YESAYA 45 - Nanduk Ngget Tul Pidnak Wene

Nagawan Indo-nen Nagawan Kores mendak pidnak wene 45:1-8

¹ Nagawan Indo-nen Kores iri na-ge nagawan irit lena mendak ibij-o. Nagawan Indo-nen at ebem posolar-e, ap enlem oboksa urugwe nggwe rak unpurak min nagawan nagawan ereba na-nen o tena woragwi enmawi ereba na pok tak onposolat kwarurak min irit ebem pij-o. Nagawan Indo-nen-e at ambigir-e o siri ereba na pak tumende oboksa-ge kuwarak puwa-o. Misiget min mondok lerak wolma bug-o. Nagawan Indo-nen Kores yak tosolar-e:

² ”An-nen kat kamanggim tu yagosolar-e ndobo min ndobo amun min an-nen yamuk sa ndak ndak tak pimin-o. Pak tumende tembaga posid-nen konidnak ereba na an-nen yenggana keya bosolat, tu imid wiridnak mbesi ereba na tenggesa keya bosolat kwarimin-o.

³ Kat-nen-e an nimin-e: At iri-ge Isarael Embal Pem Nagawan, Nagawan Indo an nunu luk wene mbo nibid-nen yusu-o’ luk peranokluk, yemndak kura woraso silobulo wok kirimin-o.

⁴ Kat-nen-e an-e kwara karu yigit lak yosola-t nde, an-nen-e wene mbo kuburuk, kunu yarosolar-e, kek tak onposo unu iri na kebem pusu-o. An ndegel nubugwi nap Isarael nap iri-ge an-nen len inpidnak me, yongga undurak yabu kebem pusu-o.

⁵ Nagawan Indo nin mbi worasu-ge lag-o. An narig-et worasu-o. Mbal Pem Nagawan-e misiget an nak-nen yusu-o. Kat-nen-e an-e karu bug-et nde, an-nen-e san kinggem pusu-o.

⁶ Ereba oboksa kwat kubusu ereba karug-e, mo luwaso nggwe kuri-nen mo mboso nggwe kuri woragwi nap oboksa-nen an nimin peragolar-e, Mbal Pem Nagawan nin mbi mondok worasu bug-o. At arig-et nak Nagawan Indo-nen yusu-o luk enaru makluk kwarusu-o.

⁷ Yaya min ndamuk min-e an-net ndak woroso-o. Imbiri lamut min inmbiringgat min-e an-net enpem poso-o. Ereba oboksa kwaroso-ge Nagawan Indo an-net yusu-o.

⁸ An-nen-e mbal pem-nen ombol nggwe yugwi elem-e talme nggal nggilara mberak pil mbuwasola, nggweyag-e ebem mbuwakluk larok nak ma-o. Iri yosola-ge, iri arem-nen inmiri yoso elem min wisirik woragwi elem min nam tak puwa-o. Iri kwat ma iri-ge an Nagawan Indo-net kwarak posola-nen kwat ma-o” luk yak tij-o.

Nagawan Indo iri-ge o yu ombol pem Nagawan min kwarogolat woraidnak ereba na konoso nap min-nen yusu-o 45:9-19

⁹ Enpe ndak worak inpid nap iri na imin korong yili nab-e mondok enabuwa worag-o. Iri kwatli nab-e nggweyak yimbe-nen at kwat ibidnak nap iri na imin korong yidnak nggal kwatli-o. Mimi nggweyak-nen yimbe at kwat ubusu iri na yak tosolar-e: ”Kar-e no kwarusu-o?” luk yak toso-a? Nde, yimbe iri na-nen-e at kwat ibidnak nap iri na imin-e: ”Kar-e kona kwat nuburag-e karu bug-o” luk yak toso-a?

¹⁰ Ap-nen nde ineid iniyarak yak ondogolat nde: ”Kir-e yu nggal ndet ninpigep yu-ge meya-o” luk, iri nggal nde yogolat ala-ge, mondok enabuwa worag-o.

¹¹ Nagawan Indo Isarael nap Enmbal Pem Nagawan Mondok Marak iri na-nen yosolar-e: ”Abok-nen kwarurak wene-ge an muk niyudtag-o. Alat nde, an nilirak onowene an kin wok nobogolat, ’Yu nggal kwari-o’ luk an yak norogolat, iri nggal-e yak nururak pug-o.

¹² An-e o yu ndak worak puruk, o yu na bem ap wolmakluk nggweyakma nap ndak worak inpigi-o. Iri kwarosolar-e, an namawi bem-net mbal yemarak pigi-o. Nde, mo min waneya min wonaru min ereba-ge an-net tena worasu-o.

¹³ An nindi-nen pidnak iri na kwaruwakluk, an-net Kores arem yabu wanosola, at-nen kwarosolar-e, mot mot nak kwarugwi irit nggok tak puwa-o. At-nen mbururak tula-ge an-net yamuksa ndak ndak tak pimin-o. At-nen nuwi siri Yerusalem iri na-ge tuguruk worosolat, nilirak wim kugun pem wok unpuruk mbirigarik, yemndak unpuruk worali ereba na wisirik unpuwa-o. Nde, wisirik unpurak pem ’Onggo wok neret’ na yigit lak, we irit wisirik unpuwa-o” luk, Nagawan Indo amawi worak iri na-nen yij-o.

