YESKIEL 3 - Nanduk Ngget Tul Pidnak Wene

¹ Nde, Mbal Pem Nagawan-nen yosolar-e: ”Nggweyakma nap, lak yoso wa-e. Engga ket mbet mbarak yu waga min-o. Nasoluk mburugundik, Isarael nap ereba wene yak indi-o” luk yak nirij-o.

² Yosoloma, an-e nondokwak pera yosolakmu, Mbal Pem Nagawan-nen-e nujwakluk engga iri na-ge wok nirij-o.

³ Wok norosolat-nen yosolar-e: ”Nggweyakma nap, lak yoso wa-e. Engga ket mbet mbarak yu nuruk, kurum arem tak pi-o” luk yak nirij-o. Yosoloma, engga iri na ningginggal-e nemndam-e undu-ge konak, tamuk amburu undu nggal irit kagi-o.

⁴ Tuguruk Mbal Pem Nagawan-nen yosolar-e: ”Nggweyakma nap, lak yoso wa-e. Kar-e Isarael nap endam mburugundik, it enmanggim an-nen kebem pimin ereba na oboksa yak indi-o.

^5-6 An-e it Isarael nap iri endam-et wirik kubusu-o. Kar-e enlem nin nap enne na kat-nen kulurak meya, kat-nen yebet kudtak na meya ereba endam wirik kubusu-ge lag-o. Nde, an-nen nde enlem nin nap ereba endam wirik kobosolat nggal-nen-e it iri-nen-e kat-nen yidnak wene ndak kuleleb-o.

⁷ Alat nde, it enlem Isarael nap iri-nen-e kene kuluwa bug-o. An nene-t nde, kulili buk iri nar-o. It oboksa-ge wene kulugwi buk, an nimin eyak nak wurugwi-net yili-o.

⁸ Nde, yawo-ge an-nen na kar-e it nggal-et keyanggo lak, wene koloso buk elem kwarak kibimin-o.

⁹ An-nen kat kwarak kobosolar-e, tumbu nggal tugup lak tak kobosolat, tulurak puk kerep intan nggal tak kobosolat yimin-o. Kar-e eyak wurugwi nap ereba enaye yurak pug-o” luk yak nirij-o.

¹⁰ Nde, Mbal Pem Nagawan-net wene erep min-et yosolar-e: ”Nggweyakma nap, lak yoso wa-e. An-nen kat yak kirimin wene kwara yebet karuk, kwara yeberak wolmin-o.

¹¹ Kar-e kelem nap mbo inpidnak sa worali ereba endam mbiri-o. Nagawan Indo Mondok Kek tak an-nen it yak undusu wene-ge kuluwa, lak, lag-a? Yak nak indil mbururag-o” luk yak nirij-o.

¹² Iri yosola-ge, Mbal Pem Nagawan Indi-nen an-e lek neyaruk lagaij-o. Iri yosola, nombol nggwe-nen ene o nggu nggal pem-nen yosolar-e: ”Nagawan Indo aid arem iri me abinal worak woraso iri na erembel wanurag-o!” yosola, kuligi-o.

¹³ Kuliginggal-e, urugup worak ereba na anggam isiyamu-ge anggam isiyamu bem yembak worosolar-e, isiyamu lumbak kolosolat, wukoma ijok nggal ereba na muma nggal kwarosolar-e, ene mu-ge wukoma ene mu nggal nggok irit kuligi-o.

¹⁴ Iri yosoma-ge, Nagawan Indo Amawi Mondok Kwiye Worak irit an nebem mbuwasolar-e, kud norosolat ereya na-net Konak Indi-nen wok nuburuk mborosola-ge, mondok nindi min ngari luk, nisilepma yigi-o.

¹⁵ Nde, wok nuburuk mberarig-e, Yi Kebat eyak pem o Tel-Abib mbo inpidnak nap nak ndok wosa o wosa inpidnak sa iri na me-t wok yigi-o. Wok yigirik, iri me tuju bem-e woralar-e, an-e mul mul-et kasolat, kolosolat kwarigi ereba na bem-e wendet yosolat, wi tenak woragi-o.

