YESKIEL 33 - Nanduk Ngget Tul Pidnak Wene

Mbal Pem Nagawan-nen Yeskiel it yik eneyarok wolmomtak lenak pidnak wene 33:1-9

¹ Tuguruk Nagawan Indo-nen an yak norosolat-nen yosolar-e:

² ”Nggweyakma nap, lak yoso wa-e. Kat-nen kelem nap yak indi-o. An-nen o misik inmin wim mbarak posoma-ge, yu nggal kwat ma-o. O iri na me woragwi-nen-e it ennggendumu-nen tu yik karok wolmomtak misik lenak puwa-o.

³ Nde, tu yik karok woraso iri na-nen wim nap lobok yogolat eneyarug-e, at-nen-e wim lobok yogola-nen ene lo rak pugwi mende ap oboksa-nen kwil kwalsa wolmakluk ene lo rak poso-o.

^4-5 Ta-nen nde ene lo rak puwa iri na kulurug-et nde, we nayo kayo aru buk nggal wolma-ge, wim nap lobok yogolar-e, wuruwar-o. Nde, wuruwama wat ma iri-ge meya-ge at ondomok ebem-er-o. Nde, at-nen nde ene lo iri na kuluruk, lid lud tak pelepnggal-nen-e agap nggarik woraleb-o.

⁶ Alat nde, tu yik karok woraso nap iri na-nen nde wim nap lobok yogola eneyarug-et nde, wim lobok yogola, ene lo rak pugwi mende ene lo rak pigit lak yosoma, meya yugwi nap ereba unduwama-ge, meya yugwi nap ereba na indidnak pem erem-e tu yik karok woraso iri na bem-et an-nen-e pimin-o.

⁷ Nggweyakma nap, lak yoso wa-e. Kar-e an-nen Isarael nap yik eneyarok wolmomtak nap irit lenak kibigi-o. Worasoma, an-nen it enmanggim kebem pimin wene-ge it yak undurag-o.

⁸ An-nen yosolar-e: ’Meya yoso nap iri na war-et ma-o’ yak kirimin-et nde, kat-nen nde at abage nden kasola imiri yuwakluk nggomo wirigit lak irit worasoma, at-nen meya irit kwat tenak worasoma wat ma iri-ge erem-e kat kebem-et pimin-o.

⁹ Nde, kat-nen nde meya kwaroso nap iri na nde nggomo wurugun-et nde, ar-e meya nak kwat tenak, kondok yigit lak meya elem iri-net wat ma-o. Alat nde, kar-e kurug-et woragun-o” luk yij-o.

Ap ondomoktak-nen ”An-nen kwarimin pem-et nebem mbuwa-o” luk kwaluk kwarogolat wolmomtak wene 33:10-20

¹⁰ Nagawan Indo-nen an yak norosolar-e: ”Nggweyak ma nap, lak yoso wa-e. Isarael nap-nen yogolar-e: ’Nir-e nit-nen lugud tak kwarugwi min meya kwarugwi min iri na-nen ndowaga pempa angin pangin tak nunpusu yu-ge nir-e ngge kwasa wulmul-o?’ luk yili iri-ge tugurug-et it yak indi-o.

¹¹ It yak ondosolar-e: ’Nagawan Indo Mondok Kek tak, Mbal Pem Nagawan nuruk woraso nowag-o. An-e meya yugwi nap wat yurak iri-ge mondok nisili-o. Alat nde, an nindi-nen-e meya yugwi nap iri-ge it unluk irit wolmakluk it-nen meya kwarugwi iri keya burak irit nindingen-o. Isarael nap wa-e. Kit-nen meya kwatli keya ber-o. Noluk-nen kir-e wat yurak kindingen tak pili-o?’ luk yak indi-o.

