YESAYA 7 - Nanduk Ngget Tul Pidnak Wene

Nagawan Agas-nen kwaruwakluk Nagawan Indo-nen wene wosa bidnak wene 7:1-9

¹ Nagawan Agas iri-ge Usia-nen ndagid Yotam iri na ambara-o. Nde, at Nagawan Agas iri Yewura nap ennggendumu nagawan worala tarem-e it ennggendumu wim ngak yosolar-e, Siria nagawan Eresin min Isarael nagawan Peka na-ge Eremalya ambara iri na min lambuksa lobok yogolar-e, Yerusalem enpem kore yiga-t nde, o Yerusalem iri na-ge wanurak meya yij-o.

² Nde, Yewura nagawan iri na-nen kulidnggal-e, ”Siria nap san ombo-ge Isarael nap inmin lambuk yil ngguwagolat, Isarael nap enma worali-o” yogola kulurug-e, nagawan iri na min at-nen tenagidnak wi woragwi nap inmin-e kwiye kwarat yogolar-e, o wija-nen e sil kasola, lele yoso nggal yot kot mbiga-o.

³ Nagawan Indo-nen Yesaya yak tosolar-e: ”Kar-e kambara Seat Yasup imin luk mburugundik, Nagawan Agas imin lambuk min-o. Nde, nagawan iri-ge yi emnde mbaridnak iri na mboroso pud erep pem sum yakwi sa iri me kagun-o.

⁴ Nde, kat-nen-e yu nggal yak ti-o: ’Kar-e kwiye yilik, kindi kabak yilik iri-ge yurak pug-o.’ Nagawan Peka min Nagawan Eresin min at-nen idnak esan ombo Siria nap inmin-nen insilepma yili iri-ge kan ondom ndom mberen kule lasolat woraso iri nggal me, it iri-nen kunduwa-ge lag-o.

⁵ Nde, Siria nap-nen-e Isarael nap min it-nen idnak nagawan min inmin kundurak wene mbariga-o.

⁶ It-nen-e Yewura bem mbud yogolar-e, iri me woragwi nab-e mondok kwiye rak onpogola, it oboksa it enambigit yogola-ge, Tabel ambara iri na nagawan mendak purag-o luk wene mbariga-o.

⁷ Alat nde, Nagawan Indo an-nen nam-et yak kereyeg-o. Iri yili-t nde, iri-ge mondok kwat ma bug-o.

⁸ Nde, Siria iri na amawi-ge uwi siri iminepma Ndamsik amawi ombol nggwe-nen yusu-ge lag-o. Nde, Ndamsik iri na amawi-ge Eresin amawi ombol nggwe-nen yusu-ge lag-o. Nde, Isarael iri-ge olengen enam pulu lima (65) ereya bem woragolar-e, Isarael iri-ge enarik tak nggilarak mbu ndi yogolat, ap enlem misik il kwasa wolma-ge mondok lag-o.

⁹ Nde, Isarael iri na amawi-ge uwi siri iminepma Samaria amawi ombol nggwe-nen yusu-ge lag-o. Nde, Samaria iri na amawi-ge it ennggendumu Nagawan Peka amawi ombol nggwe-nen yusu-ge lag-o. Kit-nen nde ndemeret kinndi an nebem wat tak woragit lak yugup pem-e mondok pak pugup pug-o” luk yij-o.

Imanuel wok undurak urul pidnak wene 7:10-25

¹⁰ Nagawan Indo-net Nagawan Agas amanggim wene erep wosa bosolar-e:

¹¹ ”Kat-nen Nagawan Indo Kembal Pem Nagawan nggi yak tosolar-e, ap watluk ndok wiril mbugwi sa ena nggwe woraso mende bem ala na, mbal pem teram nggwe woraso mende bem ala na, kat-nen yenggerak wolmomtak pem mirik kubuwakluk, Nagawan Indo nggi yak ti-o” luk wene wosa bij-o.

