YESKIEL 18 - Nanduk Ngget Tul Pidnak Wene

Ap ondomoktak-nen ”An-nen kwarimin pem-et nebem mbuwa-o” luk kwaluk kwarogolat wolmomtak wene 18:1-32

¹ Nagawan Indo-nen an yak norosolar-e:

² ”Noluk-nen nden karuk wene: ’Ineid iniya-nen anggut engen amak worak nonggola, inlirag-e eneyak olo yoso-o’ luk yugwi iri na-ge pempa kundugu kandugu Isarael wi yu me yik tenak worali-o?

³ Nagawan Indo Mondok Kek tak, nuruk nak woraso Mbal Pem Nagawan an worasu nowag-o. Nden karuk wene iri-ge Isarael wi yu me-ge tugurug-e mondok yik tenak wolma bug-o.

⁴ Ap oboksa inndi iri-ge an narengge-nen yusu-o. Ineid iniya inndi na irit, inlirak inndi na irit an narengge-nen yusu-o. Meya yoso nap iri-ge at iri na-t wat ma-o.

⁵ Konak nap misik worala-t nde, ndemeret mot mor-et kwarosolar-e,

⁶ Isarael nap unkugwiwak na erembel wanigit lak, kugwiwak erembel wanugwi sa-nen na kugwiwak amanggim pidnak ninggit lak yosolat, ap onkwe min na mbabi yigit lak yosolat, kwami poro worakmu inmin nene yigit lak yosolat,

⁷ ap enmberam na laso buk, ap enarengge na ndena wanoso buk, at isilobulo ap-nen namat wanogola, onggo pogola-nen wok undurak it enarengge at-nen tena buruk woraidnak ereba na wanigit lak wok ondosolat, ap nere woragola nunggwi mende mak ondosolat, ap unsum lak ala sum yirik onposolat,

⁸ arengge ap wok ondosolar-e: ’Tuguruk wok norogolar-e, siyak min nambena puruk wok nururag-o’ yoso buk nap, ar-e meya mondok kwaroso buk, yuk puk mbogola-ge, wene mot mor-et konosolat yoso nab-o.

⁹ Iri nggal kwaroso iri-ge an-nen ebem pidnak iri na bem-et woralat, an-nen imiri mbarak pidnak wene ereba na ndak ndag-et kwarosolat kwaroso iri perak ndemeret mot mot irit woralat uruk wolma-o. Mondok Nagawan Indo Kek tak an-nen yusu-o.

¹⁰ Alat nde, ap iri na nde ambara mbi woralat-nen nde ambara iri-nen nde ap enarengge ndena wanosolat, ap worosolat, iri-nen meya erep min-et

¹¹ at eid-nen kwaroso buk mende ereba na min-et kwarosolar-e, kugwiwak erembel wanugwi sa ereba na me-nen kugwiwak amanggim pidnak nasolat, ap onkwe inmin mbabi yosolat,

¹² insilobulo lak nap enmberam lasolat, enarengge ndena wanosolat, arengge namat wanidnak nap-nen arengge uwi yakola-t nde, it enarengge at tena woraidnak iri na tuguruk wok indigit lak yosolat, Mbal Pem Nagawan enaru buk nap unkugwiwak uwi ereba na me mbutluk, it unkugwiwak mondok meya unmunggum lera mboso mende ereba na erembel wanosolat,

¹³ at arengge luru ap wok ondosolar-e: ’Siyak nambena puruk wok nururag-o’ luk wok ondosolat yoso-o. Ap iri nggal kwaroso-ge uruk wolma-o luk perali-a? Mondok uruk wolma bug-o. At iri-ge mondok yi meya ndi meya ereba na nak kwat tenak wolmarik, wat ma iri-ge at-nen meya kwat tenak wolma ereba na-net ndowaga wat ma-o.

¹⁴ Nde, ap yi meya ndi meya nak kwat tenak woraso iri na ambara-nen nde at eid-nen yi meya ndi meya kwaroso ereba na-ge erengen-nen kasolar-et nde, at-nen nde eid-nen kwaroso ereba na nde kwarigit lak yosolar-e,

¹⁵ Isarael nap unkugwiwak erembel wanigit lak yosolat, kugwiwak erembel wanugwi sa-nen kugwiwak amanggim pidnak ninggit lak yosolat, ap onkwe inmin mondok nene yoso buk,

¹⁶ ap misiger-o luk anggun panggun tak onposo buk, enarengge ndena wanoso buk, arengge namat wanidnak nap-nen arengge uwi yakola-ge, it enarengge at tena woraidnak iri na tuguruk wok ondosolat, ap nere woragola nunggwi mende mak ondosolat unsum lak ala sum yirik onposolat,

¹⁷ ar-e meya mbi mondok kwaroso buk, arengge luru ap wok ondosolat: ’Nambena puruk wok nururag-o’ luk wok ondoso buk, ar-e an-nen imiri mbarak pidnak wene ereba na ndak ndak nak kwarosolat, an-nen ’Iri nggal kwarurag-o’ luk ebem pidnak wene ereba na bem-et woralat kwaroso me, la iri-ge at eid-nen meya kwaroso ereba na-nen ndowaga wat ma bug-o. Alat nde, mondok uruk irit wolma-o.

