YOANES 18 - Nanduk Ngget Tul Pidnak Wene

Yesus tenaiga wene 18:1-11

¹ Yesus na tepan yurug-e, at owosirak na totno yi Kiteron eyak ele bem ndil laiga-o. Nde, iri me-ge engen uwi yagaidnak sa mbi worala, Yesus-e at owosirak inmin iri me nggwiga-o.

² Nde, iri me-ge Yesus na at owosirak inmin lambuksa mbutluk ndok wurugwi me, at iminep wusururak nap Yuras na-ge o iri me aru woragaij-o.

³ Aru me, Oroma nap san winde ap kere misik min tepan ombo nagawan min Parisi nap min-nen wirik inpidnak Mbal Pem Nagawan uwi yik karok woragwi erep min-e Yuras na imin luk iri me wok yiga-o. Wok yogolar-e, tege wanugwi, san wanugwi luk, tal pem lobok yiga-o.

⁴ Lobok yogolikma-ge, Yesus na at kwat uburak pidsa aru me, it endam panggo lasolat-nen yak ondosolar-e: ”Kir-e ta ogore yili-o?” luk yosoloma-ge,

⁵ it-nen yogolar-e: ”Nasaret nap Yesus na-t ogore yili-o” luk yiga-o. Yogolikma-ge, Yesus-nen yosolar-e: ”Iri-ge an yur-o” luk yij-o. Nde, at iminep wisirid nap Yuras na it ennggenggerak mendak woragaij-o.

⁶ Nde, Yesus-nen yosolar-e: ”Iri-ge an yur-o” luk yak ondosoloma-ge, it iri na-ge yuruk luruk mbogolar-e, nggweyak pem yud mbud mbiga-o.

⁷ Alama-ge, Yesus-nen tuguruk it kin wok onposolar-e: ”Kir-e ta ogore yili-o?” luk yosoloma-ge, it-nen yogolar-e: ”Nasaret nap Yesus na-t ogore yili-o” luk yiga-o.

⁸ Yogolikma-ge, Yesus-nen yosolar-e: ”Nde, ’Iri-ge an yur-o’ luk yak kindigi nar-o. Kir-e an-et nogore yili ala-ge, it yeba-ge mburuwak-nen keya enper-o” luk yij-o.

⁹ Iri yid iri-ge, awo kwat yigit lak ma-nen: ”Neid wa-e. Kat-nen wok nirigen nab-e misiget mbi pul yigit lag-o” luk yid iri na ndak ndak makluk-nen yij-o.

¹⁰ Iri yosoloma-ge, Simon Peterus na-ge eyalawi tena worasoma me, eyalawi na lit karuk, tepan ombo nggulok na ndegel oboso nap na worosolar-e, at eyanggo kigit nggwe irit tebera mberak pij-o. Nde, ndegel oboso nap na unu-ge Malkus irir-o.

¹¹ Mberak posoloma-ge, Yesus-nen Peterus na yak tosolar-e: ”Keyalawi iri-ge ondolma yari-o! An Neid-nen wok niridnak andi bandi kenanggo yimbe yu-ge nujwa bug-o luk perasu-a?” luk yak tij-o.

Yesus na Anas eram ibil mbiriga wene 18:12-14

¹² Yak tosoloma-ge, Oroma nap san winde ap kere na min it ennggendumu wari mendak ibidnak nap na min Mbal Pem Nagawan uwi towarak woragwi Yawuri nap min-nen Yesus tenaga kere kamat luk,

¹³ mondog-et Anas eram ibil mbiriga-o. Anas na-ge olengen iri bem tepan ombo nggulok makluk, mendak ibidnak nap Kaipas na abak irit woragaij-o.

¹⁴ Nde, Kaipas na-nen Yawuri nap na nggomo ondosolar-e: ”At elem nap ondolma ap misiget nak wat momtak perak nde ndag-o” luk yid nar-o.

Peterus-nen-e ”Yesus an naru bug-o” luk yid wene 18:15-18

¹⁵ Iri ala-ge, Simon Peterus min Yesus imin noso nap misik min-e Yesus imbirik mbiriga-o. Nde, ap misik iri-ge tepan ombo nggulok-nen at yenggerak kaso me, Yesus imin luk tepan ombo nggulok na uwi mborom nggwiga-o.

