YESAYA 49 - Nanduk Ngget Tul Pidnak Wene

Isarael iri-ge ap enlem oboksa ennggendumu yaya-nen yusu-o. 49:1-7

¹ O erepma woragwi nap wa-e. An-nen yidnak wene kologolat, an-nen yimin wene kwara yebet kagolat mer-o. An-e awo ndet yigit lak ma-net Nagawan Indo-nen wene mbo nobosolat, niya arem-net len nebamu-o.

² At-net an nene yalawi anggat nggal anggat worak posolat, at inggi-net an nggetlel nuburuk woragij-o. At-nen-e mare anggat nggal nanggat kilik puruk, mbising kudtak pem nggeren wisirik pugwi nggal tak nibij-o.

³ At-nen yak norosolar-e: ”Isarael wa-e. Kar-e an ndegel noboso nap-nen yusu-o. Kat kebem-nen an-e kek tak nubuwa-o” luk yak nirij-o.

⁴ Alat nde, an-nen yosolar-e: ”An-nen yabu wanosolat nirigak mbij-e wewesa namawi nak lak tak pigi-o!” luk yigi-o. Alat nde, Nagawan Indo-nen-e an nowene mbarosolat, an-nen yabu wanidnak ndak ndag-et onggo wok nuruwa-o luk naru worasu-o.

⁵ An-e Isarael nap iri na Nagawan Indo eram inpil lobok yuwakluk, ndok wat unpuwakluk, an-e ndet yigit lak ma-net Nagawan Indo-nen at ndegel oboso nap tak nebamu-o. Nagawan Indo-nen-e an-e kek tak nobosolat, ar-e an namawi elem-nen yusu-o.

⁶ Nagawan Indo-nen an yak norosolar-e: ”Ndegel noboso nap wa-e. Yabu mondok nggok terak minik lombog-e kat-nen wanurak worasu-o. Kat-nen wanurak yabu-ge Yakup-nen wigarak erep minggirik ereba kek tak woraiga ereba na tuguruk kek tak onposolat, enma inpil mborosolat kwarurak iri nak worasu-ge lag-o. Alat nde, yi wi ndi wi oboksa-nen inmiri yuwakluk, an-nen kar-e ap enlem oboksa ennggendumu yaya rak kibimin-o” luk yij-o.

⁷ Mbal Pem Nagawan Mondok Marak, Isarael nap inmiri yoso iri na-nen ap nggweyel unpugwi nap-nen nggweyel obogolat, ap enlem oboksa-nen insili rak obogolat, o tena woragwi nap ereba ndegel onposo nap kwarak pogolat kwatli nap iri na yak tosolar-e: ”Nagawan nagawan-nen-e an-nen kwat kibimin iri karuk, it-nen-e an kek tak nubuwa-o. Enmawi worak nap-nen na iri karug-e, entare nggwe tud ma-o” luk yij-o. Iri kwaruwa iri-ge Nagawan Indo-nen at ndegel oboso nap linid iri bem-nen kwaruwa-o. Isarael nap Enmbal Pem Nagawan Mondok Marak iri-ge at-nen urul pidnag-e lugud tak poso buk ala-nen kwaruwa-o.

Tuguruk Yerusalem kugun yumnurak wene 49:8–50:3

⁸ Nagawan Indo-nen at ilirak yak ondosolar-e: ”An-nen nindingen tak kinpimin tarem-e kenne erep nggarimin-o. An-nen kit kinmiri yimin tarem-nen-e yongga kindimin-o. An-nen-e nggetlel kunpuruk woralat, yik keneyarok woralat, ap enlem oboksa enmanggim urul pidnak wene nggal tak kinpimin-o. Kit kunuwi nggweyak mondok aptupo luk kugun yid iri na-ge an-nen tuguruk ondolma rak pumu, tuguruk kit kunuwi nggweyak kwat ma-o.

⁹ Nde, an-nen-e o kubu me inpidnak nab-e wesera wirik onposolat, nde, ndamuk arem woragwi nab-e yaya bem inpil mborosolat kwarimin-o. Iri-nen ndobo mondok usu nggwarak pem wolma-t nde, ndak irit woragolat, tula ereba mborogolat na nunggwi mende-ge nil nal nak mburuwa-o.

¹⁰ It iri-ge yi nere min nunggwi mende nere min-e mondok kujwa bug-o. An-e it unpud kaso iri na-nen lit unpuruk yi ulusu ereba na me wok unpuruk nosola, nembaga usu lak nggwe-t nde, mondok mo eyak kujwa bug-o.

¹¹ An-nen-e tula-ge ndobo worak nggwe-t yagimin-o. Nde, an nurula nggog-e oboksa yagosolat yamuk tak pimin-o.

¹² Nde, an nilirag-e erepma abare abam (utara) nggwe-nen mo mboso (barat) nggwe-nen abare ena (selatan) ambigit o Sinim-nen na lobok yuwa-o” luk yij-o.

¹³ Nagawan Indo-nen at ilirak inndi yangonosolat, at ilirak anggun panggun tak inpili ereba na enabuwa kasu me, mbal wa-e. Ndawi yi-o! Nggweyak wa-e. Kek kok lel ker-o! Ndobo wae. Kenalen-nen kek kok mbak lel ker-o!

