YESAYA 54 - Nanduk Ngget Tul Pidnak Wene

Mbal Pem Nagawan-nen Isarael nap enabuwa kaso wene 54:1-10

¹ Yerusalem wa-e. Kar-e nandug-e li ndakit lak, kweyap ibiri nggal woraigenma-o. Alat nde, yawo-ge kar-e kalen pem kene lek kasolat, ndawi yi-o! Kweyap ununtak-nen keya inpigit lak inlirag-e kwarar-et nde, kat kilirag-e terak minik kwarat ma-o.

² Kat woraso kuwi lije-ge wigaksa nggoksa worosolat, kere na mot nggigi rak posolat, owak na tugup laksa sondosolat kwari-o!

³ Kar-e kigit nggwe, kware nggwe wigaksa nggok yil mburugun-o. Kat kebem woragwi nap-nen-e ap enlem erep unuwi nggweyak wanuruk, kore ma-o. Iri yogolar-e, o siri yawo o wa aptuporak worasu ereba-ge yebet ma-o.

⁴ Kar-e kwiye yusu-ge meyog-o. Kar-e kinggiri rak puwa bug-o. Pesel kobogolat, kinggiri-nen wandu yugun pug-o. Kar-e kundugum woralat-nen terak waring kaso ereba na-ge meme rak pugun-o. Iri-nen togwe karik woralat kindi aptuporak woraso ereba na meme rag-et pugun-o.

⁵ Kat ndak wat kibij-e kat kun nggal ma-o. Isarael Embal Pem Nagawan Marak iri-ge kimiri yoso-nen yusu-o. At unu-ge Nagawan Indo Mondok Amawi Worak irir-o. Ar-e yi wi ndi wi tena woraso-o.

⁶ Isarael wa-e. Kar-e kwe ndugum un-nen keya bosoma, indi puru rak woraso iri na nggal-nen yusu-o. Alat nde, Nagawan Indo-nen tuguruk at eram lobok yonokluk, wene mbo kobosolat-nen yosolar-e:

⁷ ”An-e we marig-et nak woranokluk, keya kibigi-t nde, kabuwa kwarat kasolat, nindi kundik pem-e tuguruk wok kibimin-o.

⁸ An nisilepma kwiye worak-nen ndowaga we marig-et nak keya kibigi-t nde, an-nen enabuwa pem kundugu kaso iri na bem-e kat kabuwa kasolat woramin-o” luk kimiri yoso Nagawan Indo-nen yij-o.

⁹ ”Nu woragid tarem-nen an-nen owak mbarosolar-e: ’Abog-e yi-ge kobong ma bug-o’ luk urul pigi iri na nggal-et, yawo na owak mbarosolar-e: ’Abog-e an-nen-e nisilepma kenpem posolat, kenpem mbud yosolat na mondok kwarimin pug-o’ luk urul pusu-o.

¹⁰ Ndobo min ndobo amun min ereba-ge lewo yuwa-t nde, an-nen kit kenabuwa kasu yu-ge pok tak pimin pug-o. Lambuksa konak wolmomtak urul pigi iri-ge mborok tak pimin pug-o” luk kit kenabuwa yoso Nagawan Indo-nen yij-o.

Yerusalem ngget wene 54:11-17

¹¹ Nagawan Indo-nen yosolar-e: ”Yerusalem wa-e. Kimbiri lamut siri kar-e indi uwi yaboso kimin lak me, kat-nen kwarurak kamawi lak yusu-o. Tuguruk wat kobosolar-e, kemabin-e kerep mondok onggo nggok pugwi bem pil lobok yimin-o.

¹² Nde, kegeber-e ndelima kerep-nen mbeyoksa mendak posolat, kurumnde pak tumende-ge kerep abinal worak pem-nen konosolat, kat-nen idnak pak leger-e kerep onggo nggok pugwi bem ligik posolat kwarimin-o.

¹³ Kat kilirak oboksa Nagawan Indo an-nen mul indimin-o. Ir-e ukwe mende bem-e mondok ndak enalen pem irit wolma-o.

¹⁴ Kugwi-ge mondok lud tak mot mot kwarugwi irit kemabin puruk wat kibimin-o. Nde, kwiye-nen unmunggum pil kagwi mende min anggun panggun tak unpugwi mende min-e kebem mbuma bug-o.

¹⁵ Ap-nen nde kebem mbud yogola-ge, iri-ge an nindi-n pidnak pem ma-ge lag-o. Ta-nen nde kat kimin wim mbarosola-ge, iri-ge wosa mbuwa-o.

¹⁶ Mbesi konugwi nap iri-ge an-net ndak worak unpukmu, it-nen kan pu yaga amare rak purug-e tup san konili-o. Tup san iri bem-nen ap wuruwakluk, ap san ombo-ge an-net ndak worak unpukmu-o.

¹⁷ Alat nde, kat kuruwokluk tup san konuwa oboksa-ge ereba na bem-nen kat kururag-e meya ma-o. Kat kebem wene puwa ereba na-ge wene mbenarugwi sa-nen mbenarugundig-e, ebe lak wene nde kagun-o. An-nen-e ndegel nubugwi nab-e we irit ombol nggwe yugwi elem wok indimin-o” luk Nagawan Indo-nen yij-o.