YESKIEL 34 - Nanduk Ngget Tul Pidnak Wene

Isarael nap yik eneyarok woragwi nap 34:1-10

¹ Nagawan Indo-nen yak norosolar-e:

² ”Nggweyakma nap, lak yoso wa-e. Isarael nap nagawan nagawan ereba innggiri wiri-o. It yak ondosolar-e, Nagawan Indo Mondok Kek tak an-nen it yak undusu wene yu kwara yak indi-o: ’Isarael nap yik eneyarok woragwi nap wa-e. Kir-e kit kondomok kenmanggim nak nggok tak pili-o. Alat nde, kit konlomba amanggim-e nggok tak pili bug-o. Iri kwatli bem-e mondok lak tak kinpimin-o.

³ Nde, konlomba ereba agamo amburu-ge kir-et nonggolat, usu bem-e kit-nen yurugwi sum yakolat, lomba wam mondok nggog-e kit-nen wutluk nili-o. Alat nde, kit-nen-e lomba ereba-ge mondok ndigitli bug-o.

⁴ Nde, lomba ndeyak ereba na-ge kir-e kwara ndigitli bug-o. Lomba ud worak ereba na-ge obat mak tili bug-o. Nde, ud ebem ereba na-ge kir-e nggitlik pili bug-o. Kabaksa pul yidnak lomba-ge kir-e kore yaga tuguruk waruk lobok yili bug-o. Are, ebem lud nde mondok lomba ereba na-ge lel mberel inpili-o.

⁵ Nde, lomba ereba na-ge ombo lak me, nggilara ndibi ndi yosola, isilepma worak ndakngge-nen naso mende kwat yusu-o.

⁶ Iri yosolar-e, nolomba ereba na-ge ndobo kek tak pem ereba na-nen ndobo ndobo ereba na nggwe nggilarak mbu nusu-o. Nggilarak mbu nogolar-e, yi wi ndi wi oboksa it inmbiri nak woragola-ge, ap misiger-o luk mbi-nen inndi yebet kagolat, onkore yogolat kwatli bug-o’ luk yak kundusu-o.

⁷ Iri ala-ge, lomba yik karok woragwi nap wa-e. Nagawan Indo Kek tak an-nen yak kundusu wene yu-ge kwara koler-o:

⁸ ’Mbal Pem Nagawan nuruk nak woraso an nowag-o. Wene yu-ge kwara yebet ker-o! An nolomba ereba-ge yik eneyarok woragwi nap lak me, isilepma worak ndakngge-nen teberarik, ninggij-o. Kit an-nen idnak lomba wam yik karok woragwi nab-e lomba ereba-ge kwara ndigitli bug-o. Iri yogolar-e, kir-e lomba ereba amanggim-e nggok tak pigit lak, kit kondomok kenmanggim nggok tak pili-o.

⁹ Iri bem-e lomba yik karok woragwi nap wa-e. Kwara koler-o.

¹⁰ Nagawan Indo Mondok Kek tak an-nen yak kundusu-o. An-e kit kinmin sirid nap-nen yusu-o. Nde, nolomba ereba na-ge kit kendam-nen tuguruk wanosolat, kit-nen lomba yik karok wolmomtak kenpem pigi yabu na-ge mondok pem lak tak pimin-o. An-nen-e kit kondomok kenmanggim nggok tak purak nak yebet kagwi elem iri na-ge lak tak pimin-o. Nde, nolomba ereba na-ge an-nen imiri yumu, kir-e nunggup pug-o’ yak kundusu-o” luk yij-o.

Lomba wam konag-et ndogoroso nap 34:11-31

¹¹ Nagawan Indo Mondok Kek tak an-nen yosolar-e: ”An nondomok-net nolomba-ge kore yosoluk, kwara ndogorosolat woramin-o.

¹² Nde iri-ge lomba yik karok woraso nap-nen olomba nggilarak ndibi ndi rak ereba na kore luk, ndok wosa keya buruk ndogoroso iri na nggal-et kwarimin-o. An nolomba o muruk tak ndamuk tarem-nen yi wi ndi wi inpil mbiridnak ereba na-ge it nggilarak woragwi sa-nen wok unpuruk lobok yimin-o.

¹³ Nde, it ereba na-ge nin nap enma-nen lesa wok unpuruk lobok yimindik, ndok wosa keya unpuruk, tuguruk it enma-t wok unpuruk lobok yimin-o. Iri rak unpuruk, an-nen-e Isarael wi iri me-nen ndobo ndobo ereba na nggwe nduguluk nosolat, mbirik ereba na nggwe ndumuluk nosolat, tusuangge miri worak ereba na nggwe mborosolat kwaril nimin-o.

¹⁴ An-nen-e Isarael wi iri na me-nen it enmanggim-e mondok ndemeret yi mbirik ndi mbirik tusuangge nak arim worak, ndobo nggwe-nen mbirik nggwe-nen ereba na enmanggim lenak pumu, iri me woragolar-e, tusuangge tarogolat, enpabok kwarogolat kona-t yamuksa wolma-o.

¹⁵ An nondomog-et nolomba ereba na yik eneyarok woraso kwat yosolat, it enpabok kwarurak ondoro lid lud tak posolat kwarimin-o. Nagawan Indo Mondok Kek tak an-net yusu-o.

