YESAYA 44 - Nanduk Ngget Tul Pidnak Wene

Nagawan Indo Mbal Pem Nagawan iri-ge mondok misiget nak-nen yusu-o 44:1-8

¹ Nagawan Indo-nen yosolar-e: ”Ndegel noboso nap Yakup min an-nen len kinpigi nap Isarael min wa-e. Mondok kwara koler-o!

² Nagawan Indo an-nen-e ndak wat kobosolat, nanduk kiya arem kwarak kobosolat, yongga korosolat yigi Nagawan Indo-nen yusu-o. Kwiye kasu-ge meyog-o. Kar-e an ndegel noboso nap, an-nen len kibigi nindi kundik-nen yusu-o.

³ An-nen-e yi-ge nggweyak amburu lak pem kilik posolat, nggweyak mbeng larak pem-et nde, yi wirik posolat kwarimin-o. An namawi-ge kat-nen wigarak ininggem posolat, kat kilirak-nen ndaguwa imbiringgat tak onposolat kwarimin-o.

⁴ Ir-e yi eyak pem yak yidnak tusuangge nggal arim irit lagolat, e nggandarusa yi eyak pem yak yidnak nggal irit wolma-o.

⁵ Ap ondomok tak ininggi bem engga mbarogolar-e: ’Nagawan Indo arengge-o’ luk mbaruwa-o. It-nen unnu yak koragolar-e: ’Mbal Pem Nagawan ilirag-o’ luk yuwa-o” luk yij-o.

⁶ Nagawan Indo Mondok Amawi Worak Isarael nap nggetlel onposo Nagawan Indo iri na-nen yid wene-ge yu-o: ”Mbal Pem Nagawan misiget an narik nak tel koroso min woroksiyem min-nen yusu-o. Mbal pem nagawan erep mbi mondok worasu bug-o.

⁷ An nggal-e ta worasu-o? ’Kat nggal-e an-er-o’ yuwak-nen yak ter-o. An-nen ndemerer-o luk perayek-nen an mul nuruwag-o. Tel kwiridnak kuri-nen woroksiyem kuri ereba-nen kwat momtag-e ta-nen ’Iri nggal kwat ma-o’ luk abuwokma ereba-nen urul pamu-o?

⁸ An nelem nap wa-e. Kwiye yogolat, wendet yogolat yurak pug-o. O nanduk-nen kuri yawo-ge kwat momtak mende-ge an-nen urul poso-ge kir-e mondok kenaru iri nar-o. Kura onposo nap erep mbi worali bug-o. Iri-nen an-nen na eneyaso bug-o” luk yij-o.

Kugwiwak erembel wanugwi iri-ge inndi lak-nen kwarugwi kwatli-o 44:9-20

⁹ Ap kugwiwak ut memera inggi ijok kwasa ndak wurugwi nab-e ebe lak mende-nen yili-o. It-nen erembel wanugwi kugwiwak iri na ebe lak mende-nen yusu-o. Kugwiwak ut memera ndak wiridnak iri na erembel wanugwi nab-e mondok enlengen ngguru, mondok mariget tet enaru buk nap me, innggiri kujwa-o.

¹⁰ Yi mende ndi mende ut memera kugwiwak misik ndak worak puruk, mbal pem nagawan nggal tak puruk, erembel wanili iri-ge ebe lak mende-t kwatli-o.

¹¹ Kugwiwak ut memera ndak wiridnak erembel wanugwi nab-e oboksa innggiri yuwa-o. Kugwiwak iri ndak witli nab-e ndemeret nggweyakma nap-net ndak witli-o. Iri ala-ge, it oboksa-nen enpem wene mbenaruwak-nen enpem wene mbenarugwi sa lobok yuwag-o. Iri yogolar-e, ir-e ndemeret kwiye luk, innggiri ma-o.

¹² Mbesi kwaroso nap-nen-e mbesi mbi waga kan ma wora buruk, ndonggwid pem-nen kwaroso-o. Kwarosolar-e, mondok amawi oboksa lak tak poso-o. Iri kwasa wanosolar-e, nere ebem wok yosolat, yi nere yogolat, ababok lak yosolat kwaroso-o.

¹³ E konoso nap iri na-nen e iri na ndak wosa keya buruk, luruk pem memera ndak worak purug-e, engen mbara kona irit ndak worosolar-e, ap ut mimirik kona tenaga irit ndak worak puruk, ama poso-o.

¹⁴ Iri nggal ndak wururak pem e-ge libe ala na, e eru ala na, e terepentin ala na irit walma-nen ndatluk, ereba na bem-net ndak woroso-o. Nde, erep-nen-e e salam uwi yaguruk, irit worasoma, talme mbosolar-e, e na-ge mboroso nde ma-o.

