YESAYA 55 - Nanduk Ngget Tul Pidnak Wene

Nagawan Indo-nen at ilirak inmin ”Kunpud kamin-o” yidnak wene 55:1-13

¹ Nagawan Indo-nen yosolar-e: Kit yi nere-nen kinndi eberek yusu nab-e lobok yugupndik, yi kenangga lud tak pidnak yu mer-o! Kit kontol lag-e lobok yugupndik, onggo pigit lag-et nggandum mbato yeba wanugupndik mer-o! Anggut amburu min sapi wam agamo amburu min-e kenmanggim lid lud tak worasu-o. Mondok onggo pigit lag-et waner-o!

² No amanggim-nen enpem yamuk tak poso buk mende onggo pogolat, indi alen tak purak puk ereba na wanurak pem nde yabu wanogolat kwatli-o? Kir-e konag-et nonggolat, undu konak saga pidnak ereba nonggolat yurak pem-e an-nen yidnak yidnak nak kwarogolat wolmer-o.

³ Nilirak wa-e. Kwara kuluruk, an neram lobok yer-o. Kir-e an-nen ndemeret unluk woragwi elem wok kindimin-o. An-nen mondok tugup lak Ndaut imin ’Imbiringgat tak kibimin-o’ luk urul pigi iri na-ge kit kinmin kondosolat mondok mborok tak purak puk urul pimin-o.

⁴ Ap enlem erep-nen an namawi iri na at ebem kujwaklug-e, an-nen-e Ndaut iri-ge ndemeret nagawan tak posolat, san ombo onowe rak posolat kwarukmu-o.

⁵ Ap enlem nin kit na kenaru bug-et nde, wene mbo onpogola-ge, ndag-et nak kit kendam lobok yuwa iri-ge Nagawan Indo Kenmbal Pem Nagawan, Isarael Embal Pem Nagawan Marak an-nen-e kit kunnu worak tak kinpimin me, kendam lobok yuwa-o” luk yij-o.

⁶ Nagawan Indo worasola ya-t at eram mberer-o. At koroga worala ereya-t wene mbo eber-o.

⁷ Meya kwaroso nab-e at-nen meya kwaroso iri-ge mondok keya buwag-o. At indi-nen yebet kaso tula iri-ge nden kaga nin tak puwag-o. Nde, tuguruk Nagawan Indo-nen ubud kujwaklug-e, tuguruk nden karuk, Nenmbal Pem Nagawan eram mburuwag-o. Nagawan Indo iri-ge unpud kaso elem pem ap meya yidnag-e amberam tak poso-o.

⁸ Nagawan Indo-nen yosolar-e: ”An-nen yebet kaso-ge kit-nen yebet kagwi nggal-e lag-o. An-nen kwaroso-ge kit-nen kwarugwi nggal-e lag-o.

⁹ Nggweyakma yu me-nen mbal-e mondok teram kali iri nggal-et, an-nen yebet kaso-ge kit-nen yebet kagwi-ge teberak puruk, terak minik teram-net yusu-o. Nde, an-nen kwaroso na kit-nen kwarugwi-ge teberak puruk, terak minik teram-net yusu-o.

¹⁰ Talme-ge mbal pem-nen mbuwarug-e tugurug-e laso bug-o. Are, nggweyak nde piri rak posolar-e, yi mende ndi mende alim tak posolat, yagidnak mende wirik posolat, uwi pil kudtak min nunggwi mende min wok ondoso iri nggal-et

¹¹ an nemndam nggwe-nen wirik pidnak wene-ge we ebe lag-et an neram tuguruk luma bug-o. Alat nde, an nindi-nen pidnak ereba na kwat yosolat, an nindi-nen ’Kwat mag-o’ yidnak ereba na ebe kwarak posolat yoso-o.

¹² Kir-e kenalin kenalen pem-et Mbabel uwi keya buruk, iri me-nen lesa wok kunpuruk mborogola-ge, kenalen min-et mburugub-o. Ndobo min ndobo amun min-e enalen-nen enne lek kagolat, e yapmu woraso oboksa-nen ininggimok lel kagolat kwaruwa-o.

¹³ Nde, isile worak ondolma-ge libe yak yosolat, egere isile worak ondolma-ge engen kerengen amare worak mende uwi nde yaga labuk ma-o. Iri kwat ma iri-ge ap-nen meme rak pigit lak, pem irit yeberak woragolar-e, Nagawan Indo unu kek tak pogolat wolmakluk-nen kwat ma-o” luk yij-o. 56:1–57:21 Pasal mberen ya arem-e yi wene ndi wene mbarosolar-e, mot mot woragwi wene min Nagawan Indo keya bugwi wene min mbatluk, worok tak posolat-nen urul posolar-e, it yongga undurak wene min it ki rak unpurak wene min mbarak worasu-o.