YESAYA 60 - Nanduk Ngget Tul Pidnak Wene

Yerusalem abog-e enalen worak konak wolma-o yidnak wene 60:1-22

¹ Yerusalem wa-e. Kar-e men yosolat, yaya kwat min-o. Kat kimiri yurak yaya-ge lobok yarik, Mbal Pem Nagawan abinal-nen yaya rak, kubusu-o.

² O yu-ge ndamuk-nen muruk tak puruk worasu-o. Ap enlem oboksa-ge muruk tak unpuruk worasu-o. Alat nde, Nagawan Indo eyaya-ge kit kenanggul pem kenangga pil wuma-o. Nagawan Indo woralat-nen eyaya yoso-ge kit kenanggul pem nam yuwa-o.

³ Ap enlem kwarar-e kit keneyaya eram nggwid nggwid lobok yuwa-o. Nagawan nagawan-e kit kenmanggim yaya pil wuma iri na-nen lesa inpil lobok yuwa-o.

⁴ Pugaksa kentalu-nen kwarusu ereba yik ker-o. Kit kenlem nap oboksa tuguruk kendam lobok yuwokluk ndok witli-o. Kit kenmbararag-e erepma-nen lobok yuwa-o. Nde, kenararag-e onmbolwak pem pak nggerasa lobok yuwa-o.

⁵ Iri kwasa lobok yogola eneyarug-e, wi luk, kinmbiriwak min yek ma-o. Kenalen-nen kinndi min purung purung ma-o. Enlem nin nap insilobulo-ge kendam waruk lobok yogolat, yi koma inggi ponok ereba woraso silobulo-t nde, kit kendam mondok kobong ma-o.

⁶ Unta wam-e Mirian min Epa min nggwe-nen waruk lobok yogolat, kit kunuwi nggweyag-e yebet ma-o. Nde, o Seba-nen-e emas min emben konak kemenan min waruk lobok yogolar-e, Nagawan Indo-nen kwarusu ereba na bem Nagawan Indo erembel wil wil lobok yogolat-net waruk lobok yuwa-o.

⁷ Nde, kambing min lomba min-e o Kendat-nen kit kendam waruk lobok yuwa-o. Nde, Nebayot-nen idnak lomba kusi ereba na-ge Nagawan Indo amanggim wosa burak waruk lobok yuwa-o. Wam wosa kan puwa ereba-nen-e Nagawan Indo indi alen tak pogola, at-nen-e at uwi at abinal-nen kobong tak iri na-ge yaya rak puwa-o.

⁸ Nggan nggan nggal laring arem mburusu iri-ge no mende-o? Tuguruk towe nggwende nggal pubu ama mburusu ereba-ge no mende-o?

⁹ Ereba-ge yi koma, Mbal Pem Nagawan ilirak o erepma-nen tuguruk enma lobok yogola, wok unpuruk lobok yusu-o. Lobok yogolar-e, Nagawan Indo Kenmbal Pem Nagawan erembel wanurak amanggim-et emas min perak min-et waruk lobok yili-o. Ereba-ge Isarael Embal Pem Nagawan Mondok Marak at ilirak kek tak unpuwakluk kek tak onposo iri na amanggim waruk lobok yili-o.

¹⁰ Nagawan Indo-nen Yerusalem yak tosolar-e: ”Kat kegerep pak leger-e enlem nin nap-nen tuguruk worak kubuwa-o. It-nen idnak nagawan ereba na-nen-e ndegel kubuwa-o. Nandug-e nisilepma bem angin worak kebem posolat woragi-t nde, yawo-ge an nindi-ge kat kabuwa yurak nindingen yusu-o.

¹¹ Yi nap ndi nap oboksa insilobulo min it-nen idnak nagawan nagawan min-et waga kat keram yebet yosolat wolmakluk, kat kegerep pak tumende-ge lengge-nen kubu-nen kuwarak nak irit wolma-o.

