YESAYA 8 - Nanduk Ngget Tul Pidnak Wene

Yesaya ambara Isarael nap-nen kudtak yenggerak purak mende kwat yidnak wene 8:1-4

¹ Nagawan Indo-nen an yak norosolar-e: ”Kar-e kerep abak nggok misik wanugundik, nam nggoksa-t mbarosolar-e: ’Ndag-et nak Mengga Wanugwi, Ndag-et nak Ndena Wanugwi’ irit mbari-o.

² Kat-nen mbarosola, enlengen-nen kudtak nap, ap-nen inndi enaru nap mberen tepan ombo Uria min Yeberekya ambara Sakaria min irit wene mbo inpi-o” luk yak nirij-o.

³ Siyak worarug-e, an nogwe na-ge abila yij-o. Nde, nenla iri ndesa mbosola-ge, Nagawan Indo-nen an yak norosolar-e: ”At unu yarosolar-e: ’Ndag-et nak Mengga Wanugwi, Ndag-et nak Ndena Wanugwi’ irit yari-o.

⁴ La iri awo nggok luk, ’Neid wa-e. Niya wa-e’ yoso wok yigit lak ma-ge Ndamsik-nen yidnak yi mende ndi mende oboksa min Samaria-nen kugun pem wanidnak silobulo oboksa min ereba na-ge Asiut nagawan iri na eram mburunuruk mburuwa-o” luk yij-o.

Asiut nagawan iri na lobok yurak wene 8:5-10

⁵ Tuguruk Nagawan Indo-nen an nimin wene yosolat-nen yosolar-e:

⁶ ”It ap enlem yu-ge yi waru ene lak nabu nabu mburusu Siloa iri na-ge keya buruk, Nagawan Eresin min Nagawan Peka min nde inndingen tak inpili-o.

⁷ Iri kwatli iri bem-e Nagawan Indo an-nen-e Asiut nagawan min at-nen idnak esan ombo inmin inpil lobok yumu, Yewura nab-e enpem kore yuwa-o. It iri-ge Yi Eperat-nen ebe wasolat ogorak yebet yusu iri na nggal kobong yil lobok yogolar-e,

⁸ Yewura nab-e yemen unpuwa-o. Iri yosolar-e, yi-ge inilusuwak kuri irit yosolar-e, yi mende ndi mende oboksa yumnduwa-o” luk yij-o. Mbal Pem Nagawan-e nit ninmin worasu-o! At isiyamu-nen wigaktak puruk, nit nunuwi siri-ge yemndak ninmiri mbarak irit wolma-o.

⁹ Ap enlem oboksa wa-e. Kwiye min-et ndok werer-o! O kuri ap kuri woragwi nap wa-e. Kwara koler-o! Wim nggurak lid lud tak pogolar-et nde, kinndi-ge ndorosola-net kwarer-o! Ye, lid lud tak pogolar-et nde, kinndi-ge kwiye min-et kwarer-o!

¹⁰ ”Iri nggal kwaruwog-o” luk, wene mbarer-o! Alat nde, iri-ge oboksa ebe kwat ma bug-o. Mbal Pem Nagawan-e nit ninmin worala me, kit-nen wene nggaruk tak pugub-et nde, meya ebe lak nde ma-o.

Nagawan Indo-nen abuwokma Yesaya nggomo wiridnak wene 8:11-15

¹¹ Nagawan Indo amawi an nebem mbosolat-nen an-e it ap enlem iri-nen mbitli tula iri nggwe mburuwa naru nggomo norosolat-nen yosolar-e:

¹² ”It-nen meya kwarurak pem wene mbaruwokluk ndok witli iri-ge kar-e inmin ndok wururak pug-o. Nde, it-nen kwiye yili iri na-ge kat-nen na iri na kwiye yurak pug-o.

¹³ Kat-nen an neberasolar-e: ’Ar-e Nagawan Indo Mondok Amawi Worak, mondok marak-nen yusu-o’ luk yebet neyasolar-e, mondok an nak naye kasolat wolmin-o.

¹⁴ An-e mondok marak woraso iri-nen ndowaga an-e Yewura nap min Isarael nap min unuwok abis pijaksa mbud yurak kerep nde kwat yosolat, Yerusalem woragwi nap enmanggim enare burak nde kwasa labuk yusu-o.

¹⁵ Ap kwarat-nen unuwok abis pijaksa mbud yogolat, mep tak onposolat, kere ma ngonok yogolat kwaruwa-o” luk yij-o.

Kugwi tu mbarugwi endam mbururak pug-o yidnak wene 8:16-20

¹⁶ Kit an-nen mul kondoso nilirak-nen-e Mbal Pem Nagawan-nen kwarurak nebem pidnak wene ereba-ge kwara puksa tena wolmomtag-o.

¹⁷ Nagawan Indo-ge at ilirak Yakup-nen wigarak iri na-nen at kujwa naru ombol wok endarik worasu-o. Alat nde, an-e ebem-et nindi wat tak puruk, mbung mbung tak worasu-o.

¹⁸ An min Nagawan Indo-nen wok niridnak nilirak yeba min-e Nagawan Indo Mondok Amawi Worak Sion Ndobo bem-nen iri bem-nen o tena worasu iri na-nen kit Isarael nap-nen yenggerak pobokluk wirik nenpamu-o.

¹⁹ Alat nde, ap-nen kit yak kondogolar-e: ”Kugwi tu mbarugwi endam mburugupndik, yagap yagap wene mbarogolat enemnde lumuk lumuk pem yugwi ereba na endam mburugupndik, tu mirik kunpuwakluk kin wok enper-o” luk yak kunduwa-o. It iri-nen yak kondogolar-e: ”Nit-nen-e ap unluk worali enmanggim kugwi tu mbarugwi min ap wat yidnak ereba na muk iniyudtag-e ndag-a?” luk yak kunduwa-o.

²⁰ Yogola, kat-nen it yak ondosolar-e: ”Nagawan Indo-nen yidnak yu kwara koler-o! Ap nde Nagawan Indo-nen yidnak wene iri na ndak ndak nde yigit lak yuwa nab-e abog-e wolma bug-o” luk yak indi-o.

Anggun panggun nak kagolat wolmomtak tarem wene 8:21–9:1a

²¹ It ereba-ge anggun panggun arem woragolat, nere-nen o siri iri na me nggilarak mbu nogolat wolma-o. Iri yogolar-e, nere-nen ndowaga insilepma na yogolat, it-nen idnak nagawan min Enmbal Pem Nagawan min-e inmbiri lamut wene enpem puwa-o. It enlengen-e mbal nggwe lik kagolat,

²² nggweyak nggwe mbel kagolat yuwa-t nde, nin nan ereba-ge yik kujwa bug-o. Are, anggun panggun kagwi mende min ndamuk nak worawi mende min lumu kumu rak onposo mende min nak inmbiriwak pem wolma-o. Ir-e anggun panggun irit kerenak wolma-o.