¹² Nggweyakma nap, lak yoso wa-e. Kat-nen Isarael nap yak ondosolat-nen yosolar-e: ’Konak nap iri na-nen nde meya kwarosola-ge, at-nen nanduk konak kwarosolat woraidnak iri na bem-nen at imiri yuwa-ge lag-o. Nde, meya yoso nap iri na nde at-nen meya kwaroso iri na keya bosola-ge, angin worak ebem puwa bug-o. Iri nggal-et konak woraso-net nde meya kwarosola-ge, imiri yuwa bug-o.

¹³ Konak nak kwaroso nap imin-e an-nen-e kimiri yimin-o luk urul yak timin-et nde, at iri-nen meya kwarosolat-nen yebet kasolar-e, an-e nandug-e konak nak kwarosolat woragirik me, an-e nimiri yuwa-o luk yebet kasolar-e, iri-ge lugud tak nggwe yebet kasu-o. An-e at-nen nanduk konak kwaroso iri na-ge mondok yebet kamin pug-o. At iri-ge at-nen meya kwaruwa bem-et wat ma-o.

^14-15 Erep-nen-e an-nen meya yoso nap yak tosolar-e, kar-e mondok wat yugun-o yak timin-et nde, at-nen meya yoso iri na keya buruk, konak lud tak mot mot kwaroso nde tel korosolar-e, at isilobulo ap-nen namat wanogola, onggo posola-nen wok undurak it enarengge at-nen tena buruk woraidnak ereba na wanigit lak tuguruk wok ondosolat, yariya wanidnak tuguruk winde wok ondosolat, nde, enkap ndagoso imiri mbarak pidnak wene iri na ndak ndak kwarosola-ge, ar-e mondok wat ma bug-o.

¹⁶ An-nen-e at-nen meya kwaridnak iri na-ge nindi yebet yebet tak woramin pug-o. Ar-e konak lud tak nak kwaruwa ereba na bem-et uruk wolma-o’ yak indi-o.

¹⁷ Alat nde, it ap enlem iri-nen-e an-nen kwarusu-ge mot mot kwarusu bug-o luk yak nitli-t nde, it perak nde mot mot kwatli bug-o.

¹⁸ Tugurug-et mondok amawi rak pusu-o. Konak kwaroso nap-nen nde meya kwaroso tel korosola-ge, at-nen meya kwarusu iri na-nen ndowaga-t wat ma-o.

¹⁹ Meya kwaroso nap-nen nde meya kwaroso iri na keya buruk, ndemeret lud tak nak kwaroso tel korosola-ge, iri kwaruwa iri na bem-et urug-et wolma-o.

²⁰ Iri nggal kwarag-et nde, kit Isarael nap-nen-e an-nen kwarusu-ge mot mot kwarusu bug-o luk yak nitli-t nde, an-nen-e kit-nen kwarogolat woraidnak ndak ndag-et kenpem wene mbarimin-o” luk yij-o.

Yerusalem na-ge wim nap ininggem mbid obok kulidnak wene 33:21-22

²¹ Nde, mbo ninpidnak sa ereba na me woragolat olengen dua belas tak pogolat, nde, waneya sepulu, tanggal lima bem-e ap misik Yerusalem iri me-nen mengga mberarik, neram lobok yarik-nen an yak norosolar-e: ”Yerusalem siri iri na-ge wim nap ininggem mbij-o” luk yak nirij-o.

²² Nde, at iri na kup lobok yekluk yosola-ge, kubu-ge Nagawan Indo amawi nebem mbosola kagi-o. Nde, ap iri na neram lobok yosola-ge, wene yurak meya woraso iri na-ge wene yoso kwat yigi-o.

It ap iri enlem iri-nen meya kwarugwi wene 33:23-29

^23-24 Nagawan Indo-nen an yak norosolar-e: ”Nggweyakma nap, lak yoso wa-e. O tud yil lobok yosolat kugun ngguru yid sa Isarael wi ereba me worali nap-nen yogolar-e: ’Abarakam iri-ge ebe misiger-et nde, o nggweyak yu oboksa winde yamu-o. Alat nde, nit perak nenpe kwarat me, o yu-ge nit nonnggweyak-net yusu-o’ luk yili-o.

