit lag-et ma-o” luk yij-o.

Yesus Tomas imbiri bem nam yid wene 20:24-29

²⁴ Nde, Yesus imin noso nap misik unu-ge Tomas na unu misig-e Kambara Nderak na abalma-ge Yesus-e it endam lobok yij-o.

²⁵ Alama-ge, Yesus owosirak erep-nen at Tomas yak togolar-e: ”Nir-e Nagawan Indo na kaige-o!” luk yak togolikma-ge, Tomas na-nen it yak ondosolar-e: ”An-e inggi luruk wiridnak aroro na karuk, luruk wiridnak sa an ninggi mon kagit lak, araptap nggwe na an ninggi mon kagit lak-nen-e ndemerer-o luk peramin pug-o” luk yij-o.

²⁶ Yosoloma-ge, tuju nene luk, Yesus owosirag-e tuguruk o iri na me-t ndok worak woragolar-e, Tomas na-ge inmin-et woraiga-o. Tumende na pidsa imig worak piga-t nde, Yesus na lobok yarik, it ennggendumu mendak-nen yosolar-e: ”Nowosirag-o. Kinndi yek tag-et wolmer-o” luk yij-o.

²⁷ Yurug-e, Yesus-nen Tomas na yak tosolar-e: ”Kat kinggi an ninggi mok aroro yu bem posolat, naraptap arem kinggi mon kasolat yi-o. Kindi mberen yusu keya buruk, ndemeret kagi luk yebet ki-o!” luk yak tij-o.

²⁸ Yak tosoloma-ge, Tomas-nen at yak tosolar-e: ”Kar-e an-nen idnak Nagawan Indo min an Nembal Pem Nagawan min-nen yusu-o!” luk yak tij-o.

²⁹ Yak tosoloma-ge, Yesus-nen at yak tosolar-e: ”Kat kerengen-nen an neyaruk, kat kindi angin tubu yigen-o. Nde, enlengen-nen an neyagit lag-et nde, an nebem inndi angin tubu yili nab-e enalen kujwa-o” luk yak tij-o.

”Engga yu-ge yu bem-nen mbaridnag-o” yid wene 20:30-31

³⁰ Nde, Yesus-nen at owosirak inmbiri bem-e kwiye worak mende erep kwarat kwarij-et nde, ereb-e engga yu arem-e mbarigir-e lag-o.

³¹ Alat nde, engga yu arem worasu yeba mbarak yu-ge, kit-nen-e Yesus-e Mbal Pem Nagawan ambara Mesias-nen yusu-o luk kinndi-ge at ebem angin tubu yogolat, kinndi angin tubu luk, at unu bem kunlug-et worabokluk-nen mbaridnag-o.