YOANES 15 - Nanduk Ngget Tul Pidnak Wene

Yesus-e ndemeret e elem-nen yusu-o 15:1-17

¹ Yuruk, Yesus-nen yosolar-e: ”Ndemeret e elem-e an-net yusu-o. Nde, yabu ombo-ge an Neid-net yusu-o.

² Nde, e elem an nebem-nen mbiridnak inggi mbi-nen engen pigit lak ala-ge, at-nen-e yendera mbo boso-o. Nde, an nebem-nen mbiridnak inggi-nen engen pidnak ala-ge, engen erep kwarat puwakluk, at-nen-e angga erep lera keya buruk kona keya boso-o.

³ An-nen yak kondoso wene iri na bem kir-e mbek tak kinpidnak worali-o.

⁴ An narem puksa woragola-ge, an na kit kenarem puksa woramin-o. Inggi na e elem min kundigit lak, arik woralar-e, engen poso bug-o. Iri nggal, kit-nen na an narem puksa woragit lak ala-ge, engen pugup pug-o.

⁵ E elem-e an-net yusu-o. Nde, inggi-ge kit-net yili-o. Ap-nen an narem puksa woralat, an na at arem puksa woralat yidnak nap-nen-e engen kwarat lombok puwa-o. Nde, kir-e an narem puksa woragit lak ala-ge, yi kwatlik ndi kwatlik kwarugup pug-o.

⁶ Nde, an narem puksa wolma buk nab-e e inggi yendera mbo bidnak nggal irit mbo bosola, le ma-o. Nde, inggi yendera mbo bidnak iri nggal-e ap-nen ndok wosa kan ma mbo bosoma, kan naso-o.

⁷ Kit-nen nde an narem puksa woragolat, an-nen yidnak wene na kit kenarem woralat-nen kit kindingen mende mbi Neid eram nggi yogola-ge, wog-et kunduwa-o.

⁸ Kit-nen engen kwarat pogolar-e, an Neid unu kek tak pili-o. Iri yogolar-e, an nimin nugwi nab-et kwat yili-o.

⁹ An Neid-nen an nabuwa kaso nggal, an-nen na kit kenabuwa kasu-o. Nde, kir-e an-nen kenabuwa kaso iri na bem-et puksa-t wolmer-o.

¹⁰ An-e Neid-nen yak niridnak nak kwarosola, at-nen an nabuwa kaso bem-et worasu nggal, kit-nen nde an-nen yidnak yidnak nak kwarogola-ge, an-nen kenabuwa kaso iri na bem-et woragub-o.

¹¹ Wene yu yak kindigi yu-ge, an nalen-e kit kenarem worasolat, kenalen kenarem woraso iri na iminep mbal makluk-nen yak kindigi-o.

¹² An-nen kenpem pusu wene-ge yu-o. An-nen kit kenabuwa kasu nggal, iri nggal kit na kit-net nabuwa kabuwa kagolat wolmer-o.

¹³ Ap-nen anggamirak enabuwa mondok nggulok kasu nap-nen-e it enmanggim at ondomok iminep wisirik pusu irir-o.

¹⁴ Nde, kit-nen nde an-nen kenpem pidnak wene na nak kwarogola-ge, kir-e an nanggamirak-nen yili-o.

¹⁵ Ndegel unpugwi nap-nen-e it ineid-nen kwarusu mende-ge enaru buk nak woragwi me, yawo-ge an-nen ’Ndegel nubugwi nab-o’ luk yak kindimin pug-o. Are, an Neid-nen an yak niridnak wene pidsa kit yak kindigirik me, ’Nanggamirag-o’ luk yak kundusu-o.

¹⁶ Kit-nen an len nibigit lag-o. Alat nde, an-nen len kunpuruk, kit-nen-e engen kwarat pogolar-e, pem-et woralik nalik momtak engen pobokluk-nen an-nen wirik kinpigi-o. Nde, an nunu bem an Neid nggi yak tugup mende-ge, iri na-t wok kunduwa-o.

¹⁷ An-nen kenpem pusu wene-ge yu-o: ’Nabuwa kabuwa nak kagolat wolmer-o’ luk yak kundusu-o.

Nggweyak ma nap-nen insili rak unpugwi wene 15:18–16:4a

¹⁸ Nggweyak ma nap-nen nde kit insili rak konpogola-ge, nandug-er-e at insili rak ibiga nar-o luk yebet ker-o.

¹⁹ Nde, kit nde nggweyak ma nap min-et kundik woraigep nggal-e, nggweyak ma nap-nen-e yu-ge nit mende-o luk kit kenabuwa kaleb-o. Alat nde, nggweyak ma nap ennggenggerak-nen an-nen len kinpidnak me, kir-e nggweyak ma nap inmin kundig-e lag-o. Iri bem-e nggweyak ma nap-nen-e insili rak kinpili-o.

²⁰ ’Ndegel unpugwi nab-e at eid na teberak puruk, nggok yusu bug-o’ luk yak kindigi wene na yeberak wolmer-o. Nde, it-nen nde an lel mberel nibidnak ala-ge, kit na lel mberel-et kunpuwa-o. Nde, it-nen nde an-nen yidnak yidnak nak kwaridnak ala-ge, kit-nen yidnak yidnak na kwaruwar-o.

²¹ Alat nde, it-nen-e an wirik nibil lobok yidnak nap na enaru buk me, kir-e an nunu bem waring kagwi ala, yi kwat kinpilik ndi kwat kinpilik ma-o.

²² Nde, an-e lobok yigirik, wene yak indigit lak yiginggal-e, it meya yidnag-e enpem pigit lak yeleb-o. Alat nde, yawo-ge it meya yidnak lumuruwokluk tu kore yurak na meya-o.

²³ An isili rak nubusu nab-e, an Neid na isili rak ubusu-o.

²⁴ Ap-nen kwarugwi buk mende-ge it inmbiri bem kwarigit lak yiginggal-e, it meya yidnag-e enpem pigit lak yeleb-o. Alat nde, yawo-nen perak nde an-nen kwarigi mende karug-e, an Neid nenmberek insili rak ninpili-o.

²⁵ Nde, iri kwat ninpili iri-ge it-nen idnak imiri mbarak pidnak wene bem-nen yosolar-e: ’Elem lag-et nde, insili rak nibiga-o’ luk yid iri na ndak ndak tak pogolat-nen kwat ninpili-o.

²⁶ Nde, an Neid eram-nen Yongga Kundurak Nap na ibil mbuwamin-o. At iri-ge Konak Indi ndemeret Mbal Pem Nagawan Mirik Konposo irir-o. Nde, at lobok yuwarig-e, at-nen an nowene kenggel kondosolat wolma-o.

²⁷ Nde, kir-e nandug-et an nimin woragwi me, kit-nen na an nowene kenggel ondogolat woragub-o.