YESAYA 53 - Nanduk Ngget Tul Pidnak Wene

¹ Ap enlem iri na-nen onggo yogolar-e: ”Ta-nen nit-nen kulidnak ereba na bem indi angin tubu yamu-o? Tarak inmbiri bem Nagawan Indo amawi-ge nam tak pij-o?

² Nagawan Indo indi-n perasolar-e, at ndegel oboso nab-e e isit nggal nggweyak amburu lak pem tanggal momtak perasu-o. Nit-nen nenlengen mberensa yik kudtak at ebem konak mbi woragit lag-o. Ninndi at ebem puwakluk, inndi wanoso mende mbi at ebem woragit lag-o.

³ Nit-nen-e at nggweyel obogolat, pelek pelek tak ibige-o. Ar-e andi bandi kasolat, yane woroso-o. Ap misiger-o luk mbi-nen na yik kujwa bug-o. Nit-nen na no mende yik kaidnak nggal tak ibige-o.

⁴ Ndemerer-e nit-nen kudtak andi bandi iri na nondolmasa at ebem mbosolat, nit-nen yane wurugwi iri na nondolmasa at nde yane worosolat kwarosola-t nde, nit-nen peragolar-e: ’At andi bandi kasu iri-ge Mbal Pem Nagawan-nen angin worak ebem pusu-o’ luk peraige-o.

⁵ Alat nde, ar-e nit-nen meya yidnak pem tege kundugu obogolat, nit-nen meya kwarugwi bem linggamburok worogolat kwariga-o. Nit ninmiri yuwakluk ar-e anggun panggun kagaij-o. At aboro tap yonok lonok mbosolat, mep yolo mbid ereba na-nen-e ki rak ninpij-o.

⁶ Nit oboksa lomba wam kabak yidnak nggal woragolat, tu-ge nindi-n pidnak ndomok mburugwi-o. Alat nde, Nagawan Indo-nen-e nit-nen meya kwarugwi-ge oboksa at ebem yatku bamu-o.

⁷ Ar-e insilepma min lel mberel ibiga-t nde, eyak linggirik puruk, andi bandi kasolar-et nde, ene lak woragij-o. Lomba amarik ene lak worasola, urusu mbarugwi sa waruk mburugwi nggal, lomba ija usu mbarogola, ene lak woraso nggal, ene lak irit woragij-o.

⁸ Ar-e tenaguruk, ebem wene mbenatlug-e, waruk mbirigarik, wiriga-o. Ap misiger-o luk tet at ambigit yigit lag-o. Ar-e nit nenlem nap-nen meya kwarugwi bem-et wat yij-o.

⁹ Ar-e meya yugwi nap inmin-et yapma ibiga-o. Insilobulo worak nap yapma inpidnak ennggendumu yapma ibiga-o. Nde, at-nen-e meya na kwaroso buk, ap enmberam na laso bug-et nde, iri nggal kwat ibiga-o” luk yiga-o.

¹⁰ Nde, Nagawan Indo indi-n pidnak pem ar-e andi bandi kasolat, ondomok indi wisirik pid iri-ge meya yidnak lak tak purak pem Mbal Pem Nagawan amanggim wosa pugwi nggal irit wat yij-o. Ar-e uruk mot pem-et woralat, at-nen wigarag-e erengen-nen kujwa-o. At ebem nggwe-net Nagawan Indo indi-n pidnag-e kwat ma-o.

¹¹ Iri ala karuk, Nagawan Indo-nen yosolar-e: ”At andi bandi kasolat worarug-e, at-nen andi bandi kagaid iri na ebe-t kwat yidnak karug-e, alen kasolat wolma-o. Ndegel noboso nap iri-nen an nalen tak pusu-o. Ap kwarat-nen meya yidnak pem onggo angin worak wanurag-e at ebem nde mbij-o. At ebem-nen an-e it-nen meya yidnag-e namberam tak pimin-o.

¹² At na ondomok indi-net iminep wisirik puruk, meya yoso nap nggal kwat yamu-o. At-nen-e ap kwarat-nen meya yidnak wanosolat, it meya yidnak amberam tak puwakluk tepan enmanggim yamu-o. Iri bem-nen an-nen ap kwarat we at wok tukmu-o. Nde, ap lud tak mot mot nak kwarugwi nap-nen wanugwi ereba na-ge at min-et it inmin lambuksa winde ma-o” luk yij-o.