YESKIEL 37 - Nanduk Ngget Tul Pidnak Wene

Mbirik misik me ap onowak nggilarep pilarep kagaid wene 37:1-14

¹ Nde, Nagawan Indo amawi an nebem mbosolar-e, at Indi-nen wok nuburuk, ap onowak nak-nen kobong tak mbirik iri na me nibij-o.

² Nde, Nagawan Indo-nen-e an-e ndemel nuburuk mbirik iri na nggwe wangget kasolat-nen lombot posoma-ge, ap onowag-e obi-nen nggilara labuk yidnak mondok kwarat mbirik iri na me kobong tak kagi-o.

³ Kasoma, Nagawan Indo-nen an kin wok nobosolar-e: ”Nggweyakma nap, lak yoso wa-e. Ap onowak nggilarak yeba-ge tuguruk unluk yurag-e ndag-er-a?” luk yij-o. Yosoloma, an-nen onggo yosolar-e: ”Nagawan Indo Mondok Kek tak wa-e. Kat nak karu-o” luk yak tigi-o.

⁴ Iri luk, Nagawan Indo-nen an yak norosolar-e: ”An-nen it enmanggim yidnak wene yu-ge ap onowak nggilarak ereba yak indi-o. Yak ondosolar-e:

⁵ ’Nagawan Indo Mondok Kek tak an-nen-e kit-nen tuguruk kunluk yobokluk an nindiseb-e kenarem pu yaga pil nggwimin-o.

⁶ Tuguruk kenmengen min kununo min kwarak posolat, kenaboro mbeyoksa keya bimin-o. Iri rak kunpuruk, nindisep wok kondosola, tuguruk kunluk yugub-o. Kunluk yogolar-e, kit-nen-e an nimin-e ar-e ndemeret Nagawan Indo-nen yusu-o luk kenaru ma-o’ yak indi-o” luk yak nirij-o.

⁷ Yosoloma, Yeskiel an-nen-e Nagawan Indo-nen nebem pid ereba na ndak ndag-et onowak nggilarak ereba na wene yak indigi-o. Yak ondosoma ereya na-net kolel kaginggal-e, onowak nggilarak ereba na-ge tuguruk ondolma lombok kundil lobok yosolar-e, ene limbok lombok lobok yosola kuligi-o.

⁸ Iri kwarosola, yik karok worasoma ereya na-net onowak ereba na-ge enmengen min ununo min panggarak puruk, enaboro-ge mbeyoksa labuk yij-o. Alat nde, enpe-ge indisep lak irit woragij-o.

⁹ Iri ala, Mbal Pem Nagawan-nen an yak norosolar-e: ”Nggweyakma nap, lak yoso wa-e. O wija wene yak ti-o. Yak tosolar-e: ’Nagawan Indo Mondok Kek tak iri na-nen yosolar-e, tu abare mo mboso nggwe-nen na irit, mo luwaso nggwe-nen na irit, ena nggwe-nen na irit, abam nggwe-nen na irit kindisep puk kil lobok yi-o. Iri yosolat, it lugwinik worali ereba enarem indisep pu yaga pil nggosola, unluk mag-o’ luk o wija yak ti-o” luk yak nirij-o.

¹⁰ Yosoloma, an-nen-e Nagawan Indo-nen nebem pid wene iri na ndak ndag-et o wija yak tosola-ge, o wija-ge ap lugwinik ereba na enarem indisep pu yaga pil nggosola, it ereba na-ge unluk luk, men yiga-o. Nde, ap ereba na enpe lambuksa-ge ap san ombo kere mondok kwarat yurak ndak irit woraiga-o.

¹¹ Nde, Mbal Pem Nagawan-nen an yak norosolar-e: ”Nggweyakma nap, lak yoso wa-e. Ap onowak nggilarak ereba-ge Isarael nap ut mimirik-nen yusu-o. Nde, it-nen yogolar-e: ’Nir-e ninndi min le yidnak, mondok nit-nen ninndi ebem wat tak puruk wolmomtak mende na lak, mondok abok-nen wolmomtak na lag-o’ luk yili irit ut mimirig-o.

¹² Iri bem-e, an-nen nilirak Isarael nap kwat unpurak wene yak indi-o. Yak ondosolar-e: ’Nagawan Indo Mondok Kek tak an-nen-e kir-e yapma kinpidnak sa-nen tu kuwara lesa kinpil waruk, tuguruk wok kunpuruk Isarael nggweyak pem kinpil lobok yimin-o.

¹³ An-nen yapma kinpidnak sa-nen lesa kinpil wamu-ge, kit an nilirak-nen-e an nimin-e ar-e Nagawan Indo-nen yusu-o luk kenaru ma-o’ luk yak indi-o.

