YESAYA 6 - Nanduk Ngget Tul Pidnak Wene

Mbal Pem Nagawan-nen Yesaya at ene lomboksa yoso nap yuwakluk yonggo bidnak wene 6:1-13

¹ Nde, olengen Nagawan Usia wat yid iri bem-e an-nen yik kaginggal-e Nagawan Indo kagi-o. Nagawan Indo-ge nagawan at-nen koreyak woraso mondok kek tak abinal worak iri na bem koreyak-nen usum leyok sum iri na-nen-e Nagawan Indo uwi iri na-ge yebet tak pidnak kagi-o.

² Nde, urugup worak ndak worak pidnak mende kan ngen nggal kere kererak ereba-ge at eralu lop lop worak mendak eneyagi-o. Insiyamu-ge enariktak enam worak. Nde, insiyamu mberen-nen-e entare korakolat, insiyamu mberen-nen-e enpe muruk tak pogolat, insiyamu mberen-nen-e pubu mburugwi-o.

³ It-nen it nak enne nggoksa yak kerak mbogolar-e: ”Marag-o, marag-o, marag-o. Nagawan Indo Mondok Amawi Worak iri nak marak-nen yusu-o. Nggweyakma yu me oboksa-ge at abinal-nen yebet yusu-o” luk yiga-o.

⁴ Iri yogolat enne iri na-nen-e Mbal Pem Nagawan uwi paro iri na-ge lele yosolat, Mbal Pem Nagawan ama iri na me-ge kule-nen yebet yij-o.

⁵ Iri ala karuk, an-nen yosolar-e; ”An-e mondok yawo-net lak yimin kagi! An-e wene meya nak yoso me, nemnde na emben torak. Iri-nen an na meya wene iri nggal nak yugwi nap ennggendumu-t woraso me-t nde, an nerengen-net Nagawan iri Nagawan Indo Mondok Amawi Worak iri na kagi yu-ge an-e yawo-net wat yimin kagi” luk yigi-o.

⁶ Iri lug-e, urugup worak mende ereya na ennggendumu at misik-nen Mbal Pem Nagawan amanggim wam wosa kan pugwi sa-nen kan ngen ndokpa bem waruk an neram puburak lobok yosolar-e,

⁷ kan ngen iri na imin marig-et nemnde bem posolat-nen yosolar-e: ”Kan ngen yu-nen imin marig-et kemnde bem yid iri-nen yawo-ge kat-nen lugud tak kwaroso-ge Nagawan Indo-nen korak posolat, kat-nen meya kwaroso-ge amberam tak pij-o” luk yak nirij-o.

⁸ Yak nutluk worasoma-ge, Nagawan Indo-nen yosolar-e: ”An-e ta wirik pimin-o? Nit-nen yidnak wene waruk noso nab-e ta nde kwat ma-o?” luk yosola kuluruk, an-nen onggo yosolar-e: ”An-e yu-o. An-et wirik nibi-o” luk yigi-o.

⁹ Iri lug-e, at-nen at ilirak enmanggim wene wosa bidnak wene yu warug-e an wirik nobosolat-nen nebem posolar-e: ”Kir-e kulugub-et nde, kwara yebet kagup pug-o. Kir-e yebet kagub-et nde, kwat ma iri-ge kenaru yugup pug-o” luk yij-o.

¹⁰ Yosoluk yarik, an yak norosolar-e: ”Ap ereba-ge kagolat, kologolat, yebet kagolat yogolat, nden karuk tuguruk an neram lobok yogola, ki yuwa naru kat-nen-e ap ereba inndi-ge muruk tak posolat, eneyanggo na eneyanggoru lak tak posolat, enlengen ngguru rak posolat kwarurag-o” luk yak nirij-o.

¹¹ Yosoloma, an-nen kin wanosolar-e: ”Nagawan Indo wa-e. Yu nggal kwarogolar-e, nunggwirik tarem nggal kwat tenak wolma-o?” yosolakmu, at-nen yosolar-e: ”Iri nggal nag-et worakmu, o siri oboksa tud yil lobok yosolat, o oboksa kugun yosolat, nggweyak nak ngguru rak, amburu min lak yosolat ma-o.

¹² Nde, ap o siri ereba me woragwi nab-e an-nen langgara sera erepma nin sa nin sa ereba wirik unpumu, it unuwi nggweyak oboksa-ge kugun ma-o.

¹³ O siri iri me enpe sepulu woragwi-nen nde ereya na lak yogolat, misiget nak nde worala-ge, iri na lak tag-et pimin-o. E ndaridnag-et nde, undugul pem isit worasu iri na nggal it ap iri na enlem-e abok woragotlat, woma iri na-ge nandug-et tel korogolat Mbal Pem Nagawan ilirak marak irit kwat ma-o” luk yij-o.