YESAYA 66 - Nanduk Ngget Tul Pidnak Wene

Nagawan Indo-nen ap oboksa enpem wene mbenaruwa wene 66:1-24

¹ Nagawan Indo-nen yosolar-e: ”Mbal iri-ge an koreyak woraso nondoro-nen yusu-o. Nde, nggweyag-e an nuwok poso ondoro-nen yusu-o. Iri ala karug-e, an namanggim-e o-ge ngge kwarak nggal wurugun-o? An wolmomtak nondoro-ge no nggal wurugun-o?

² O yu-ge an ninggi-nen posola-net o yu oboksa kwat yamu-o. Alat nde, an-nen ukwe peraso-ge ap inndi teberak woragolat, it-nen meya kwarugwi iri na bem ’Niri nera-nen kwarigi-o’ luk kondok yogolat, an naye kagolat, an-nen yidnak yidnak kwarugwi iri nak nindingen-o.

³ Alat nde, it enlem iri-ge it inndi-nen pidnak nak kwarogolat, ir-e enalen pem an nerembel wanogolar-e, meya unmunggum pil kagwi mende bem ereba na kwatli-o. It-nen meya min konak min lambuk tak nak yik kagolar-e: sapi kusi nde wosa bogolat, ap nde wosa bogolat; lomba amarik nde wosa bogolat, yengge nde undungunwak tenggesa bogolat; nggandum mbato nde Mbal Pem Nagawan amanggim pogolat, wam eyabi nde kan pogolat; emben konak mende kemenan nde kan pogolat, kugwiwak ut memera ndak wiridnak ereba na nde erembel wanogolat kwatli-o.

⁴ Iri bem-e, an-nen na an nindi-n pidnak kwarosolar-e, lak tak onposo mende it-nen kwiye kagwi irit it enpem mberak pil mbuwamin-o. Nde, iri kwarimin iri-ge, an-nen wene mbo onposola-t nde, misik-nen mbi onggo yigit lak yogolat, an-nen it wene yak ondosola-t nde, misik mbi-nen nene kuligit lak, it iri-ge an nimin wim mbarurak nak indingen yogolat, meya nak kwatli iri bem-nen kwat inpimin-o” luk yij-o.

⁵ Kit Nagawan Indo aye worak woragolat, at-nen yidnak yidnak kwatli nap wa-e. Nagawan Indo-nen yak kundusu wene kwara koler-o. At-nen yosolar-e: ”Kit-nen an-nen yidnak yidnak tugup lak kwarogolat worali bem-e, kit kenlem nap ennggendumu ap erep-nen-e insili rak konpogolat, kit kinmin kundurak insili yili-o. It-nen pesel konpogolat-nen yogolar-e: ’Kit-nen kenalen kagola, nit kujwok-nen Nagawan Indo-nen at-nen kek tak woraso iri na mirik nunpuwag-o’ luk yili-o. Alat nde, it ondomok nde innggiri ma-o.

⁶ Kwara koler-o! O silmu-nen ene o nggu nggal yusu-o. An nama-nen ene yusu-o. Iri-ge an-nen nuwim nap kemnggo onposolat-nen an nene-o!

⁷ An-nen idnak o siri marak iri-ge kweyap-nen onmbol yemet kagit lak ma li ndakwi nggal, yane wirigit lak-nen li ap ndakwi iri nggal-nen yusu-o.

⁸ Iri nggal kwasa ndakwi wene-ge ta-nen koloso-o? Iri nggal kwat yosola-ge, ta-nen kagaij-o? Alat nde, Sion-e nggeret la yane wereyekluk ombol yemet kasoma, enlem Isarael nab-e ndesa mbij-o.

⁹ Kit-nen an neberagolar-e, an-nen-e nilirag-e wok unpuruk mbirimindik, it ndet unpurak tarem iri na me inpil mbirimin-et nde, nder-e unpuwa bug-o luk yebet kudtak pug-o” yuruk, Nagawan Indo-nen yij-o.

¹⁰ O siri iri na abuwa kagwi nap oboksa wa-e. Yerusalem min-et kenalin kenalen mber-o. At abuwa-nen kinndi puru rak woragwi oboksa wa-e. Yawo-ge at min-et kenalin kenalen yer-o.

¹¹ Li marik-nen iniyarak enkamo nunggwi nggal, at ebem woraso ibinil ombomo nonggolat mondok ndak woragub-o.