^15-17 E iri na ndatlug-e, ereb-e kan tak purug-e, kan tonggosolat, kan na engem pem-e oroti min uno min woraguruk, nasolat ndak irit woraso-o. Kan tonggosolat-nen yosolar-e: ”E! An-e kona-t nembem pulsa worasu-o!” Iri yosolar-e, ndemeret kan iri na indingen tak poso-o. Nde, kan ereba na ereb-e at-nen erembel wanurak kugwiwak ndak woroso-o. Ndak wosa puruk, at-nen ndak worak pidnak iri na kek tak posolat, eram tudluk-nen tepan yosolat-nen yosolar-e: ”Kar-e an nembal pem nagawan-nen yusu-o. Kat-nen an nimiri yi-o” luk yoso-o.

¹⁸ Nde, ap iri nggal kwatli iri-ge mondok ndemeret wid-net yili-o. Iri kwatli nab-e enlengen min inndi erengen min-e ndamuk muruk tak yebet kagwi buk-nen yili-o.

¹⁹ Kugwiwak iri na ndak worosolar-e, indi-ge yebet kagit lak-nen kwaroso-o. At-nen-e yu nggal yurag-e yebet kaso bug-o: ”An-nen iri kwarosolar-e, e erep minggirig-e kan maburuk, kan engen pem-e an-nen norak oroti min uno min woragoso-o. Nde, e iri na erep mbarag-e kugwiwak ndak wosa bigi-o. Iri ala-ge an-e e ereba na erep mbarag-et erembel wanusu-o!” luk yebet kagit lak-nen kwaroso-o.

²⁰ Iri nggal kwarusu iri-ge mabe ninggidnak nggal-nen yusu-o. Ap iri-ge indi yebet kaso wid iri-nen amberam lasola, at indi imiri yurag-e meya yusu-o. At-nen-e ut memera ndak wosa pidnak mende at inggem worasu iri-ge ndemeret enmberam laso ebe lak mende-nen yusu-o luk para yigit lak yoso-o.

Nagawan Indo iri-ge ndak worosolat, inmiri yosolat yoso-nen yusu-o 44:21-28

²¹ Nagawan Indo-nen yosolar-e: ”Isarael wa-e. Kar-e an ndegel noboso nap me, kar-e yeba oboksa kindi yeberak wolmin-o. Kar-e an ndegel noboso nap yonokluk, kar-e an-net kwarak kubukmu-o. Isarael wa-e. An-nen-e mondok meme rak kibimin pug-o!

²² Kat-nen lugudtak kwaroso-ge an-nen nggan nggan nggal ko sa wirik pigi-o. Kat meya yidnag-e an-nen o age nggal pu yaga wirik pigi-o. Kar-e an-net wisirik kubukmu me, tuguruk an neram lobok yi-o!” luk yij-o.

²³ Mbal wa-e. Kalen kasolat, kene lek ki-o! Nggweyak arem woraso oboksa wa-e. Kalen kasolat, kene lik lek ki-o! Ndobo min wal min walma woraso e min wa-e. Kenalen-nen kenne nggu lek ker-o! Nde, Nagawan Indo-nen at-nen kek tak woraso iri na nuk kasolar-e, at ilirak Isarael nap wisirik unpuwakluk, onnggo bamu-o.

²⁴ Nagawan Indo Kimiri Yoso Nap, kiya arem nanduk-net kwarak kibid nap iri na-nen yu nggal yij-o: ”Nagawan Indo an-nen yi mende ndi mende oboksa ndak worak posolar-e, an narig-et nak mbal yemarak pigi-o. O yu ndak worosola-ge, mondok yongga nirigit lak, nondomok nak-net ndak wirigi-o.

²⁵ ’Iri kwat ma-o’ luk, urul pugwi nap-nen urul pugwi iri-ge an-nen ebe lak mende rak poso-o. Nde, ’Iri nggal kwat ma-o’ luk, kugwi tu mbarugwi nap ereba na-ge an-nen nerengenma nggal tak onposo-o. It-nen indi worak elem pem wene yugwi na an-nen eyak worosolat, it inndi nggat nggat elem na an-nen wid inndi rak onposo-o.

²⁶ An ndegel noboso nap-nen yidnak wene-ge an-net amawi rak poso-o, Nde, an-nen wirik pimin nap iri na-nen ’Iri nggal kwarimin-o’ luk, nam tak pidnak iri na-ge an-nen kwarak poso-o. Nde, an-nen yosolar-e: ’O Yerusalem iri-ge tuguruk ap wolma-o. Nde, o Yewura siri iri-ge tuguruk mendak pil lobok yimin-o. Nde, o mijara tud yil lobok yid ereba-ge tuguruk nanduk woraso nggal tak pil lobok yimin-o’ yigi-o.

²⁷ An-nen yi koma yak tosolar-e: ’Eberek yi-o! Kat-nen idnak yi ulusu ereba na eberek tak pimin-o’ luk yak toso-o.

²⁸ An-nen Kores yak tosolar-e: ’Kat-nen-e an nondolma sa nagawan woralar-e, an nindi-n pidnak ndak ndak kwarosolat woragun-o. O Yerusalem iri na tuguruk worosolat, Nagawan Indo uwi iri na ugwi bosolat yonokluk kebem pigi-o’ yak tigi-o” luk yij-o.