¹⁴ Alat nde, Yerusalem woragwi nap-nen yogolar-e: ”Nagawan Indo-ge nir-e mondok keya nonposolat, nit-nen idnak Nagawan Indo-ge abu meme rak nenpamu-o” luk yiga-o.

¹⁵ Yogolikma, Nagawan Indo-nen onggo yosolar-e: ’’Kwe mbi-nen-e at ambara-ge meme rak posolat, ar-e la at-nen ndagidnag-et nde, abuwa yigit lak yosolat kwaroso-a? Erep-nen-e meme rak unpugwi-t nde, an-nen-e kar-e mondok meme rak kibimin pug-o.

¹⁶ Yerusalem wa-e. An-e pempa nindi kebem mbung mbung tak worasu-o. Kat kunu-ge ninggimok pem mbarak pigi-o.

¹⁷ O siri Yerusalem kat tuguruk kugun yemen kuburak nab-e yanem-et lobok yuwa-o. Nde, kat ndamera yigisa keya kibidnak nab-e mburuwa-o.

¹⁸ Kat keralu kwara lombot pi-o. Yerusalem kat kimid pem woragwi nab-e ndok wutluk, keram lobok yili-o. Mbal Pem Nagawan nuruk nak woraso an nunu bem an-nen yusu-o. Kwe ndugum ap wanurak kwe-nen umuruk pidnak iri na bem alen-nen indi kek yoso nggal, it kat kimid pem wolma nap iri na enpem-e kalen-nen kindi kek yugun-o.

¹⁹ Kat-nen idnak uwi-ge kugun ngguru yosolat, aptu pibo mbij-et nde, yawo-ge yebet yosolat, ap iri me wolmomtag-e meya yusu-o. Nde, kat lak tak kubuwokluk yiga nab-e mondok inggi mbara nin me nan me mbiriga-o.

²⁰ Mbo inpidnak ereba woragolat-nen ndet inpidnak li ereba na-nen kat yak korogolar-e: ’Nggweyak yu me-ge mondok yebet tak me, nit wolmomtak nggweyak wok nindi-o’ luk yuwa-o.

²¹ Iri yak korogola, kat-nen kindi arem-nen perasolar-e: ’Li marik yeba-ge an namanggim-e ta-nen ndesa ligik pij-o? An nilirag-e kabak yikma-ge, tugurug-e ndet inpigit lak woragi-o. An-e mbo unpugwi sa ereba me mbo nibikma, inggi mbara narik ereba woragi-o. Nde, li yeba-ge ngge me-nen lobok yiga-o? Nde li yeba-ge ta-nen nggok tak inpij-o?’ luk yugun-o” luk yij-o.

²² Nagawan Indo Mondok Kek tak iri na-nen at ilirak yak ondosolar-e: ”An-nen-e ap enlem oboksa enpem pumu, it-nen kinlirak tuguruk inpil lobok yogolar-e, kinlirak li ab-e onmbol pem pak nggerasa waruk lobok yogolat, nde, kinlirak li kwami-ge yatka inpil lobok yogolat kwaruwa-o.

²³ Nagawan nagawan-e kit kineid nggal kwat yogolat, nde, it onkwerag-e kit kiniya nggal kwat yogolat mao. It-nen kat keram tebe yogolar-e, kat keram entare nggwe tud luk kat kek tak kubuwa-o. Iri yogola, kat-nen an nimin-e: ’At iri-ge Nagawan Indo-net yusu-o’ luk neberagun-o. Nde, indi an nebem wat tak wolma nab-e indi kabak ma bug-o” luk yij-o.

²⁴ Kit-nen kin wanogolar-e: ”Wim kugun pem mengga wanidnak mende-ge wim wari ininggen-nen mengga wanurag-e ndag-et, lak? Are, ap kamat unpuruk lobok yidnak ap isilepma worak inggiyapma-nen mengga wok unpurag-e ndag-et, lak?” luk yugub-o.

²⁵ Iri yogola, Nagawan Indo-nen onggo yosolar-e: ”Kit-nen kwat ma bug-o luk perali iri nggal-et kwat ma-o. Wim wari-nen kugun pem wanidnak nap tuguruk mengga wanogolat, insilepma worak nap-nen kugun mengga wanidnak silobulo ereba na tuguruk mengga wanogolat kwaruwa-o. Iri kwat ma iri-ge an nondomok-nen kunuwim nab-e ondosolat, nde, kit kinlirag-e inmiri yimin-o.

²⁶ An-nen-e kunuwim nab-e inndi lak lak tak posola, it nak it nak wat kerak mbuwa-o. Iri kwarogolat, ap enlem oboksa-nen enaru yogolar-e, Nagawan Indo kinmiri yoso nap an neresa-nen kinmiri yusu-o luk enaru ma-o. Iri-nen an-e Yakup Embal Pem Nagawan Mondok Amawi Worak wisirik konposo-nen yusu-o luk enaru ma-o” luk yij-o.