YESAYA 61 - Nanduk Ngget Tul Pidnak Wene

Wisirik unpurak wene kuluruk, enalen yidnak wene 61:1-11

¹ Nagawan Indo Mondok Kek tak iri na amawi-ge an nebem worasu-o. Insilobulo lak nap ereba na konak wene yak unduwakluk, at-nen lenak nuburuk, nibil lobok yamu-o. Iri-nen inndi abi kalak woragwi ki yaga wok ondosolat, wim nap-nen tena unpuruk woragwi ereba na ”Ndag-et nak wirik enper-o” luk wene wirik posolat, o kubu me inpidnak nap ereba na-ge ”Kir-e wisirik kunpuwa-o” yak ondosolat kwaruwaklug-et nibil lobok yamu-o.

² At-nen an wirik nibil lobok yij-e, Nagawan Indo-nen inmiri yurak tarem-e abu wok yij-o luk yak unduwakluk, iri-nen inndi puru bera woragwi oboksa inndi yek tak posolat, it unuwim nap-nen kwat unpugwi ereba na kemnggo posolat,

³ inndi puru bera tabun puruk woragwi-ge konak enalin enalen pem woragwi elem wok ondosolat, nde, inndi puru rak woragwi-ge nden yaga enalen pem ndawi yugwi rak onposolat yuwakluk-nen nibil lobok yamu-o. Nde, ir-e Nagawan Indo ondomok-nen yagidnak e nggal kwat ma-o. Ir-e ndemeret lud tak mot mot nak kwarogolar-e, Nagawan Indo nak kek tak ubuwa-o.

⁴ It-nen-e o siri obi-nen tud yil lobok yidnak o siri ereba na tuguruk mendak pogolat, obi-nen it woragwi sa o kugun yidnak ereba na tuguruk worogolat kwaruwa-o.

⁵ Nelem nap wa-e. Enlem nin nap-nen ndegel konpogolat, it-nen konowam-e parugu woragolat, kit keneyabu min kit-nen idnak anggut yabu min ereba na-ge it-nen wok kondogolat wolma-o.

⁶ ”Kir-e Mbal Pem Nagawan ndegel ubugwi nab-o” yak kondogolat, kunnu-ge ”Nagawan Indo-nen yidnak tepan ombo-o” luk yaruwa-o. Kir-e enlem nin nap enarengge ereba na bem kunluk konak woragolar-e, it enarengge ereba na bem kinndi kek yogolat woragub-o.

⁷ Kit kinnggiri kagolar-e, mberen pem-et nambena kagolat, wisi tebal konpogolat, nggweyel konpogolat kwaridnak me, kit kunuwi silmu woragolar-e, onggo-ge mberen pem-et nambena wanogolat, lak momtak puk enalin enalen pem woragwi elem irit wanugub-o.

⁸ Nagawan Indo-nen yosolar-e: ”An-e mot mot nak kwarugwi irit nindingen tak pusu-o. Nde, anggun panggun tak unpugwi min meya kwarugwi min-e an-e nisili rak pusu-o. An-nen tugup lak onggo wok kondosolat, ’Mondok pem irit kinmin kundik woramin-o’ luk urul yak kondosolat yimin-o.

⁹ Kit-nen wigarag-e nin me nan me oboksa-nen enaru ma-o. Ap enlem oboksa ennggendumu enanggu onpok mburuwa-o. Iri yogola, ap oboksa-nen it eneyarug-e, ’It ap enlem yu-ge Nagawan Indo-nen imbiringgat tak onposo nab-o’luk para yuwa-o” luk yij-o.

¹⁰ Yosoloma, Yerusalem-nen yosolar-e: ”An-e Nagawan Indo ebem nalin nalen kasu-o. Mbal Pem Nagawan ebem an nindi-ge kijik kijak wurusu-o. Kwe min ap min wok kerak mburak pem inmirik unmuruk konak nak yitli iri na nggal Nagawan Indo-nen an yirik nobosolar-e, inmiri yoso sum min ombol nggwe yugwi sum min yirik nibij-o.

¹¹ Uwi pil kaidnak tup luk nggok yusu iri na nggal-et Nagawan Indo-nen-e inmiri yoso elem wirik posola, ap enlem oboksa-nen-e at nak erembel wanuwa-o” luk yij-o. 62:1-12 Pasal yu arem-e Mbal Pem Nagawan ilirak abok-nen inmiri yuwa wene mbarak worasu-o.