YESAYA 65 - Nanduk Ngget Tul Pidnak Wene

Mbal Pem Nagawan at imin eyak wurugwi nap angin worak enpem purak wene 65:1-16

¹ Nagawan Indo-nen yosolar-e: ”An-e enne erep nggarurak abu lid lud tak pigirik worala-t nde, an nilirag-e an neram tepan yigit lag-o. An-e it-nen nimin lambuk yurak lid lud tak pigirik worala-t nde, ir-e an nogore yigit lag-o. An-nen-e enne erep nggarosolar-e: ’An-e yu-o’ luk lid lud tak woragi-t nde, it ap enlem yu-ge an wene mbo nibigit lag-o.

² An-e pempa nilirak wok unpurak iri-ge lud tak purak woraso-t nde, ir-e an nimin eyak nak worogolat, meya nak kwarogolat, ondomok inndi-nen pidnak nak kwarugwi-o.

³ It iri-ge kugwiwak amanggim wam wosa yapmu nggwe ereba na kan pil nogolat, emben konak mende kemenan iri-ge wam kan pugwi sa kan pogolat, iri nggal kwat tenak woragolar-e, pempa an nisilepma rak pogolat worali-o.

⁴ It iri-ge kubu-ge kerep yanggo yanggo ereba na me mborogolat, ap yapma inpidnak sa mborogolar-e, ap wat yidnak enngena ereba enpem it-nen kwarurak wene kin wanogolat, wam uno nonggolat, it-nen norak puk wosama ereba na sagidnak amburu nonggolat kwarogolar-et nde,

⁵ it-nen ap yak ondogolar-e: ’Nir-e mondok marak nenarik lenag-et me, kit kinmin nit nenpem purak pug-o. Ndak mboksa mberer-o’ luk yili-o. It-nen iri kwatli iri kasolar-e, mondok mamak purag-e meya yusu-o. An nisilepma-ge nigi yoso buk kanduk nggal mondok enpem puruk worasu-o.

⁶ It-nen kwatli bem angin worak enpem purag-e abu lud tak pigirik, engga mbarak worasu-o. Ndemeret an-e mondok larok yimin pug-o. It-nen meya kwatli-ge mondok onggo-t pimin-o.

⁷ An-nen onggo pimin iri-ge it min onmborak min-nen meya kwarugwi bem-et onggo wok indimin-o. It-nen enlengenma nggal tak nobogolar-e, kemenan emben konak worak iri na-ge kugwiwak amanggim, kugwiwak erembel wanugwi sa ndobo bem ereba na me kan pugwi-o. An-nen onggo posolar-e, it nanduk-nen kwarogolat woragwi ndak ndag-et wok indimin-o” luk yij-o.

⁸ Nagawan Indo-nen yosolar-e: ”Anggut engen konak nde worala-ge, mbo bugwi bug-o. Are, mbela amburu wanugwi-o. Iri nggal-et an nilirak ereba ennggendumu-ge an ndegel nubugwi-t woragola me, an nelem nab-e oboksa lak tak inpimin pug-o.

⁹ Isarael nap ennggendumu enlem Yewura nab-e an-nen imbiringgat tak inpimin-o. Nde, it-nen wigarag-e an-nen idnak nggweyak ndobo worak ereba na nggwe winde ma-o. An-nen lenak inpidnak nap, ndegel nubugwi nab-e iri me-t wolma-o.

¹⁰ It an nilirak iri-nen-e an kek tak nobogolat wolma-o. Nde, it ensapi min onlomba min-e o Saron min Akot min mbirik ereba me tusuangge tarosolat wolma-o.

¹¹ Alat nde, ap an keya nobogolat, an nondobo marak Sion iri na no mende nggal yik kagolat, it-nen unluk wolmomtak lesa wok unduwakluk unkugwiwak Nggat min Meni min erembel wanogolat kwarugwi nab-e it an nilirak wolma iri nggal-e wolma bug-o.

¹² Kir-e an-nen wene mbo konposola-ge, nene erep nggarigit lak yogolat, an-nen wene yak kondosola-ge, nene kuligit lak yogolat kwarugwi me, kit oboksa-nen mondok insilepma kundugu mondok kondogolat, lak tak kunpuwa-o. Kir-e an nene tarak puruk, meya kwarurak nak nggok tak pigeb-o.

