YESAYA 50 - Nanduk Ngget Tul Pidnak Wene

¹ Nagawan Indo-nen Isarael nap yak ondosolar-e: ”Nilirak wa-e. Kit kinndi-nen yebet kagolar-e: ’Ununtak-nen onkwerak langgara wirik inpili iri na nggal Nagawan Indo-nen wirik nunpusu-o’ luk perali-a? Iri nde peragolat ala-ge, ’Keya kinpimin-o’ luk engga mbal kindigi-ge ngge-o? Kit kinndi arem-nen peragolar-e: ’Namat wanidnak pem ilirak namat uwi yaga arengge ombo wok indili iri na nggal ap enpem Nagawan Indo-nen nonnggo yarusu-o’ luk perali-a? Iri nggal-e lag-o! Kit kondomok-nen wene kwid togolat, meya kwarogolat kwarigep iri na bem-nen kamasa mbo kinpil mbiriga-o.

² Noluk-nen an lobok yosolat wene mbo onposola-ge, an nilirak ennggendumu-nen-e ap misiger-o luk mbi-nen nene erep nggarigit lag-o? It enne lak yiga iri-ge it-nen peragolar-e: ’At-nen-e wisirik nonposolat, ninmiri yosolat yurag-e amawi lag-o’ luk-nen enne lak yiga? Alat nde, ndemerer-e an-nen yidnak pem-e yi koma eberek tak posolat, yi oboksa ogorak nak ngguru rak posolat, yi lak-nen ndowaga keyane oboksa emben to yosolat kwarurag-e ndag-o.

³ An-nen mbal-e muruk tak pukmu, mbal-e mom ki yusu iri-ge inndi yabi kalok yogolat-nen yurugwi sum nggal kwat yusu-o” luk yij-o.

Nagawan Indo ndegel oboso nap-nen yidnak yidnak kwarurak wene 50:4-11

⁴ An-nen yimin wene bem ap enpabok lak ereba na enmawi rak purak pem-e Nagawan Indo Kek tak iri na-nen an-nen wene yurak mirik nibij-o. Pempa kuplila-ge at-nen an mul nururak wene iri na kuluwaklug-e, neyanggo anggat worak tak bosolat woraso-o.

⁵ Nagawan Indo-nen yebet kagwi elem iri na wok norosola-ge, at imin eyak wirigit lak, keya ibigit lak yigi-o.

⁶ An-nen-e an nombol-e an nitli nap enambigit nuk kagi-o. An nerabengen-e an nondoksu lit yaga pinili nap enambigit nuk kagi-o. Ap-nen nggweyel nobogolat, wusi tebal nobogola-ge, nerare kurakit lak, larok nak yigi-o.

⁷ Nagawan Indo Mbal Pem Nagawan-e an yongga norosola me, an-e ninggiri rak puwa bug-o. An nindi-ge mamak puruk worayekluk kerep nggal tugup lak tak puruk worasu-o. An-e mondok ninggiri rak puwa bug-o luk naru worasu-o.

⁸ Mbal Pem Nagawan-e an nimin woralat me, at-nen-e: ”Kar-e meya yoso bug-o” luk yak nuruwa-o. Ta nggal-nen an nebem wene puwa-o? An nebem nde wene pusu ala-ge, totno wene mbenarugwi sa mburuwog-o. Ta-nen nde an nebem wene posola-ge, an neram panggosa lobok yuwag-o.

⁹ Nagawan Indo Kek tak iri na-nen nde an nambigit yosola-ge, ta-nen nggal an nimin-e: ”Kar-e lugud tak kwaroso-o” luk yak nuruwa-o? ”At yu-ge iri kwaroso nab-o” luk nobok pugwi nab-e abog-e mondok lak ma-o. Lak yogolar-e, yurugwi sum umbuk ngginggiris-nen ninggidnak nggal nobok pili nab-e lak ma-o.

¹⁰ Kit Nagawan Indo kek tak pogolat, at ndegel oboso nap-nen yidnak wene kologolat kwatli nap wa-e. Tula kit-nen mbitli iri-ge mondok yaya lak, ndamuk nggwe nde mbitli nde ma-o. Alat nde, Nagawan Indo ebem kinndi angin tubu yogolat, Kenmbal Pem Nagawan ebem nak wat tak puruk wolmer-o.

¹¹ Kit ap erep lak tak unpurak pem enare pili nap wa-e. Kit-nen lak tak unpurak wene yimnili ereba-net lak tak kunpuwa-o. lri-ge Nagawan Indo-net kwat konposolar-e, kir-e andi bandi kwarat kenpem mberak puwa-o. 51:1-23 Pasal yu arem-e Mbal Pem Nagawan ilirak inndi yangunurak wene min it inmiri yosolat, kona nin nggal ngget tak onposolat yurak urul pid wene min mbarak worasu-o.