YESKIEL 1 - Nanduk Ngget Tul Pidnak Wene

Yeskiel Nagawan Mbal Pem Nagawan koreyak woraso ondoro 1:1-28

^1-3 Olengen tiga pulu iri arem waneya empat, tanggal lima iri-ge Yoyakin iri na mbo unpugwi sa ereba ibil mbirikma woralat olengen lima bem tak posoma-ge, Mbusi ambara tepan ombo Yeskiel an-e Yawuri nap erep mbo inpidnak ereba na inmin Mbabel iri me Yi Kebat eyak pem ereba woraige-o. Worakmu, mimo mbal tu kuwak yosolar-e, an-nen nabi nggal pem Mbal Pem Nagawan irit kagi-o. Nagawan Indo-nen an nimin wene yosola-ge, at amawi-ge an nebem mbosola kagi-o.

⁴ Iri yosola-nen nundugun pugaksa lik kaginggal-e nggan nggan nggok logom worak iri na arem-nen o binel-e yebek mbebek tenak worala kagi-o. Nggan nggan iri na inggi inggi-ge mbal-e eyaya abinal nggwerek tak kagi-o. Nde, o binel yebet tenak worasu iri na arem-e abinal-nen enlengen kip kip tak poso mende tembaga nggal mbi kagi-o.

⁵ Nde, nggan nggan iri na enggendumu-ge urugup worak mende (kerup) empat ap nggal irit kagi-o.

⁶ Alat nde, it oboksa-nen ondomok tag-et entare-ge empat worak, nde, insiyamu na empat worak irit kagi-o.

⁷ Unuwog-e mot leyok tak, nde, unuwok abis-e sapi amarik ijok abis nggal-o. Nde, unuwok iri-ge nggeret marak pidnak nggal abinal worag-o.

⁸ It entare empat min insiyamu empat min worala-t nde, ereb-e insiyamu ereba na indipma oboksa ininggi-ge kweyap ininggi nggal empat irit woragij-o.

⁹ Urugup worak mende empat ereya-ge unlugwe mboma mendak me, nin isiyamu abi-ge nin isiyamu abi min kwindik iri nggal kwasa woragola me, yik kasolar-e, urugup worak mende empat ereya-ge unggut empat worak mende nggal yik kagi-o. Nde, it nde mborogolar-e, it oboksa-nen nden na kagwi buk, mondok mot mot nak mburugwi-o.

¹⁰ It urugup worak empat ereya na ondomok tak entare empat empat ereya na-ge entare-ge misiger-e lag-o. Entare ereba abage-ge arik tik arik tag-o. Entare unlugwe nggwe-ge ap entare, nde, kigit ambigit nggwe iri na-ge singa erare, nde, kware ambigit iri na-ge sapi kusi erare, nde, entare onmbol nggwe iri na-ge towe ud erare irir-o.

¹¹ Nde, it ondomok tak insiyamu misik iri na ondok min-nen yambuk kagolat, abam nggwe pil lasola-ge, insiyamu abi-ge it erep ponok ponok ereya na insiyamu abi min kwindik woragij-o. Nde, ondomok tak insiyamu misik iri na ondok min-e enpe nggitlik woragij-o.

¹² Nde, it ondomok tak entare-nen yidnak yidnag-et abam nggwe, ena nggwe, abare ponok ponok ambigir-e unlugwe-ge woragid nag-o. Iri nggal me, it-nen nde mbururak peraruk mborogolar-e, nden kagwi bug-o. Unlugwe mot mot te-t mburugwi-o.

¹³ Nde, urugup worak ereya na ennggendumu-ge misik mende mbi yik kasolar-e, kan ngen kere rak nggal tal amare nggal mbi ndong yigit lak, muma nggal kwat tenak woragij-o. Kanduk iri na tinggi ringgi mbarosolar-e, tinggi ringgi ereba na arem-nen-e o binel yebek mbebek tenak worala kagi-o.

¹⁴ Nde, urugup worak ereba na-ge muma nggal ndag-et nak waring tenak worala kagi-o.

¹⁵ Ereba na oboksa an-nen kwara lombot posolat woralar-e, wukoma ijok (roda) nggal empat irit nggweyak pem kagi-o. Nde, wukoma ijok nggal misig-e urugup worak ereya na ondomok tak entalu kagi-o.

¹⁶ Wukoma ijok nggal empat ereya na-ge abage-ge misiget erep nak-nen abinal-e kerep abinal worak abinal nggal kagi-o. Nde, wukoma ijok nggal empat ereya na irit wosa abare bem-e wukoma ijok nggal mbi ebem kago worak nggal kagi-o.

¹⁷ Iri nggal kwarak me, wukoma ijok nggal ereba na-ge abam nggwe, ena nggwe, abare ponok ponok ereba na nggwe mborosola nag-et kagi-o.

¹⁸ Wukoma ijok nggal kago worak iri bem-e enlengen nak-nen kobong tak kagi-o.

^19-21 Nde, urugup worak ereya na it inndi-nen pidnak ereba na nggwe mborogola-ge, wukoma ijok nggal ereya na-ge urugup worak ereya na-nen tena me, it-nen yidnak yidnag-et inmin nak mborosolat woragij-o. Nde, pempa urugup worak ereya na teram nggwe lagola na irit, ndong yogola na irit kwarogola-ge, wukoma ijok nggal ereba na tet urugup worak ereya-nen yidnak yidnag-et kwarij-o.

²² Nde, urugup worak ereba na enanggul pem abam-e kil mol tak igip kip worak irit enanggul pem nenarak kagi-o.

²³ Enanggul pem nenarak worasu iri na indipma-ge urugup worak ereba na insiyamu misik iri na ondok min-e urugup worak erep inggi inggi ereba na ambigit insiyamu-ge wigak tak woraiga-o. Nde, insiyamu misik iri na ondok min-e enpe kura irit woraiga-o.

²⁴ Nde, it nde pu yogolar-e, insiyamu ene lumbag-e yi ugul ene lu nggal, san ombo kwarat mabunuruk mborogolat unuwok ene mbirip nggal, Mbal Pem Nagawan Mondok Amawi Worak iri na ene nggal kuligi-o. Nde, it nde pubu mbirigit lak, ndong yogolar-e, insiyamu ereba na-ge lambo rak pidnak nggwe-t nde,

²⁵ it enanggul pem nenasa pidnak iri na worosolat, insiyamu ene lumbak anggu ngga-ge kuligir-o.

²⁶ Nde, enanggul pem nenarak iri na bem-e kerep abinal worak loro bem-nen konidnak nagawan-nen koreyak woragwi ondoro nggal kagi-o. Iri na bem-e ap nggal misik koreyak kagi-o.

²⁷ Ap nggal iri na ubugulwak kuri-nen abam nggwe ambigir-e tembaga kan mabosoma wiril nggal abinal worag-o. Nde, ena nggwe-ge abinal-e eyaya kerek mberek tak kagi-o.

²⁸ Nde, erare-ge yelepma arare nggal nin tak nan tag-o. Nde, abinal iri-ge ”Mbal Pem Nagawan iri me worasu-o” luk yenggerak irir-o.