YESAYA 64 - Nanduk Ngget Tul Pidnak Wene

¹ Nagawan Indo wa-e. Mbal-e tugwara keya buruk, mbuwasug-o. Kat keram-nen ndobo ereba-ge yuk yamok tak posolar-e,

² kanduk-nen kan nirik pidnak pagosola, yi embem tak posola, yok mbok mboso nggal tak pi-o. Kat kamawi-ge kat kuwim nap inmbiri bem nam tak pi-o. Iri kwarosola, ap enlem oboksa-nen kar-e kaye kagolat wolmag-o.

³ Kat-nen-e nit-nen ”Kwaruwa-o” luk peragit lak ma, mondok kwiye worak mende-ge kwarigenma-o. Kat mbuwasolar-e, kat keram-e ndobo ereba-ge yuk yamok mbij-o.

⁴ Mbal pem nagawan misik mbi-nen kat-nen kwaroso nggal ap ebem inndi mbung mbung tak woragwi nap yongga indidnak wene-ge ap erep-nen na kologolat, ap erep-nen na kagolat mbi mondok kwarigit lag-o.

⁵ Kar-e ap mot mot nak kwarugwi nap min kat kindi-nen pidnak ndak ndak kwat tenak worali nap min wok onposo-o. Kat kisilepma-ge nenpem posolat woraso-t nde, nir-e meya kwat tenak woraige-o. Nir-e nanduk ereba-net lugud tak nak kwarugwi-o.

⁶ Nit oboksa-ge kopkap tobok tak woragwi-o. Iri-nen nit-nen konak kwarugwi min-et kopkap tobok tak mondok meya-nen yusu-o. Nir-e engga lera mbidnak umbuk o wija-nen puk kuruk mburusu iri na nggal, nir-e meya kwarugwi bem-et lak mul-o.

⁷ Nit-nen meya kwarugwi iri na-nen lak tak nunpuwakluk, neneyamin naru kombol wok nondosolat yigen iri bem-e ap misiger-o luk-nen keram tepan yogolat, ”Yongga nindi-o” luk kemengen mbarogolat mondok kwarugwi bug-o.

⁸ Alat nde, Nagawan Indo wa-e. Kar-e nit nineid-net yusu-o. Nir-e mimi nggweyag-et nde, kat-nen kwarak ninpidnak-nen yusu-o. Nit oboksa-ge kat kinggi-nen kwarak ninpidnak-nen yusu-o.

⁹ Iri bem-e, Nagawan Indo wa-e. Kat kisilepma kwarat nunpurak pug-o. Iri-nen nit-nen meya kwarugwi-ge pempa yebet yebet tak wolmomtak pug-o. Yik niniyi-o. Nir-e kat kilirak-nen yusu-o.

¹⁰ Kat kuwi siri marak ereba na-ge nembaga nggal kwat yosolat, nde, Yerusalem-e nembaga umbuk pem nggal kwat yosolat, ap tu po kwat yij-o.

¹¹ Mbal Pem Nagawan kuwi marak abinal worak, nit nonmborak-nen kat kerembel wanugwi uwi iri na-ge kan-nen nuruk, lak tak pij-o. Nunuwi ninndi kundik ereba na-ge oboksa tud yil lobok yij-o.

¹² Nagawan Indo wa-e. Ereba oboksa kar-e karug-et nde, larok yurag-e ndag-er-a? Kar-e nggeluk-nen nir-e anggun panggun mondok kwiye worak tak nonpogola, kindiyabu nak worasu-o?