¹² Nagawan misik-nen tenagidnak wi woragwi lombok-nen kat ndegel kuburak insili yogola-ge, yabera lak tak unpuwa-o.

¹³ Unu mboroso Libanon e ereba na-ge lek yaga keram pil lobok yuwa-o. Iri yogolar-e, e mberangan min libe min eru min-et pil lobok yuwa-o. Iri yuwa iri-ge an nuwi iri na abinal worak tak pogolat, an nuwok poso ondoro kona konurak pem-nen pil lobok yuwa-o.

¹⁴ Kat anggun panggun tak kubugwi nap inlirag-e kat keram lobok yuwarik, keram entare nggwe tud ma-o. Kat pesel kibidnak nab-e kat keram tebe ma-o. Nde, kat kunu yarogolar-e: ’Nagawan Indo uwi siri-o’ luk, ’Sion iri-ge Isarael Embal Pem Nagawan Marak iri na uwi-o’ luk yuwa-o.

¹⁵ Kar-e keya kobogolat, insili rak kobogolat ma bug-o. Keya kubuwama, o wa woragun pug-o. Kar-e pem inndi kebem mbung mbung tak nak woragwi rak kobosolat, pempa enalen kebem nak woragwi rak kibimin-o.

¹⁶ Kwami-nen inlirak ndegel onpogolat enparugu woragwi nggal, nagawan nagawan min ap enlem oboksa-nen ndegel kobogolat wolma-o. Iri yogola, kat-nen yebet kasolar-e: ’Nagawan Indo iri-ge an nimiri yoso, nde, Isarael Embal Pem Nagawan mondok amawi worag-e an wisirik noboso-nen yusu-o’ luk yebet kagun-o.

¹⁷ An-nen-e posid tembaga ondolma-ge emas waruk lobok yimin-o. Nde, mbesi ondolma-ge perak waruk lobok yimin-o. Nde, e ondolma-ge, tembaga pimin-o. Nde, kerep ondolma-ge mbesi pimin-o. Nde, kat kuwi siri iri-ge mondok kona yamuksa woragwi rak pimin-o. O siri iri me tena woragolar-e, mondok lud tak nak kwarogolat wolma-o.

¹⁸ Kat kuwi siri iri me-ge wim wene-ge mondok wolma bug-o. Kat kuwi iri me-ge o yigisa lak tak pugwi mende min o langgona tud tak pugwi mende min-e wolma bug-o. Nde, an-e nggetlel kobosolat, ngenwa ma rak kuburuk woramin-o. Iri yosola-ge, kat-nen-e: ’An nimiri yoso nap-nen yusu-o’ luk, nerembel wanosolat woragun-o.

¹⁹ Lengge-ge mo kebem yarosolat, nde, kubu-ge waneya-nen yaya rak kobosolat wolma bug-o. Nagawan Indo an-e pem irit kat yaya rak koboso kwat yosolar-e, pempa nabinal-nen yaya rak kobosolat woramin-o.

²⁰ Nagawan Indo an-e kat yaya rak koboso mo min waneya min nggal kwat yosolar-e, kat kambigir-e neyaya-ge wusa na nggwigit lak, lumu na yigit lak wolma-o. An-e lak yoso buk yaya irit kwat yimin me, kat-nen tabun puruk, kindi puru bera woraso tarem-e lak ma-o.

²¹ Yerusalem kat kebem woragwi nap-nen mot mor-et kwarogolar-e, it-nen-e o nggweyak iri na winde luk, pem irit woralik nalik irit wolma-o. It iri-ge an nunu kek tak woraso iri nam tak puwakluk, an-net ya unpukmu-o.

²² Kit kennggendumu yobok tak, unnu lak ereba na-ge ap enlem nggok enmawi worak irit kwat ma-o. Nde, Nagawan Indo an-nen kwarosolar-e, kwarurak tarem-net ndag-et nak kwarimin-o” luk yij-o.