²⁵ Iri yogola karuk, Nagawan Indo Mondok Kek tak-nen wene yu it yak unduwakluk nebem posolar-e: ’Kir-e uno nonggolar-e, eyabi parugu nonggolat, kugwiwak erembel wanogolat, ap worogolat kwatli-o. Kir-e iri kwarogolar-et nde, kwiye lag-et nggweyak yu-ge nit nonnggweyak-nen yusu-o luk yili-a?

²⁶ Kir-e kensan pem kinndi wat tak pili-o. Kit-nen kwarugwi-ge emben to rak mende nak kwatli-o. Kir-e unun onkwe worak inmin mbabi nak kwat tenak woralir-o. Iri nggal kwarogolar-et nde, kit-nen-e te sa-t nggweyak yu-ge nit nonnggweyak-nen yusu-o luk yurag-e ndag-er-a?

²⁷ Nagawan Indo Mondok Kek tak, Mbal Pem Nagawan nuruk nak woraso nowag-o. O tud yil lobok yidnak sa worali nab-e mondok unduwa-o. Nde, it ap lak ma nembaga worali nab-e ndakngge isilepma worak-nen pendega nok unpuwa-o. Nde, it ndobo bem kurak tak worali min urumu ereba yurak kurak worali min-e kugwi-nen wat ma-o.

²⁸ Nde, o iri-ge ap tupo sa pena nak nggurak keya bimin-o. Ir-e inndi kek tak pugwi enmawi elem na-ge lak ma-o. Nde, ndobo Isarael wi worasu ereba me-ge yi ene lak ndi ene lak yosolat, ap-nen ereba nggwe mbururag-e mondok kwiye ma-o.

²⁹ It-nen meya kwarugwi bem an-nen onggo angin worak enpem posolat, it unuwi iri kugun nggurusa ap tupo sa keya bumu, iri-nen perak it-nen-e an nimin-e ’Ar-e Nagawan Indo-nen yusu-o’ luk enaru ma-o” luk yij-o.

Mbal Pem Nagawan ene lomboksa yoso nap iri na-n yak indidnak pem-nen kwaridnak wene 33:30-33

³⁰ Nagawan Indo-nen yosolar-e: ”Nggweyakma nap, lak yoso wa-e. Kat kelem nap-nen pak tumende bem ala na, o tumende bem ala na, ennggamirak inmin lambuk luk wene mbarogolar-e, kat kobok nak pili-o. It-nen ennggamirak inmin yak kerak mbogolar-e: ’Naptag-o. Nagawan Indo-nen o yawo yak nindidnak wene kuluwok-nen ndak mburuwog-o’ luk yili-o.

³¹ Iri luk, nggwid nggwid lobok yogolar-e, an nilirak nggal kwasa kore luk, kat kene kulili-t nde, kat-nen enpem pusu ereba na ir-e kwatli bug-o. It enemnde bem-nen-e enabuwa kagwi wene wirik pili-t nde, inndi arem-nen-e it ondomok ukwe ukwe mende lesa wanurak iri nak yebet kali-o.

³² It-nen kat yik keyagolar-e, kar-e it inndi yangonosolat, kecapi poba ene rak posolat, ndawi konak yoso karu nap irit yik keyali-o. Ndemeret, kat-nen yidnak wene-ge kulili-t nde, ndak ndag-e mondok kwatli bug-o.

³³ Nde, kat-nen yugun wene ereba-ge oboksa kwar-et ma-o. Nde, iri kwat yuwa tarem iri na wok yosola-nen perak ’Ndemeret Mbal Pem Nagawan ene lomboksa yoso nap misig-e nennggendumu-ge woragamur-o’ luk yebet kuywa-o” luk yij-o.