YESAYA 9 - Nanduk Ngget Tul Pidnak Wene

^1a Alat nde, o siri iri me-ge iri nggal nag-et pempa anggun panggun kerenak wolma bug-o.

Nagawan abok lobok yurak yidnak wene 9:1b-7

^1b O enlem Sebulon min Naptali min woragwi sa unuwi-ge Nagawan Indo-nen-e teberak ebe lak nggal yik kasolat woraso-t nde, abog-e o Yi Koma Nggok iri na bem-nen lidsa mberarik, mo luwaso (timur) ambigit Yareren eyak ele bem kuri, iri-nen nok mberarik, ap enlem nin nap woragwi sa Yi Nggalilea kuri iri-ge at-nen-e abog-e kek tak puwa-o.

² Ndamuk arem waring kaiga nap iri-ge yaya abinal worak kaiga-o. Nde, abu kan ndamak pem woraiga nab-e yaya elem iri na-nen yaya rak unpusu-o.

³ Nagawan Indo wa-e. Kat-nen enalin enalen elem nggok irit wok indigen-o. Kat-nen enalen tak posola, enalen-nen enne nggu lek kagolat worali-o. Kat-nen konak kwat onposo bem enalen kali-ge yagidnak mende ndakolat tarem enalen kagwi nggal, kugun pem wanidnak mende tomborogolat-nen enalen kagwi nggal irit enalen-e kagolat worali-o.

⁴ Kat-nen it-nen angin worak kud turuk nugwi ereba na nggosa keya bosolat, sum angin worak unndugun pem kud tugwi ereba na nggwirik posolat yigen-o. Kat kilirak enarengge ondoro rak pogolat, anggun panggun tak unpugwi nab-e kat-nen urugwe nggwe rak inpigen-o. Iri kwat inpigen iri-ge, nanduk Mirian nap urugwe nggwe rak inpigen iri na nggal-et kwat inpigen-o.

⁵ Nde, san ombo unuwok sum ene mbirip mbirip mbitli min unsum ap eneyabi-nen kobong tak ereba-ge ndag-et nak pagurak kumusuwe nde kwat ma-o.

⁶ Nit nenmanggim liap misik ndesa mbij-o. Ambara misik wok nindij-o. Ar-e nit tena nunpuruk woraso nap kwat ma-o. Nde, at unu yogolar-e: ”Nggomo Ondoso Nap Indi Nggat Nggat Worak”, ”Amawi Worak Mbal Pem Nagawan”, ”Nineid Pem Woraso”, ”Lambuk tak Onposo Nagawan” luk yuwa-o.

⁷ At-nen-e Ndaut-nen wigarak, at ondolma nagawan o tena wolma-o. Nde, at-nen tenaguwa wi-ge mondok terak mena irit tenaguwa-o. At-nen tenaguwa wi-ge konak yamuk tak irit wolma-o. At-nen tenagidnak wi-ge yawo-nen kuri pem irit woralar-e, ndemeret mot mot nak irit wolma-o. Nagawan Indo Mondok Amawi Worak iri-nen-e ndemeret mondok kwaruwar-o. 9:8–10:34 Pasal yeba arem-e Mbal Pem Nagawan-nen abare abam (utara) nggwe woragwi Isarael nap enpem angin worak pidnak wene iri na-ge abare ena (selatan) nggwe woragwi Yewura nap ereba na mirik unpuwakluk yak tidnak wene mbarak worasu-o. Alat nde, Mbal Pem Nagawan-nen at ilirak meya nak kwarugwi ereba na lel mberel unpuwakluk enlem Asiut nap ininggem pij-et nde, it Asiut iri na mondok lak tak unpurak wene na mbarak worasu-o.