YESKIEL 2 - Nanduk Ngget Tul Pidnak Wene

Mbal Pem Nagawan-nen at ene lomboksa yoso nap makluk Yeskiel wene mbo ibidnak wene 2:1–3:15

¹ ”Nggweyakma nap, lak yoso wa-e. Men min-o. An-e kat kimin wene yimin-o” luk yak nirij-o.

² Nde, ene iri na kolosoma ereya na-net Mbal Pem Nagawan Indi-ge an narem nggosolar-e, nggwelsa mendak nibij-o. Iri luk, an-nen ene iri na-nen yosola kolosolar-e:

³ ”Nggweyakma nap, lak yoso wa-e. Kar-e an-nen Isarael nap inmin eyak worogolat wim mbarugwi nap ereba na endam wirik kubusu-o. It iri na onmborak nggal an nimin eyak wurugwi nap-net yili-o.

⁴ It iri-ge mondok eneyanggo lak, an-nen yidnak yidnak kwarugwi buk-net yili-o. Kar-e Nagawan Indo Mbal Pem Nagawan Mondok Kek tak an-nen kebem pimin wene iri yak ondonokluk, it endam wirik kubusu-o.

⁵ It iri-ge kuluwa, lak? Kuligit lak ma, lak? Yak nak undurag-o. Mbigija-ge Mbal Pem Nagawan ene lomboksa yoso nap nit nennggendumu worasu-o luk enaru yuwa iri nag-o.

⁶ Alat nde, nggweyakma nap, lak yoso wa-e. Kar-e it eneyanggo lak iri enaye kasolat, it-nen yak kuruwa wene iri na kwiye yosolat kwarurak pug-o. It-nen-e kat kimin wim mbarogola, enlengenma nggal tak kobogola-ge, kar-e kigaru eyak worak enggendumu woraidnak nggal-et woragun-o. Alat nde, wene eyak wurugwi ereba-ge kar-e enaye yurak pug-o.

⁷ Kar-e an-nen kebem pimin wene-ge oboksa yak undurag-o. It-nen-e kuluwa, lak, lag-a? Iri-ge it enpem-o. Yak nak undurag-o. Nde, it iri-nen wene eyak wurugwi-ge kar-e karu nar-o.

⁸ Nggweyakma nap, lak yoso wa-e. An-nen kat yak kirimin wene-ge kwara kuli-o. It-nen kwatli nggal an nimin eyak wururak pug-o. Kar-e kondokwak perarak puruk, an-nen wok kirimin mende nak min-o” luk yak nirij-o.

⁹ Iri yak norosola kuluruk-nen yik kaginggal-e ininggi misik an nambigit ndimirik kagi-o. Nde, inggem-e engga ket mbet nggitlik irit kagi-o.

¹⁰ Engga iri na-ge urugwe ombol irit mbarag-o. Nde, wisiridnggal-e, engga iri na arem-e yip tugwi min yane wurugwi min yane worogolat pabok pogolat-nen yugwi min ereba na engga iri na bem mbarak kagi-o.