YESKIEL 36 - Nanduk Ngget Tul Pidnak Wene

Mbal Pem Nagawan imbiringgat Isarael nap enpem purak wene 36:1-15

¹ Nagawan Indo-nen yosolar-e: ”Nggweyakma nap, lak yoso wa-e. Ndobo Isarael wi iri me ereba yak tosolar-e: ’Kit ndobo yeba-ge wa-e. Nagawan Indo Mondok Kek tak-nen yidnak wene-ge kwara koler-o’ luk yak indi-o.

^2-6 Nde, ap kit kentalu inggi inggi woragwi-nen kit kenpem mbud yogolat, kit ndena wok kunpuruk mborogolar-e, Isarael wi woragwi nap oboksa enlengenma nggal tak kinpikma-o. Iri kwarogolat enalen-nen inndi kek tak pem-nen yogolar-e: ’Ndobo ndobo nanduk-nen woraso ereba na-ge nit nondobo kwat yij-o’ luk yiga-o. Iri yili bem-e ndobo mot min ndobo amun min yi waru min mbirik min o siri iri me woragwi nap-nen keya bikma yud tud mbidnak min mengga wok unpuruk entalu inggi inggi woragwi nap-nen nggweyel inpidnak nap min oboksa wa-e. Nagawan Indo Mondok Kek tak an-nen yak kindidnak wene yu kwara koler-o. An nisilepma kwarat mondosolat-nen ap kentalu inggi inggi worali nap min mondok nggok lombog-e Erom nap min kwara enpem mbud yusu iri-ge it inndi kek tak pem enlengenma nggal tak kunpuruk, nuwi nggweyak wanogolat, wam taroso sa tusuangge ereba na mengga waniga-o. Iri kwarogolar-e, ap enlem ereba-nen kir-e nggweyel konpogolat, enlengenma nggal tak konpogola karuk, an-e ap enlem ereba na nisilepma luk enpem mbud yimin-o.

⁷ Nagawan Indo Mondok Kek tak an-nen mondok owak mbarusu-o. Yi nap ndi nap kit kentalu inggi inggi worali ereba-ge an-nen nerengenma nggal tag-et inpimin-o.

⁸ Alat nde, ndobo Isarael worasu kit yak kendeyeg-o. Kit-nen idnak e ereba-ge isit lasolat, an nilirak Isarael nap ndag-et tuguruk unuwi nggweyak pem lobok yuwa ereba na enmanggim engen puwa-o.

⁹ Isarael nap wa-e. An-e kit kenambigit worasu-o. Kit konnggweyag-e yalugupndik, tuguruk yi mende ndi mende uwi pil kagub-o.

¹⁰ An-nen-e an nilirak Isarael nab-e kwarat tak konposola, o silmu woragolat o tud yil lobok yidnak ereba na-ge tuguruk wiril lobok yugub-o.

¹¹ Iri me woragwi nap min wam min-e an-nen kwarat tak pimin-o. Kwarat tak konposola-ge, nanduk woraigep nggal-e lag-o. Are, mondok terak minig-et kwat yugub-o. Iri kwarogolar-e, kinlirak ndesa mbo wigal tenak woragub-o. Kir-e nanduk-nen woragwi nggal woragolat, an-nen yi mende ndi mende bem-e mondok abu ndak yaga wok kundumu woragub-o. Iri kwasa woragup iri-ge, kit-nen nandug-e iri nggal woragwi buk nggal, nin irit yik kagub-o. Iri nggal kwasa woragolar-e, an nimin-e ’Nagawan Indo-net yusu-o’ luk kenaru ma-o.

¹² An nilirak Isarael nap wa-e. Kit kunuwi nggweyak pem worabokluk, tuguruk wok kunpuruk mbirimin-o. Nde, nggweyak iri-ge kit konnggweyak irit ma-o. Nde, konnggweyak pem yagidnak mende ereba na nonggolat woragolar-e, kit kinlirag-e nere-nen wat yugwi ereba na nggal-e mondok wat ma bug-o.