¹⁴ Nagawan Indo-nen Isarael nap yak ondosolar-e: ”Mesira min Sundan min woraso silobulo iri-ge winde yugub-o. Seba nap enpe mot enmawi worak ereba na-ge kit kenarengge nggal kwatluk, kere kamarak-nen kinmbirik mburuwa-o. Iri kwarogolat, kendam entare nggwe tud yogolat-nen para yogolar-e: ’Mbal Pem Nagawan-e ndemeret kit kennggendumu worasu-o. Mbal Pem Nagawan nin at nggal erep mbi worasu bug-o.

¹⁵ Isarael nap inmiri yoso Mbal Pem Nagawan iri-ge kura nak woraso Mbal Pem Nagawan-nen yusu-o.

¹⁶ Ininggi-nen kugwiwak ut memerak ndak witli nap oboksa-ge nggweyera innggiri wosa keya buwa-o.

¹⁷ Alat nde, Nagawan Indo-nen-e Isarael nab-e inmiri yuwa-o. Nde, at-nen inmiri yidnak iri-ge mondok pem inmiri mbarak irit wolma-o. Pem irit woragolat nagolat nggweyel na kinpigit lak, kinnggiri na wirigit lak irit woragub-o’ luk yak kunduwa-o” luk yij-o.

¹⁸ Nagawan Indo mbal ndak worak pid iri-ge Mbal Pem Nagawan-net yusu-o! At iri-net o yu-ge kwarak posolat, ndak worak pamu-o. Iri yamu, o yu-ge tugup lak irit mendak worasu-o. At-nen o ndak worosolar-e, we o nak ap tuporak wolmakluk ndak wirigit lag-o. Are, enpe wolmomtak ondoro worak irit ndak worak pamu-o. At-nen yosolar-e: ”An-e Nagawan Indo-nen yusu-o. An nggal erep mbi worali-ge mondok lag-o.

¹⁹ An-nen wene yosolar-e, kurak kurak yosolat, mbik mbok kurasa yosolat iri-ge yoso bug-o. An-nen-e nilirak Isarael nab-e we ereba-t nogore yuwakluk, ’Nin nggwe nogore yer-o’ luk yak ondoso bug-o. Nagawan Indo an-nen-e ndemeret nak yak ondosolat, ndemeret wene iri nag-et enaru rak posolat kwaroso-nen yusu-o” luk yij-o.

Nagawan Indo Mondok Amawi Worak iri na Mbabilonia iri me-nen erembel wanugwi kugwiwak imin ndak wiridnak wene 45:20–46:13

²⁰ Nagawan Indo-nen yosolar-e: ”Kit ap enlem oboksa ennggendumu kenlengenwak worali nap oboksa-nen ndak worak puruk, lambuksa misik mu lobok yer-o! Kugwiwak e bem-nen ndak wiridnak ereba waruk nogolat, at iri-nen inmiri yurag-e lag-et nde, iri na eram tepan yogolat kwatli nab-e mondok wid-nen yili-o.

²¹ Kit-nen konowene nam-et nak yak nerer-o. Ndemerer-o luk yurak wene-ge para nam-et nak yer-o. It ereba-ge lambuksa wene mbaruwag-o. Ta-nen nanduk-net wene iri-ge wigarosolat, kenaru rak posolat kwaramu-o? Nagawan Indo an-net kwarukmu-o. Kugwiwak Mbal Pem Nagawan an nggal misik mbi worasu-ge lag-o. An-e mot mot kwarosolat, inmiri yosolat Mbal Pem Nagawan-nen yusu-o. An nggal nin mbi worasu bug-o.

²² Yi wi ndi wi woragwi nap oboksa wa-e. Mbal Pem Nagawan-e nin mbi worasu buk, an nak me, kinmiri yek-nen nden karuk, an neram lobok yer-o.

²³ An-nen-e ’Irit kwat kinpimin-o’ luk urul pukmu-o. Nde, an-nen urul yigi iri na-ge lugud tak pimin pug-o luk, an nondomok nunu bem owak mbarosolar-e, ap oboksa ondomoktak-nen enndaru yunggusa tud yogolat, it ondomok enne bem-net urul pogolar-e: ’Tugup lak, pem irit kat-nen yidnak yidnak kwarogolat wulmul-o’ luk urul yak nuruwa-o.

²⁴ Ap-nen yogolar-e: ’Nagawan Indo nak-nen ombol nggwe yugwi elem min mot mot kwarugwi elem min iri-ge wok ondoso-o’ luk yuwa-o. Alat nde, an insili rak nubugwi nap oboksa-nen an neram lobok yogolar-e, innggiri ma-o.

²⁵ Alat nde, Yakup-nen wigarag-e inmiri yosola, it-nen-e Nagawan Indo an nerembel wanuwa-o.