¹⁶ Nolomba pul yuwa-ge kore yosolat, nde, kabak yuwa-ge waruk lobok yosolat, e elem wiridnak ala-ge, kamarak posolat, ud ala-ge, obat wok tosolat kwarimin-o. Alat nde, omok worak nggok min amawi worak min-e an-nen lak tak pimin-o. Iri kwarimin iri-ge an-e lomba wam yik karok woraso nap konak nak kwaroso me, konag-et kwarosolat-nen kwarimin-o.

¹⁷ An nolomba oboksa wa-e. Kwara koler-o! Nagawan Indo Mondok Kek tak an-nen kit yak kundusu-o. Kit kondomoktak lombok an-nen kenpem wene mbarosolar-e, kennggendumu meya lena, konak lena kwarosolar-e, lomba-ge kambing enggendumu-nen lena arik tak pimin-o.

¹⁸ Kit kennggendumu ereb-e tusuangge miri ereba na lak tak pili-t nde, kenpem-e lasu bug-o. Alat nde, tusuangge ebis ninggit lak ereba kunuwok nak-nen lal wiril mborogolat, yi konak kopkap lak ereba na nurug-et nde, yi norak sa erengen miri ereba na unggul tak pogolat kwatli-o.

¹⁹ Iri rak posoma, nolomba erep ereba na-ge tusuangge kunuwok-nen yemnda keya bidnak ereba na tarogolat, yi unggul tak pigep ereba na nonggolat kwatli-o.

²⁰ Iri bem-e Nagawan Indo Mondok Kek tak an-nen yak kendeyeg-o. An-nen-e kit lomba kenmawi worak min kenmawi lak min kenpem wene mbenarimin-o.

²¹ Kit-nen-e lomba amawi lak ereba na pelek pelek tak pogolat, kenanggul ambo bem pelek kagola, lomba oro erep ereba na enggendumu-nen langgara wirik pigeb-o.

²² Alat nde, kit kinsilepma min iri nggal kwat enperenak woragup naru, nolomba ereba-ge an-net inmiri yimin-o. Nde, an-nen-e nolomba ereba na enariktak lombok enpem wene mbenatluk, konak lena arik tak posolat, meya lena arik tak posolat kwarimin-o.

²³ Nde, an-nen-e lomba ereba at nak-nen ndegel onposo nap kwat yosolat, kwara ndegel onposolat kwat tenak wolmaklug-e, an ndegel noboso nap Ndaut nggal nagawan misik lena mendak pimin-o.

²⁴ Iri rak pumu worala-ge, Nagawan Indo an-e it Enmbal Pem Nagawan kwat yosola, an ndegel noboso nap Ndaut nggal iri na-ge it enanggul pem kek tak amawi worak it tena unpuruk wolma-o. Nagawan Indo an-nen yigi-o.

²⁵ It kona yamuksa wolmakluk, it yamuksa wolmomtak wene an-nen-e urul yak indimin-o. Nde, iri-ge ndakngge eyak worak oboksa it woragwi sa-nen sera wirik pimin-o. Iri rak pumu, an nolomba ereba na-ge tusuangge taroso sa ereba na me kona yamuksa woralat, walma ereba-t nene yosolat kwaruwa-o.

²⁶ Nde, an-nen-e inmbiringgat tak posolat, ’An nondobo marak iri na eralu inggi inggi ereba na me wolmer-o’ luk yak indimin-o. It-nen nde talme ukwe yogola-ge, talme wok ondosolat woramin-o.

²⁷ Nunggwi e ereba na-ge engen yosolat, yabu ereba na-ge nunggwi mende kwarat yosolat, ir-e unuwi nggweyak pem yamuksa konak nak irit woragolat ma-o. Nde, an-nen nde nilirek kamat unpuruk woragwi posid kere ereba na ndelak posoluk, it anggun panggun tak unpugwi nap ininggiyapma-nen wisirik onposolat kwarosola karug-e, it-nen-e an nimin-e ’At iri-ge Nagawan Indo-nen yusu-o’ luk enaru ma-o.

²⁸ It iri-ge an enaru buk nap-nen-e nden unpuwa bug-o. Ndakngge isilepma worak-nen na mondok leben unpuwa bug-o. Ap-nen-e ir-e kwiye rak unpuwa bug-o. Ir-e enalen worak wisirik yamuksa irit wolma-o.

²⁹ Nde, an-nen-e it eneyapmu-ge nunggwi mende ndak tak posola, it woragwi sa enma-ge mondok nogoro mbud ma bug-o. It iri-ge ap enlem nin nap ereba-nen-e enlengenma nggal tak inpili ereba na nggal-e kwaruwa bug-o.

³⁰ It iri kwarak woragola, yi nap ndi nap-nen enaru yogolar-e, Isarael nap iri-ge ’At ilirak me, at na nggetlel unpuruk worasu-o’ luk enaru ma-o. Nagawan Indo Mondok Kek tak an-nen yigi-o.

³¹ Ndemeret kir-e an-nen nunggwi mende mak kondoso nolomba oro-nen yili-o. Kir-e an nilirak-nen yili-o. Nde, an-e kit Kenmbal Pem Nagawan-net yusu-o. An-e Nagawan Indo Mondok Kek tak-nen yak kundusu-o” luk yij-o. 35:1-15 Pasal yu arem-e Erom nggweyak pem woragwi nap enpem angin worak mende mberak purak wene mbarak worasu-o.