¹³ Nagawan Indo Mondok Kek tak an-nen yosolar-e: Nggweyak yu unu yarogolar-e, ’Ap naso’, are, ’Iri me woragwi inlirak lak tak onposo nggweyag-o’ luk yarugwi-t nde,

¹⁴ yawo kuri-nen-e nggweyak yu-nen-e’ tuguruk ap nok inpigit lak yosolat, it inlirak na mengga wanigit lak yosolat ma-o. Nagawan Indo Mondok Kek tak an-nen yigi-o.

¹⁵ Nggweyak yu-nen-e ap enlem oboksa-nen pesel pidnak wene kolosolat, ap-nen pesel unpugwi ereba na ebem mbosolat yuwa bug-o. Nggweyak yu-nen-e ebem wolma nap ereba na inlirak lak tak unpuwa bug-o. Nagawan Indo Mondok Kek tak an-nen yigi-o” luk yij-o.

Isarael wi ngget tak purak wene 36:16-38

¹⁶ Nagawan Indo-nen an yak norosolar-e:

¹⁷ ”Nggweyakma nap, lak yoso wa-e. Nde, Isarael nap it enma woragolar-e, it-nen kwarugwi bem-nen it enpage bem-nen it woragwi sa unuwi iri-ge mondok emben to sa keya biga-o. Nde, an-nen it enpage iri yik kasolar-e, kwami poro mborogolat sum eneyabi-nen kik tak pidnak nggal-e meya-t yik kagi-o.

¹⁸ Nde, it-nen-e o nggweyak iri na bem-nen ap worogolat, unkugwiwak kwarogolar-e, o emben to rak pogolat yogola me, an nisilepma-ge it enpem nggilara mberak pigi-o.

¹⁹ An-nen angin worak enpem posolar-e, it-nen woragolat-nen kwarugwi ndak ndag-et enpem pigi-o. Iri rak onposolat, yi wi ndi wi it enaru buk sa ndibi ndi rak inpigi-o.

²⁰ It mbiridnak sa-ge an nunu marak iri na-ge pempa emben to rak pogolat woraiga-o. Ap-nen it inmin yogolar-e: ’It ap enlem yu-ge Mbal Pem Nagawan ilirag-et nde, ir-e Enmbal Pem Nagawan-nen wok indid unuwi nggweyak iri na-ge mondok keya buruk nili-o’ luk yili iri bem-e it-nen an nunu emben to rak pili-o.

²¹ Nde, it Isarael nap mbiridnak sa-ge an nunu marak iri na-ge mondok emben to rak pogola karuk, an-e narem nggowaru yosolat nisili yigi-o.

²² Iri bem-e, Nagawan Indo Mondok Kek tak an-nen Isarael nap yak undusu wene yu yak indi-o: An-nen abok kwarimin iri-ge kit kenabuwa-nen kwarimin pug-o. Isarael nap wa-e. Kit mbiridnak sa-ge an nunu marak iri na-ge kit-nen emben to rak pili iri bem-nen ndowaga kwarimin-o.

²³ Kit-nen wim nap enlem ennggendumu-nen an nunu emben to rak pugwi, an nunu mondok lenak marak woraso nggok iri na an-nen mirik onposola-ge, it-nen-e an nimin yogolar-e: ’Ar-e Nagawan Indo-net yusu-o’ luk enaru ma-o. Nagawan Indo Mondok Kek tak an-net yigi-o. An-nen kit kenpem nggwe-net enlem nin nap-nen an-e Nagawan Indo Mondok Marak misiget lombok-nen yusu-o luk yuwakluk, mirik inpimin-o.

²⁴ Yi nap ndi nap enlem ennggendumu-nen, yi wi ndi wi-nen waga ndok worak kunpuruk, an-nen tuguruk wok kunpuruk kit kondomok kunuwi nggweyak pem-et tuguruk kinpil lobok yimin-o.

²⁵ Iri rak kunpurug-e, yi kopkap lak pem nggweyel yaga kenpem pimin iri-ge kit-nen erembel wanugwi kugwiwak oboksa min kik tak onposo mende-nen kit kopkap tobok tak kinpidnak ereba min oboksa masa labuk yobokluk-nen kwarimin-o.

²⁶ An-nen-e kinndi masa ngget tak posolat, kit-nen yebet kagwi min ngget tak posolat kwarimin-o. Nde, kit kinndi amawi kerep nggal iri na ondolma-ge, yidnak yidnak kwarugwi inndi wok kindimin-o.