¹⁸ Alat nde, at eid-nen ap enmberam lasolat, ap enarengge ndena wanosolat iri-nen meya erep min-et kwarosolat woraso bem wat yid iri-ge at ondomok-nen meya kwarosolat woraidnak pem-et wat yij-o.

¹⁹ Alat nde, ap erep-nen kin wanogolar-e: ’Eid-nen meya kwaroso-t nde, noluk-nen ambara ebem-e angin worak mbigit lag-o?’ luk kin wanogola-ge, onggo yurag-e yu-o: Ambara iri-ge konak mot mot nak kwarosolar-e, an-nen ’Irit kwarurag-o’ luk yidnak ereba na tugup lak kwarosolat woraso bem-net mondok uruk wolma-o.

²⁰ Meya yoso nab-e war-et ma-o. Eid-nen meya yidnak pem-e ambara ebem angin worak mbuwa bug-o. Iri nggal-et ambara-nen meya yidnak pem-e eid ebem angin worak mbuwa bug-o. Konak nab-e at-nen konak nak kwarosolat woraidnak pem onggo-ge konag-et wanuwa-o. Nde, meya yugwi nab-e at-nen meya kwaridnak pem andi bandi kagolat wolma-o.

²¹ Nde, meya yoso nap-nen meya yoso keya buruk, an-nen imiri mbarak pidnak wene ndak ndak kwarosolat, ndemeret lud tak nak kwarosola-ge, war-e ma bug-o. Urug-et wolma-o.

²² At-nen meya kwaroso oboksa namberam tak posola, at-nen ndemeret mot mot kwaroso bem mondok uruk irit wolma-o.

²³ Kat kindi-nen-e Nagawan Indo Mondok Kek tak an-e meya yugwi nap wat yogola-ge, an nindingen kasu-o luk yebet kasu-a? Mondok lag-o! An nindi-nen yebet kasolar-e: ’It meya kwatli keya buruk, kondok yogola, unluk wolmak lag-et nde-o!’ luk perasu-o.

²⁴ Alat nde, konak nap misik-nen konak kwaroso iri na keya buruk, meya nggok lombok, meya kwarugwi nap-nen kwarugwi unmunggum lera mboso mende ereba na kwarosola-ge, at iri-ge uruk irit wolma-o luk perali-a? Mondok lag-o! Nanduk at-nen konak kwaroso ereba na-ge misiger-o luk nindi yeberak woramin pug-o. At iri-ge at-nen meya kwarosolat, tugup lak an-nen yidnak yidnak kwarigit lak yidnak pem-net wat ma-o.

²⁵ Alat nde, ap erep-nen yogolar-e: ’Nagawan Indo-nen kwarusu iri-ge mot mot kwarusu bug-o’ yili nde ma-o. Isarael nap wa-e. Kwara koler-o! An-nen kwarusu-ge lugud tak kwarusu-a? Kit-nen perak lugud tak kwarugwi-o.

²⁶ Nde, konak nak kwaroso-net nde, konak kwaroso iri na nggal kwarigit lak, meya kwaroso tel korosola-ge, at-nen meya kwaroso iri na bem-net mondok wat ma-o.

²⁷ Alat nde, meya kwaroso nap-nen nde meya kwaroso iri na keya buruk, ndemeret konak mot mot nak kwarosola-ge, ar-e wat ma bug-o.

²⁸ At iri-ge at-nen kwaroso ereba na ’An-e meya iri nggal kwaroso kagi’ luk, meya kwaroso keya buruk, kondok yidnak me, ar-e wat yigit lak, mondok uruk irit wolma-o.

²⁹ Isarael nap wa-e. Kit-nen yogolar-e: ’Nagawan Indo-nen kwarusu iri-ge lugud tak kwarusu-o’ luk yili-t nde, an-e lugud tak kwarusu-a? Mondok lag-o! Kit perak nde lugud tak kwatli-o” luk yij-o.

³⁰ Nagawan Indo Mondok Kek tak iri na-nen yosolar-e: ”Isarael nap wa-e. An-nen ap enpem wene mbarosolar-e, it-nen kwaridnak ndak ndag-et enpem mbarimin-o. Kit-nen meya kwarugwi iri keya buruk, kondok yer-o. Kit-nen meya kwarugwi ereba na-nen lak tak kunpuwakluk larok nak yurak pug-o.

³¹ Kit-nen meya kwarogolat woragwi iri keya buruk, kit kinndi min kit-nen yebet kagwi min ngget tak puruk wolmer-o. Noluk-nen kir-e wat yurak tula kore yili-o?

³² An-e ap misiger-o luk wat momtak iri-ge an-e mondok nisili-o. Kir-e mondok kunluk worali iri nggal-et worabokluk, kit-nen meya kwarugwi ereba-ge keya ber-o. Nagawan Indo Mondok Kek tak an-nen yak kundusu-o” luk yij-o. 19:1–32:32 Pasal ya arem-e Mbal Pem Nagawan ilirak enpem angin worak mende ereba na mburak wene min iri-nen o Yewura nggweyak eralu enlem nin nap worali ereba na enpem angin worak mende purak wene min-et mbarak worasu-o.