YESAYA 5 - Nanduk Ngget Tul Pidnak Wene

Anggut yabu bem yidnak ndawi 5:1-7

¹ An nanggam-nen idnak anggut yabu bem an-nen ndawi ngarusu yu koler-o. An nanggam yabu anggut yabu-ge ndobo ayo bem nggweyak alim pem irit wanij-o.

² Nde, at-nen-e nggweyak yalosolat, kerep ereba na-ge lena mbo bosolat, anggut konak uwi nak irit yagij-o. Yagurug-e, yik karok wolmomtak o mot misik iri na me wirij-o. Iri rak purug-e, anggut engen yosola, engen amburu mbulurak ondoro nggweyak yalij-o. Iri rak purug-e, engen ereba na ogere yamu mbarid nggal-e, engen undu-ge amak worak nde kagaij-o.

³ Iri ala karuk, nanggam iri na-nen yosolar-e: ”Kit Yerusalem woragwi nap min Yewura woragwi nap min kit oboksa-nen-e an min an-nen idnak anggut yabu min wene yu mbi mbenarer-o.

⁴ An-nen idnak anggut yabu yu-ge an-nen kwat oboso bug-e no nggal kwat uburak kali-o? An-nen-e engen undu konag-et yuwa-o luk nindi ebem worasoma-t nde, noluk-nen engen-e amak worak nde yij-o?

⁵ An-nen idnak anggut yabu yu-ge an-nen-e yu nggal kwat ibimin-o. Yabu iri leget iri-ge kona wabimin-o. At imiri mbarak worasu kerep leget iri-ge ndamera keya bimin-o. Iri rak pumu, nggwija-nen meya rak posolat, ijok liri rak puwakluk keya bimin-o.

⁶ An-nen keya bumu, yakwi buk mende nak yak ma-o. Nde, anggut ari ereba-ge nggarok na wanigit lak, umut na mbarigit lak keya bumu, isile worak min tusuangge min-nen kuraguwa-o. Iri-nen an-nen nggan nggan yak tosolar-e: ’Talme-ge ebem mberak purak pug-o’ luk yak timin-o” luk yij-o.

⁷ Nagawan Indo Mondok Amawi Worak iri na eyabu anggut yabu-ge Isarael nap-nen yusu-o. Nde, Yewura nap iri-ge Nagawan Indo-nen at eyapmu yagidnak anggut ari-nen yusu-o. At-nen-e it iri-ge mot mor-et kwarogolat wolmomtak enpem indi puruk worasola-t nde, lugud tak kwarugwi mende nak kwarogola eneyagaij-o. At-nen yebet kasolar-e, ir-e mot mot kwarugwi nggok tak puwa-o luk enperagaij-et nde, it-nen-e mot mot nak kwat unpuwakluk nggi yosola, enne nggwa nak kolamu-o. 5:8-30 Ayat ayat yeba arem-e yi meya ndi meya kwarugwi nab-e lak tak unpuwa wene mbarak worasu-o.