¹⁴ An-nen-e unluk tak enpeyekluk nindiseb-e it enarem pu yaga pil nggwimin-o. Iri rak unpurug-e, it ondomok enma tuguruk woragwi rak inpimin-o. Iri rak onposola karuk, it-nen-e an nimin-e Nagawan Indo-nen yusu-o luk enaru ma-o. Nagawan Indo an-nen yigi iri-ge mondok ndemeret kwarimin-er-o” luk yij-o.

Yewura min Isarael min lambuksa nagawan misiget nak-nen tena unpuruk wolmomtak wene 37:15-28

¹⁵ Nagawan Indo-nen tuguruk an yak norosolar-e:

¹⁶ ”Nggweyakma nap, lak yoso wa-e. Wangun misik wanugundik, ebem engga mbarosolar-e, ’Yewura nagawan-nen tenagidnak wi-o’ luk mbari-o. Iri luk, wangun misik wanuruk, ebem mbarosolar-e, ’Isarael nagawan-nen tenagidnak wi-o’ luk mbari-o.

¹⁷ Iri rak purug-e, wangun mberen ereya na wanurug-e, erep ponok ponok konda wangun misiget nggal kwasa keya bi-o.

¹⁸ Iri rak pugunmu, kat kelem nap-nen: ’Wangun yu-ge ngge kwaridnak wangun-o?’ luk kin wok kobogola-ge,

¹⁹ kat-nen onggo it yak ondosolar-e: ’Nagawan Indo Mondok Kek tak iri na-nen Isarael nap unut mimirik wangun misik iri na wanuruk, wangun misik Yewura nap unut mimirik iri na min kundik puruk, misiget tak pidnak wangun iri na-ge at inggiyapma tena wolma-o’ luk yak undurag-o.

²⁰ Nde, wangun mberen ereya-ge kat-nen puksa tena woralat, kat kelem nap ereya-ge mirik onposolat wolmin-o.

²¹ Iri kwarosolat, it yak ondosolar-e: ’Nagawan Indo Mondok Kek tak an-nen-e an nelem nap oboksa yi wi ndi wi mbiriga ereba na-ge it wolma sa-nen ndok wosa, tuguruk it ondomok unuwi nggweyak pem-et wok unpuruk lobok yimin-o.

²² Inpil lobok yimindig-e o Isarael wi ndobo worak sa ereba ne me an-nen-e ap enlem lambuksa misiget tak unpumu, nagawan misiget nak-nen tena unpuruk wolma-o. It iri-ge ngaksa nagawan mberen-nen tena unpuruk, enlem mberen woragwi iri na nggal-e mondok wolma bug-o.

²³ Nde, it iri-ge meya kwarogolat, kugwiwak mbilaro ngin mende ereba na erembel wanogolat, it enpe kopkap toboksa labuk yugwi iri na-ge kwat ma bug-o. It-nen meya lugud tak kwarugwi mende oboksa kwarogolar-e, an keya nubugwi elem iri na inggem-nen wisirik inpimin-o. An-nen it marak onposola-ge, it iri-ge an nelem nap kwat ma-o. Nde, an-e it Enmbal Pem Nagawan kwat yimin-o.

^24-25 It enlem mberen woragwi iri-ge lambuksa misiget tak unpuruk, it iri-ge an ndegel noboso Nagawan Ndaut nggal nagawan misik-nen tena unpuruk pem irit woralik nalik wolma-o. Iri kwasa woragolar-e, mondok tugup lak pempa an-nen idnak imiri mbarak pidnak wene ndak ndak nak irit kwat tenak wolma-o. Nde, an-nen Yakup wok tigi nggweyak, it onmborak-nen woraiga nggweyak iri na me-t it na irit, it-nen wigarak-nen na irit, pem irit iri na me wolma-o.

²⁶ It-nen pem irit yamuksa konak irit wolmakluk, an-nen-e it inmin urul pimin-o. An-nen-e it inmbiringgat tak posolat, it enpe na kwarat tak pimin-o. It unuwi nggweyak pem iri me-ge an nuwi-ge pem irit tugup lak wolmakluk nuwi wirimin-o.

²⁷ An-e pem irit it inmin woralat, it Enmbal Pem Nagawan kwat yimin-o. Nde, ir-e an nilirak irit kwat ma-o.

²⁸ Nde, an nuwi pem irit it ennggendumu worala-ge, ap enlem oboksa-nen enaru yogolar-e, Nagawan Indo-net Isarael nab-e at ilirak tak enpeyekluk len enpamu-o luk enaru ma-o’ luk yak indi-o” luk yij-o.