¹³ An nerembel wanili nab-e nonggola-t nde, kir-e mondok ndemeret nere irit woragub-o. Yi na ir-e nujwa-t nde, kir-e yi nere irit woragub-o. Ir-e enalen yuwa-t nde, kir-e kinnggiri nde kagub-o.

¹⁴ Ndemeret ir-e enalen-nen kek kok lek kujwa-t nde, kir-e yip nggu lek tenak woragub-o.

¹⁵ An-nen len inpidnak nap-nen-e ap inmbiri lamut tak onpogolat, kit kunnu min ndak worogolar-e: ’Nagawan Indo Mondok Kek tak iri na-nen kir-e it indid iri na nggal kunduwag-o’ luk yogolat wolma-o. Alat nde, ap an-nen yidnak yidnak kwatli nab-e unnu ngget yarimin-o.

¹⁶ O iri me woragwi-nen ta-nen nde imbiringgat tak puwakluk nggi yuwa nap-nen-e tugup lag-et kwaroso Mbal Pem Nagawan iri na-nen imbiringgat tak ubuwakluk nggi yuwa-o. Ta-nen nde owak mbarosolar-e, tugup lak kwaroso Mbal Pem Nagawan iri na unu luk, owak mbaruwa-o. Iri kwaruwa iri-ge nanduk-nen andi bandi kagwi iri na-ge lak tak puruk, meme rak pidnak iri bem-nen kwaruwa-o” luk yij-o.

O ngget ndak worak purak wene 65:17-25

¹⁷ Nagawan Indo-nen yosolar-e: ”An-nen-e mbal min nggweyak min-e ngget ndak wosa pimin-o. Nanduk-nen kwarugwi mende ereba-ge meme rak puruk, mondok yebet kujwa bug-o.

¹⁸ An-nen ngget ndak worak pimin iri bem-e kir-e kenalin kenalen kagolat, pempa kijik kijak worogolat wolmer-o. An-nen Yerusalem ngget ndak worak posolar-e, enalen pem wolmomtak elem kobong tak ndak worak pumu, iri me wolma nab-e enalin enalen pem irit wolma-o.

¹⁹ An-nen na Yerusalem ebem-nen na iri me wolma nap enpem-nen na nalen kasolat woramin-o. Nde, o siri iri me-ge yip tugwi na lak, yongga unduwakluk nggi yugwi na lak irit wolma-o.

²⁰ Iri me-ge li marik pem wat yugwi na lak irit wolma-o. Nde, indi worag-e unluk mot pem-et wolma-o. Ap olengen seratus wolma-t nde, unsujwe nggal irit wolma-o. Nde, iri nggal woragit lak ma wat ma iri-ge ap-nen peragolar-e: ’Nagawan Indo-nen angin worak ebem pamu-o’ luk yuwa-o.

^21-22 Ap-nen it unuwi wutlug-e, o iri na me-ge pem it iri na nag-et wolma-o. Nde, it unuwi iri na me-ge nin nab-e wolma bug-o. It-nen-e anggut uwi yagurug-e, it iri na-net anggut amburu nonggolat wolma-o. Nde, it ondolma nin nap-nen-e nujwa bug-o. An nilirak iri-ge unluk mot pem woragolar-e, it-nen inligak mbidnak ereba na ebe nonggolat irit wolma-o.

²³ It-nen kwaruwa oboksa-ge ebe worak nak kwat yosolat wolma-o. Nde, it inlirag-e mimo wat momtak elem-e enpem mbuwa bug-o. It min it-nen wigarak min-e pem irit imbiringgat tak onposolat woramin-o.

²⁴ It-nen an neram tepan yogolat awo yak nirigit lak ma, an-e onggo yosolat, tepan woroksa yigit lak ma-net an-nen-e it enne erep nggarimin-o.

²⁵ Isilepma worak serigala ndakngge-t nde, lomba amarik min-e lambuksa tusuangge tarogolat wolma-o. Singa ndakngge-t nde, sapi nggal nggandum ariwak taruwa-o. Waro eyak worag-et nde, eyak lak ma-o. Nde, nondobo marak ereba oboksa bem-e ap meya rak unpugwi elem min meya kwarugwi elem min-e wolma bug-o” luk yij-o.