¹² Yosoloma, Agas-nen onggo yosolar-e: ”An-e yenggerak purak mende-ge mondok nggi yimin pug-o. An-e Nagawan Indo indi ngarurak iri-ge mondok nimbir-o” luk yij-o.

¹³ Iri yosoloma, Mbal Pem Nagawan ene lomboksa yoso nap Yesaya-nen yosolar-e: ”Iri ala-ge, Nagawan Ndaut-nen wigarak wa-e. Kwara koler-o! Kir-e ki nap-nen mamak puruk woragwi iri na inndi ngatli-ge te rak puruk, Nembal Pem Nagawan-nen mamak puruk woraso iri na min-et indi ngatli-a?

¹⁴ Yawo-ge Nagawan Indo ondomok-nen kit-nen yenggerak purak mirik Konposolar-e: kwe ndugum abila misik-nen liap misik ndaguruk, unu-ge Imanuel yaruwa-o.

¹⁵ Nde, la iri na nggok luk, at ondomok-nen ’Iri nggal kwareyeg-o’ luk yebet kaso bem-e o siri iri me-ge yi mende ndi mende mondok emben mburuwa-o.

¹⁶ Iri nggal kwat yigit lak worala-ge, kat-nen enaye kasu nagawan mberen ereya na-nen tena worali unuwi ereya-ge o nak kugun ngguma-o.

¹⁷ Nanduk Isarael min Yewura min ngara mberen yogolat-nen anggun panggun kerenak woraiga kuri-nen yawo kuri-nen kagolat worali-ge te-t nde, Nagawan Indo-nen-e Asiut nagawan iri na pil lobok yuwama, kat min kowe kowot min kat kuwokma woragwi nap min-e o nda yidnak irit wosa mondok anggun panggun kwiye worak kagolat woragup iri-ge terak minik-net yusu-o.

^18-19 Iri tarem-e Nagawan Indo-nen Mesira nap min Asiut nap min yonggo unpuwa-o. Iri yosola-ge, ap enlem mberen iri-ge mirabon nggal, ngin ija ndelak nggal irit lobok yogolar-e, nggorok kobok arem min kerep uru arem min ereba na me irige lak yosolat, egere isile worak pem-nen na tusuangge bem-nen na utlud puwa-o.

²⁰ Nagawan Indo-nen Asiut nagawan iri na ’Kwari-o’ luk ebem puwama, Isarael nap kwat onposolar-e, enanggulsu mbarugwi nap-nen enanggulsu mbereksa mbarugwi nggal it enanggulsu pena lak tak posolat, unsum min nggwara lak tak posolat ma-o.

²¹ Nde, iri kwat unpuwa tarem-e ap-nen wam parugu woragolar-e, sapi wam marik misik min kambing wam mberen min nak parugu wolma

²² ereba na agamo amburu-ge o siri iri me keya inpidnak nap marig-et ereba na-nen-e mondok ndak inmbitsa nonggolat wolma-o. Nde, it minggirik marig-et keya unpuwa ereba-nen-e wam agamo amburu min tamuk amburu min-e ndak nonggolat wolma-o.

²³ Nde, ereya tarem-e anggut yabu oboksa-nen yabu misik me-ge anggut ari-ge seribu ya worala, onggo pogolat na perak tol seribu pili ereba na-ge ondolma-ge isile worak linggat nak yak ma-o.

²⁴ Ap nde o yanem iri me mborogolar-e, o iri me oboksa-ge isile worak egere yidnak me, san min mare min-et waruk mburuwa-o.

²⁵ O ndobo worak nggwe yabu wanuruk yagili ereba na tet isile worak linggat nak yak yidnak me, ap ereba na me mburuwa bug-o. Nggweyak iri me-ge tusuangge nak mburuwama, sapi min lomba min tusuangge naso ondoro nde kwat ma-o” luk yij-o.