¹⁶ Nggogolikma-ge, Peterus na-ge mbepme tu ndanggi bem mendak worasoma-ge, tepan ombo nggulok-nen yenggerak kaso nap Yesus imin noso nap misik iri na mbepme mberarik, tumende towarak woraso la kwe na wene yak turuk, Peterus imin luk nggwij-o.

¹⁷ Iri ala-ge, tumende towarak woraso la kwe na-nen Peterus yak tosolar-e: ”La yu-ge wa-e. Kat na ap iri imin noso nab-er-a?” luk yosoloma-ge, at-nen yosolar-e: ”An-e lag-o” luk yij-o.

¹⁸ Yosoloma-ge, iri tarem-e toro wok yidnak tarem me, it ndegel ubugwi nap min Mbal Pem Nagawan uwi towarak woragwi nap min-nen kan maburuk, kan tonggogolat mendak woragola-ge, Peterus na iri me mberarik, kan tonggosolat it ennggenggerak mendak woragaij-o.

Tepan ombo nggulok-nen Yesus kin wok ibid wene 18:19-24

¹⁹ Worasoma-ge, tepan ombo nggulok-nen Yesus kin wok obosolar-e, at owosirak onowene min at-nen mirik onposo wene min kin wok ibij-o.

²⁰ Kin wok obosoloma-ge, Yesus-nen at yak tosolar-e: ”Ap pidsa wene yak ondosolar-e, an-e pempa ap pidsa inmbiri bem nam-et nak yoso-o. An-e ap mirik onposolar-e, Yawuri nap pidsa ndok wurugwi sa tepan yugwi ma-nen na, Mbal Pem Nagawan ama-nen na mirik onposolat woragi-o. Nde, an-e kurasa wene mbi yoso bug-o.

²¹ Iri bem-e, kar-e noluk-nen an kin wok nubusu-o? An-nen yidnak wene kulugwi nap perak nde kin wok inpi-o. It kin wok onposolar-e: ’Ar-e no wene yak kondoso-o?’ luk kin wok inpi-o. An-nen yak indidnak wene ir-e enaru-o” luk yij-o.

²² Iri yosoloma-ge, iri me towarak woraso nap misik-nen at inggi mok pem-nen Yesus erare lel kasolat-nen at yak tosolar-e: ”Kar-e tepan ombo nggulok imin-e kwiye lag-et iri nggal yoso-a?” luk yij-o.

²³ Yosoloma-ge, Yesus-nen at yak tosolar-e: ”An-e wene mboroksa yigi ala-ge, ’Wene mborok tak pigen-e iri nggal-o’ luk pidsa inmbiri bem yi-o. Alat nde, an lud tag-et yigi ala-ge, noluk-nen nirigen-o?” luk yij-o.

²⁴ Iri lug-e Yesus na kamarak kundugu Anas na-nen: ”Tepan ombo nggulok Kaipas eram waruk mberer-o” luk yak indij-o.

Peterus-nen ”Yesus an naru bug-o” luk tuguruk yid wene 18:25-27

²⁵ Iri kwarukmu-ge, Simon Peterus na-ge kan tonggosolat iri na me-t mendak worasoma-ge, it erep-nen at yak togolar-e: ”Kat na irit at imin noso nap-nen yusu, lak?” luk yogolikma-ge, Peterus-nen yubul posolar-e: ”An-e mondok lag-o” luk mbeyok yij-o.

²⁶ Yosoloma-ge, Peterus-nen eyanggo tebera mberak pid nap owe owot tepan ombo nggulok ndegel oboso nap misik-nen yosolar-e: ”Engen uwi yaidnak sa iri me-nen at imin worala keyagi na-ge lag-a?” luk yij-o.

²⁷ Yosoloma-ge, Peterus na-nen-e: ”Lag-o” luk mbeyok tak posola, ereya na-net towe wam kusi ene yij-o.

Pilatus eram Yesus ibil mbiriga wene 18:28-38a

²⁸ O kuplilasa-t Kaipas na ama-nen Yesus waruk gubernor woraso sa, ap enpem wene mbarugwi sa iri na me mbiriga-o. Nde, it Yawuri nab-e O Anggul Pandok Mbiridnak tarem yebet kagolat saidnak nunggwi mende na norak me, meya mende enpem puwa naru, ap enpem wene mbarugwi sa iri na me nggwigir-e lak, mbepme larok yiga-o.