Yeskiel na-ge Isarael nap yik eneyarok woraso kwat makluk Nagawan Indo-nen ebem pidnak wene 3:16-21

¹⁶ Nde, tuju bem ereba na woraruk ombol nggwe-ge Nagawan Indo-nen yak norosolar-e:

¹⁷ ”Nggweyakma nap, lak yoso wa-e. Kar-e an-nen Isarael nap yik eneyarok wolmomtak nap irit lenak kibigi-o. Worasoma, an-nen it enmanggim kebem pimin wene-ge iri yak undurag-o.

¹⁸ An-nen yosolar-e: ’Meya yoso nap iri na mondok wat ma-o’ yak kirimin-et nde, kat-nen nde at abage iri nden kasola, imiri yuwakluk nggomo wirigit lak irit worasoma, at-nen meya irit kwat tenak worasoma wat ma iri-ge erem-e kat kebem-et pimin-o.

¹⁹ Nde, kat-nen nde meya kwaroso nap iri nde nggomo wurugun-et nde, ar-e meya nak kwat tenak, kondok yigit lak, meya elem arem iri-net wat ma-o. Alat nde, kar-e kurug-et woragun-o.

²⁰ Nde, konak nap misik-nen nde meya kwaroso tel korosola, an-nen at are burak mende abuwok posola, kat-nen nde nggomo wirigit lak worala, wat ma iri-ge at-nen meya kwaroso bem-et wat ma-o. At-nen konak kwaroso ereba na-ge an-nen-e nindi yeberak woramin pug-o. Alat nde, at wat ma iri-ge erem-e kat kebem-et pimin-o.

²¹ Nde, konak nap iri na nde at-nen meya kwaruwa naru kat-nen nggomo worosola, kat-nen nggomo wurugun iri na ndak ndag-et kwarosola-ge, at iri na lak tak pimin-e bug-o. Kat na kurug-et woragun-o” yak nirij-o.

Yeskiel ene lak yaga labuk yidnak wene 3:22-27

²² Nagawan Indo iri me wok yosolat, at amawi-ge an narem nggosolar-e, at-nen yak norosolar-e: ”Kar-e men luk, mbirik iri nggwe mbiri-o. Iri me-nen an-e kat kimin wene yimin-o” luk yosola, kuligi-o.

²³ Yosoloma, an-e mbirik iri nggwe mborosoma-ge, nanduk Yi Kebat eyak pem-nen Nagawan Indo wok yosolat abinal kagi abinal iri na nggal-et kagi-o. Karug-e, an-e nggweyak pem nerare nggwe tud yigi-t nde,

²⁴ Mbal Pem Nagawan Indi an narem nggosolat, nggwelsa mendak nuburuk, Nagawan Indo-nen an yak norosolar-e: ”Kar-e tuguruk kama mburugundik, kama nak mondok tu lesa wolmomtag-o.

²⁵ Nggweyakma nap, lak yoso wa-e. Kar-e kamarak kubuwama, mbepme na mburugun puk. Ap inmin na lambuk yugun pug-o.

²⁶ An-nen-e kat kama-ge kamanggaruk min lop nok tak pil lamu, wene eyak wurugwi nap yu-ge nggomo undugun pug-o.

²⁷ Abok an-net tuguruk kat kimin wene yosola perak kat-nen wene yurak amawi-ge kebem pil lobok yimin-o. Iri yumu-ge, Nagawan Indo Mondok Kek tak an-nen it yak undurak kebem pidnak wene-ge mondok it yak undugun-o. Nde, it iri-ge ndemeret wene eyak wurugwi me, kat-nen yak ondosola-ge, ap erep-nen-e kat-nen yak undugun wene kuluwa-t nde, ap erep-nen-e mondok kuluwa bug-o” luk yij-o. 4:1–17:24 Pasal ya arem-e Nagawan Indo-nen-e Yeskiel emndam tak pidnak wene kwarat ereba-ge Yerusalem siri iri na wim nap ininggem mburak wene min Isarael nab-e wim nap enma mbo inpil mbururak wene min iri-nen Mbal Pem Nagawan ilirak-nen kugwiwak erembel wanogolat, meya nak kwat tenak woragwi bem angin worak mende ereba na enpem mbidnak wene min-et mbarak worasu-o.