YESAYA 52 - Nanduk Ngget Tul Pidnak Wene

Mbal Pem Nagawan-nen Yerusalem wisirik unpuwa wene 52:1-12

¹ Yerusalem wa-e. Men yugundik, kuruk wolmin-o! Kar-e kamawi luk, kunu kek tak woralat-nen yoroso kusum yutluk wolmin-o! Marak o siri Yerusalem wa-e. Ap iniye ambasap mbarugwi buk, kopkap tobok tak nab-e kat kurumnde nggwe-ge mondok ngguwa bug-o.

² Yerusalem wa-e. Kar-e o liri arem-nen men yosolat, o liri kebem ereba-ge pil ki-o. Nin nap-nen yemndak kunpuruk Sion worali nap wa-e. Posid kere kunlusuwak pem parik iri-ge wisirik per-o!

³ Nagawan Indo-nen at ilirak yak ondosolar-e: ”Kir-e konnggo pigit lag-et ap ndegel unpugwi nap kwat yigep iri nggal-et wisirik konpogolat na we onggo lag-et wisirik kunpuwa-o,

⁴ Nandug-e Mesira mbirigepndik, ap sal nggal iri me woraigeb-o. Iri luk, imbirig-e, Asiut nap-nen erem lak ma-t nde, kit yemndak kunpuruk woraiga-o.

⁵ Yawo-ge an-e yu me-ge no kwarimin-o? Mbabel nap-nen-e we ereba-t kamat kunpuruk mbirigarik, it ininggiyapma rak kinpidnak nap-nen-e inndi kek tak pem lel mberel konpogolat, yawo-nen na an-e enlengenma nggal tak nobogolat worali-o.

⁶ Iri bem-e kit-nen-e an nimin-e: ’Ar-e Mbal Pem Nagawan-net yusu-o’ luk para yugub-o. Nde, iri tarem-e kit-nen peragolar-e: ’Yu na-ge at-nen ninmin wene yamu-o’ luk kenaru ma-o” luk yak indij-o.

⁷ Nde, wirik pil lobok yidnak nap iri na yik kagolar-e, mondok konak lombok-nen yusu-o. Ndobo worak nggwe-net lobok yosolar-e, konak yamuksa woragwi wene min lobok yusu-o. Sion imiri yurak wene min lobok yosolat-nen yosolar-e: ”Kenmbal Pem Nagawan-e Nagawan-nen yusu-o!” luk yusu-o.

⁸ Nagawan Indo-ge tuguruk Sion lobok yosola, it enlengen-net karuk, o siri yik karok woragwi nab-e enalen-nen inni enne mbogolat, oboksa ndak ndak kek kok lel kali ereba koler-o.

⁹ Nagawan Indo-nen at ilirak inndi yangona yamuk tak onposolat, Yerusalem wisirik onposolat kwarusu me, o siri Yerusalem langgona tud yil lobok yidnak wa-e. Kenalen-nen kinni kenne mber-o.

¹⁰ Nagawan Indo-nen-e at-nen idnak amawi-ge ap enlem oboksa inmbiri bem nam tak pusu-o. Nam tak posola-ge, yi wi ndi wi oboksa-nen nit Nenmbal Pem Nagawan-nen ninmiri yoso elem iri na-ge kujwa-o.

¹¹ Kit Mbal Pem Nagawan ama woraso marak silobulo waruk mbitli nap wa-e. O Mbabel siri iri keya buruk mberer-o! Kopkap tobok tak onposo mende-ge mondok tenagurak pug-o. Kit mondok awo mbirigit lak ma-net kenambikpebe mat kurudtag-o.

¹² Nagawan Indo-nen kininggi waruk mborosolat, Isarael Embal Pem Nagawan-nen tu ponok ponok pak turuk, nggetlel kunpuruk mborosolat me, kir-e ndag-et ndag-et na mburugup pug-o. Iri-nen mengga mbiridnak nggal na mburugup pug-er-o.

Nagawan Indo ndegel oboso nap andi bandi kudtak wene 52:13–53:12

¹³ Nagawan Indo-nen yosolar-e: ”An ndegel noboso nap iri na-nen kwaridnak ebe-t kwat marig-e, at nak erembel wanogolat, kek tak ubuwa-o.

¹⁴ Nandug-e ap kwarat-nen at yik karug-e, wendet yiga-o. Iri kwariga iri-ge at erare meyasa labuk yidnak me, ap entare nggal-e lak ala-nen kwariga-o.

¹⁵ Alat nde, yawo-ge ap enlem kwarat-nen at ebem wi yuwa-o. It-nen kagwi buk mende irit kagolat, yebet kagolar-e, nagawan nagawan-e wi yogolar-e, wene yurak meya ma-o” luk yij-o.