²⁹ Iri ala karuk, Pilatus na-nen-e mbepme it endam mberarik-nen yosolar-e: ”Kit-nen ap yu ebem pili iri-ge wene ebe-ge ngge-o?” luk yosoloma-ge,

³⁰ it-nen at yak togolar-e: ”At yu nde meya yigit lak nggal-e, nir-e kat keram ibil lobok yelep pug-o” luk yiga-o.

³¹ Yogolikma-ge, Pilatus-nen it yak ondosolar-e: ”Kit-net at wok uburuk, kit-nen idnak imiri mbarak pidnak wene-nen yidnak yidnag-et at ebem wene mbarer-o” luk yak ondosoloma-ge, it-nen at yak togolar-e: ”Nde, nit-nen ap wururag-e meya me, nit-nen ebem wene mbarurag-e meya-o” luk yiga-o.

³² (Nde, iri kwariga iri-ge Yesus-nen yosolar-e: ”Iri nggal kwat nobogola, wat yimin-o” luk yidnak iri na ndak ndak yosolar-e, iri kwariga irir-o.)

³³ Iri lug-e, Pilatus na tuguruk o ma nggwarik-nen Yesus na wene mbo buruk-nen at kin wok obosolar-e: ”Kar-e Yawuri nap nagawan-nen yusu, lak, ngge-o?” luk yij-o.

³⁴ Yosoloma-ge, Yesus-nen at yak tosolar-e: ”Wene kin wok nubusu yu-ge kat kondomok kindi-nen yusu, lak? Are, nin nap-nen an nowene yak kirikma-nen yusu-a?” luk yij-o.

³⁵ Yosoloma-ge, Pilatus-nen yosolar-e: ”An-e Yawuri nab-a? Kat kondomok kelem nap min tepan omborak nagawan min-nen kat wesera na ninggem kibiga-o. Nde, iri yiga iri-ge kar-e no kwarigenma-nen-o?” luk yij-o.

³⁶ Yosoloma-ge, Yesus-nen yosolar-e: ”An-nen tenagaidnak wi-ge nggweyak ma yu me-ge lag-o. An-nen tenagaidnak wi-ge nggweyak ma yu me nggal-nen-e Yawuri nap ininggem keya nubuwa naru, an nowosirak-nen-e wim mbatleb-o. Lag-o. An-nen tenagaidnak wi-ge o yu me-ge lag-o!” luk yij-o.

³⁷ Yosoloma-ge, Pilatus-nen at kin wok obosolar-e: ”Iri ala-ge, kar-e nagawan–nen yusu, lak?” yosoloma. Yesus-nen yosolar-e: ”Kat-nen yigen irir-o. Nde, an nggweyak ma yu me lobok yigirik, ndet yigi yu-ge, ndemeret wene-ge irir-o luk kenggereyekluk-net lobok yigi-o. Nde, ndemeret wene imin kundik nap-nen-e an-nen yidnak wene irit kulili-o” luk yij-o.

³⁸ Yosoloma-ge, Pilatus-nen yosolar-e: ”Ndemeret wene iri-ge no mende-o?” luk yij-o. Iri luk, Pilatus na tuguruk mbepme Yawuri nap endam mberarik-nen it yak ondosolar-e: ”Nap tag-o. Ap yu-ge meya mbi mondok kwarigit lak kagi-o.

Yesus wururag-o yiga wene 18:38b–19:16

³⁹ Alat nde, kit-nen kwarugwi mende kwarogolar-e, O Anggul Pandok Mbiridnak yebet kagwi tarem-nen an-e kamarak woragwi nap misik wisirik poso-o. Nde, iri kwat konposolar-e, Yawuri nap nagawan iri-ge wesel kindimin, lak?” luk yak indij-o.

⁴⁰ Yak ondosoloma-ge, it pidsa-nen enne nggoksa yogolar-e: ”Lag-o! At iri-ge lag-o! Mbarabas irit wesel nindi-o!” luk yiga-o. (Nde, Mbarabas iri-ge yariya wanoso nab-o.)