²⁷ Nde, an nindi-ge kit kinndi arem nggilara nggorak pimin-o. Kit woragolar-e, an-nen imiri mbarak pidnak wene ereba na ndak ndag-et kwarogolat, an-nen kenpem pidnak ereba na-nen yidnak yidnak kwarogolat worabokluk an-nen-e yik keneyarok woramin-o.

²⁸ Worasola-ge, kir-e an-nen konmborak wok indigi o nggweyak iri na me-t woragub-o. Woragolar-e, kir-e an nilirak kwat yugub-o. Nde, an-e kit Kenmbal Pem Nagawan kwat yimin-o.

²⁹ Nere kit kenpem mbud yusu ereba na nggal mbud yigit lak makluk, ’Nggandum mbato kar-e mondok alim nak lasolat wolmin-o’ luk, an-nen-e nggandum mbato yak timin-o.

³⁰ An-nen-e kene ereba na engen kwarat tak posolat, keneyapmu woraso mende kwarat tak posola, nogoro-nen ndowaga ap enlem oboksa ennggendumu kit kunnu emben to rak pugwi mende nogoro-ge tuguruk kenpem mbuwa bug-o.

³¹ Kit-nen-e kit kenpage meya kwarugwi min kit-nen lugud tak kwarugwi min ereba na kinndi-ge yebet kagolug-e, kit-nen meya kwarugwi min meya emben to rak mende kwarugwi ereba na min kit kondomok kenambikpebe yik karug-e, sok wururak nggal yugub-o.

³² Isarael nap wa-e. Kenaru wolmer-o. Kit kenabuwa-nen ereba oboksa kwarimin-e lag-o. Kir-e mondok kenpage iri-nen ndowaga kinnggiri kagolat, mondok wandu yurag-o. An-e Nagawan Indo Mondok Kek tak iri-nen yigi-o” luk yij-o.

³³ Nagawan Indo Mondok Kek tak iri na-nen yosolar-e: ”An-nen kit meya yidnak oboksa masa keya konposola-ge, kir-e tuguruk kit kunuwi siri ereba na me wolmer-o yak kundumu woragub-o. Woragolar-e, o tud tak ereba na-ge tuguruk wurugub-o.

³⁴ Nanduk keneyabu sik iri nggwe ap mborogolar-e, nggweyak amburu lak, umbuk lerak kagwi-t nde, an-nen-e iri na me-t yabu waner-o yak kundumu wanugub-o.

³⁵ Iri yogola, nanduk nggweyak mondok amburu lak, umbuk woraso na-t nde, yawo-ge nden yaga Eren Nggweyak nggal ala karuk, iri-nen o siri ereba na nandug-e ndamera tud tak pikma, yud tud kugun woraso na-t nde, yawo-ge o siri mbit mbat tak, enpem kore yurak puk kagolat, o siri ereba me woragwi nap na enpe kwarat irit kagoluk, ap oboksa-nen wi yogolat, obok mbaruwa-o.

³⁶ Kit kentalu ponok ponok ap erep keya inpidnak worali ereba na-nen: ’Nagawan Indo-net o siri ndamera lak tak pidnak ereba na tuguruk mendak pil lobok yosolat, yabu mondok nggweyak amburu lak yidnak ereba na tuguruk yabu wanosolat kwarusu-o’ luk enaru ma-o. Nagawan Indo an-net ’Irit kwarimin-o’ yigi iri-ge, mondok kwarimin-er-o” luk yij-o.

³⁷ Nde, Nagawan Indo Mondok Kek tak iri na-nen yosolar-e: ”Isarael nap wa-e. An nindi-nen-e kir-e lomba oro nggal kwarat tak kenpeyek-nen ’Yongga kunduwakluk an nemengen mbarer-o’ yak kindimin-o.

³⁸ Nanduk Yerusalem iri me nggok sakwi tarem-nen Mbal Pem Nagawan amanggim wosa purak waruk lobok yidnak lomba kwarat nggweyak ebebe lak yusu iri na nggal-et o siri yawo ndamera labuk yidnak yeba me-ge wolma nab-e kwarat yosola-ge, kit-nen-e an nimin-e ’Ndemeret Nagawan Indo-net yusu-o’ luk kenaru ma-o” luk yij-o.