YESAYA 46 - Nanduk Ngget Tul Pidnak Wene

¹ Mbabilonia nap-nen erembel wanugwi kugwiwak ereba na lak yi-o. Nandug-e unkugwiwak Mbel min Nebo min erembel wanugwi-t nde, yawo-ge kelerai wam ababok lak ereba na ebem angin tak pogolat, ombolwak pem yatku pili-o.

² Kugwiwak ereba-ge wim kugun pem waruk mburugwi nggal waruk mborogola me, it-nen it kud unduruk mbitli ereba na yongga undurag-e meya-o. Iri kwatli bem-e kugwiwak ereba-ge nggaruksa lak yij-o.

³ An nilirak marig-et keya kinpidnak Yakup-nen wigarak wa-e. Kit oboksa-nen an-nen yidnak wene kwara koler-o. Kir-e nggeret ndesa mbogola-net an-nen kwara ndegel kenperenak woraso-o.

⁴ An-e pem irit kit Kenmbal Pem Nagawan irit worasoma, kir-e kindi worak yogolat, an-e pem irit yik keneyarok worasoma, kenkeren mborosolat kwarusu-o. An-net ndak worak kunpuruk, ndegel konposolat woraso-o. Abok an-net yongga kondosolat, kinmiri yosolat yimin-o” luk yij-o.

⁵ Nagawan Indo-nen yosolar-e: ”Ta nggal nde an nimin ndak ndak tak pugub-o? An nimin ndak ndak tak purak mbi worasu, lak?

⁶ Ap-nen-e kot manik wesera keya buruk, ontol emas tol kenangga mberak puruk, ontol perak iri na-ge angin ndak wurugwi mende bem ndak wutluk, angin kagwi-o. Iri rak puruk, emas konoso nap iri na-nen kugwiwak ndak worak unpuwaklug-e, onggo wok tugwi-o. Nde, ndak worak posoma-ge, ndak worak pidnak iri na erembel wanugwi-o.

⁷ Nde, kugwiwak ndak wiridnak iri na-ge endak pem yogo wosa waruk mbutluk, posid luruk wosa ondoro purak sa iri na me pugwi-o. Nde, iri na me posoma-ge, nin me mbirigit lak, iri na me nak irit mendak woraso-o. Nde, ap-nen nde eram tepan yogola-ge, enne erep nggarigit lak, anggun panggun arem-nen inmiri yigit lak irit woraso-o.

⁸ Wene eyak wurugwi nap wa-e. Iri-ge kwara yebet karuk, kinndi kwara wal ker-o!

⁹ Nanduk ereba-nen kwat yid ereba na kwara kinndi yebet ker-o. An nimin-e kit-nen-e: ’Ar-e Mbal Pem Nagawan-net yusu-o. Nin mbi worasu bug-o. Ar-e Mbal Pem Nagawan-nen yusu-o. At nggal nin mbi worasu-ge lag-o’ luk yer-o.

¹⁰ Abok-nen kwat momtak wene-ge nanduk-net yak kundukmu-o. Abok-nen kwat momtak wene-ge abuwokma nanduk-net urul pukmu-o. Iri yosolat-nen an-nen yosolar-e: ’An-nen irit kwarimin-o luk mbarigi wene-ge mondok kwar-et ma-o. Nde, an nindi-n pidnag-e mondok kwarimin-er-o’ luk yigi-o.

¹¹ An-nen-e ap amawi worak misik mo luwaso (timur) nggwe-nen yonggo bimin-o. An-nen ’Irit kwarimin-o’ luk mbarak pigi wene iri na kwarurak pem-e at iri-ge towe ud nggal lobok yuwa-o. Lobok yosolar-e, an-nen kwarurak peragi min an-nen kwarurak yigi min mondok kwaruwar-o.

¹² Wene kulugwi buk nap wa-e. An-nen yidnak wene kwara koler-o. Kit-nen peragolar-e: ’Ombol nggwe yurak iri-ge awo erepma ereba worasu-o’ luk yebet kali-o.

¹³ Kit wisirik kunpurak tarem-e panggo rak pigirik me, kit kinmiri yurak pem-e mondok pemsa woramin pug-o. An-nen-e Yerusalem imiri yosolat, Isarael nap kek tak onposolat kwarimin-o” luk yij-o. 47:1–48:22 Pasal 47 iri arem-e Mbabel lak tak purak yidnak ndawi mbarak worasu-o. Nde, Pasal 48 iri arem-e Mbal Pem Nagawan-nen-e at ilirak inmiri yidnak wene ndindera mbaridnak worasu-o.