¹² Nagawan Indo-nen yosolar-e: ”Yi mborosolat nak worasu iri na nggal yamuksa woragwi elem-e wok kindimin-o. Nde, yi nap ndi nap insilobulo-ge, yi ulusu nggal kundik kat keram waruk lobok yogolat wolma-o. Kir-e li marik kamo nunggwi iniyarak-nen yaruk unpuruk nugwi nggal, ena bem kogo wat kenperenak wolma-o.

¹³ Iniyarak-nen inlirak yongwen unpugwi nggal, kir-e Yerusalem-nen yongwen kinpimin-o.

¹⁴ Iri kwat konposola karug-e, kir-e kenalin kenalen kagolar-e, kir-e tusuangge ngget laso nggal kenpem posok yosolat, kenmawi yugub-o. Nde, an ndegel nubugwi nab-e an namawi-ge enaru yogolat, nde, an nuwim nap na an nisilepma-ge enpem mbosola, enaru ma-o” luk yij-o.

¹⁵ Nde, Nagawan Indo-ge ndemeret at isilepma-ge kanduk min wijakni min nggal irit lobok yosolar-e, at-nen isilepma enpem pidnak nap enpem nggilarak posolat, mondok amawi min enpem mbud ma-o.

¹⁶ Nde, ap oboksa-nen meya yogola eneyarug-e, onggo-ge kanduk pem kabo bem-nen lak tak unpuwa-o. Nde, unduwa-ge kwarat nde wat ma-o.

¹⁷ Nagawan Indo-nen yosolar-e: ”Ap pidsa-nen kugwiwak erembel wanuwokluk, mat koraruk, kugwiwak woraso sa eyapmu ereba nggwid nggwid mburugwi nab-e wam uno min wuningga min ondok angin yoso mende min nunggwi nap inmin-et mondok lak tak unpuwa-o.

¹⁸ An-e it-nen yebet kagwi min it-nen kwarugwi min-e mondok naru-o. An lobok yosolar-e, yi nap ndi nap enggep lombok-nen ndok worak enpeyekluk lobok yimin-o. It-nen ndok worogolat tarem-e an namawi-ge enlengen kujwa-o.

¹⁹ Nde, an-nen-e yenggerak purak mende mbi it ennggendumu pimin-o. It ennggendumu enpe marig-et nggal-e inmiri yimin-o. Nde, it iri-ge yi nap ndi nap enlem o erepma worali, an nobok na kulugwi buk, an-nen kek tak woraso na kulugwi buk, an namawi na kagwi buk ereba ennggendumu wirik onposolar-e: Tarisis wirik onposolat, Libia wirik onposolat, nde, Liria wirik onposolar-e, ap ininggi mbuk lembe min-et wirik inpimin-o. Tubal nggwe wirik onposolat, Yunani nggwe wirik onposolat kwarimin-o. Iri yumu-ge it-nen-e an nobog-e it enlem ereba ennggendumu wigaruwa-o.

²⁰ Nde, o it mburuwa sa ereba-nen-e kit kanggamirak kenlem misiget Nagawan Indo an namanggim we wok niril lobok yuwa-o. It-nen ap ereba na waruk an nondobo marak Yerusalem iri na me waruk lobok yogolar-e, kura wam min kelerai wam min unta wam min ombol pem koreyak unpuruk, nggweyak koma ereba na bem unpuruk, Isarael nap-nen pempa nggandum mbato Mbal Pem Nagawan amanggim purak at ama waruk mborogolat ondoro konak pem puruk, waruk mburugwi nggal-et wok unpuruk lobok yuwa-o.

²¹ Nde, it ereba na ennggendumu ereb-e tepan ombo rak onposolat, Lewi nap tak onposolat kwat inpimin-o.

²² Mbal min nggweyak min ngget ndak worak pidnak an namawi-nen kondok tak puruk wolma iri nggal-et, kit-nen wigarak min kit kunnu min-e pem irit wolma-o.

²³ Pempa waneya ngget nam yosola min we woragwi tarem min-e nggweyak ma nap oboksa-nen an nerembel wanurak pempa Yerusalem lobok yogolat wolma-o” luk Nagawan Indo-nen yij-o.

²⁴ ”Nde, it mburukmu-ge, ap an nimin eyak wat tenak woragwi-ge worak iniyujwa-o. Ubugwe it nok unpuwa ereba na-ge mondok war-e ma bug-o. It kan unpuwa kandug-e mondok nigi yuwa bug-o. Ap oboksa-nen iri yik kagolar-e, mondok kwiye-nen unmunggum linggi yogolat wolma-o” luk yij-o.