YESAYA 43 - Nanduk Ngget Tul Pidnak Wene

Mbal Pem Nagawan-nen at ilirak weserak unpurak urul pidnak wene 43:1-7

¹ Isarael wa-e. Nagawan Indo-nen yak kondosolar-e: ”An-net kwarak kobosolat, ndak wat kobosolat kwarukmu-o. Kar-e kwiye yurak pug-o. An-net mondok kimiri yimin-o! An-nen-e kat kunu luk, wene mbo kubukmu-o. Kat yu-ge an narengge-nen yusu-o.

² Yi yi ndi yi ereba mbaril mborosola-ge, an-e kimin-et mbirimin-o. Kar-e anggun panggun ereba arem yubuksa mbugun pug-o. Kanduk arem kuwok pugun-et nde, kan-e nunggun pug-o. Angin worak nggok kebem mbuwa-t nde, konak nak woragun-o.

³ An-e Nagawan Indo Kembal Pem Nagawan, Kimiri Yoso Nap Mondok Marak Isarael Kembal Pem Nagawan-nen yusu-o. Kat lerak kubuwakluk onggo-ge Mesira pimin-o. Kat kondolma uwi yaga-ge Sundan min Seba min pimin-o.

⁴ An nerengen pem kar-e mondok nggok-net yusu-o. An-nen-e kat kek tak kobosolat, kabuwa-t kasu me, an-nen-e kat kondolma-ge ap posolat, nde, kimiri yosolar-e, ap enlem kwarat ereba pimin-o.

⁵ An-nen nggetlel kuburuk worasu me, kwiye yusu-ge meyog-o. Kat kilirak-nen ndagidnak konmborag-e mo mboso (barat) nggwe-nen, mo luwaso (timur) nggwe-nen wirik inpil lobok yumu, ndok wiril lobok yuwa-o.

⁶ An-nen-e abare abam (utara) nggwe min abare ena (selatan) nggwe min yak tosolar-e: ’An nilirag-e pem tena unpuruk wolmomtak pug-o. Ndag-et nak lera keya enper-o’ yimin-o. An nambararag-e erepma-nen lobok yogolat, an nararag-e nggweyak erep yoboksa-nen lobok yogolat ma-o.

⁷ An nilirak iri unnu yogolar-e, an neresa ilirag-o yugwi-o. Nde, an kek tak nubuwakluk, ndak wat unpukmu-o” luk yij-o.

Isarael nap iri-ge Nagawan Indo enaru nap 43:8-13

⁸ Mbal Pem Nagawan-nen yosolar-e: ”An nilirag-e enlengen worag-et nde, enlengen ngguru min eneyanggo worag-et nde, eneyanggoru lak min-e ndak yu me wirik inpil lobok yer-o.

⁹ Ap enlem oboksa min ap enne lombok oboksa min ndok wiril lobok yuwakluk yak ender-o. It unkugwiwak enggendumu kugwiwak ngge nggal-nen yawo-nen kwat yusu mende yeba-ge ’Iri nggal kwat ma-o’ luk nandug-et urul pamu-o? Ereba enggendumu-ge ta-nen nggal abok ereba-nen kwat ma mende-ge ’Iri nggal kwat ma-o’ luk urul purak ndak worasu-o? Iri ala-ge, iri kwarogola enlengen kagwi ndok worogolar-e, ’Ndemeret it yu-ge irit kwarugwi-o’ luk yuwag-o. Iri yogola, ap erep-nen kulurug-e, ’Iri-ge ndemerer-o’ luk yuwag-o!

¹⁰ Nilirak Isarael nap wa-e. Kir-e an-e kenaru-o. Kit-nen an kenaru yogolat, kinndi an nebem wat tak puruk woragolat, kit-nen yebet kagolar-e, ’Ar-e ndemeret Mbal Pem Nagawan-net yusu-o’ luk yobokluk, an-nen-e ndegel nubugwi nap kwat yobokluk len kunpukmu-o. Mbal Pem Nagawan-e misiget an narik nak-nen yusu-o. Nanduk-nen na irit, abok-nen na irit mbal pem nagawan mbi mondok worasu bug-o.

¹¹ Nagawan Indo-ge an narig-et worasu-o. Kinmiri Yoso Nap misik mbi worasu-ge lag-o.

¹² An-net urul yak kondosolat, an-net kinmiri yigi-o. Mbal pem nagawan erep kit kennggendumu worasu ereba-nen-e kinmiri yigit lag-o. Iri kwarosola-ge, kit kenlengen-nen karuk, kenaru yigeb-o. An-e Mbal Pem Nagawan-net yusu-o.

¹³ Pem woragolar-e, Mbal Pem Nagawan an-e pem irit Mbal Pem Nagawan irit woramin-o. An ninggem-nen-e mondok mbi mengga mburuwa bug-o. An-nen kwarurak nindi pidnag-e lak tak puwa bug-o” luk yij-o.

O Mbabilonia-nen wisirik inpidnak wene 43:14-21

¹⁴ Kinmiri Yoso Nap Nagawan Indo Isarael Embal Pem Nagawan Mondok Marak iri na-nen yosolar-e: ”Kit kinmiri yuwakluk san ombo-ge an-nen Mbabilonia wirik inpimin-o. O kubu me tumende imid worak pidnak iri na-ge an-nen mijara konoksa mbo bimin-o. Kasndim nap enalen-nen kek kok pem wolma iri na-ge nggweyera yip tugwi rak inpimin-o.

¹⁵ Isarael wa-e. An-e Nagawan Indo Kembal Pem Nagawan Mondok Marak kat ndak worak kibigi, kat-nen idnak Nagawan-nen yusu-o” luk yij-o.

¹⁶ Nagawan Indo-nen tula yagosolar-e, yi koma mondok saberep mbaberep lobok yusu iri na nggwe-t yagij-o.

¹⁷ At-nen-e san wari min san ombo min ’Wim nggwer-o” yak ondosoloma, san ombo-ge wim koma bem min kura wam ombol pem min kore luk nggukmu-ge, nggwiga-ge nggwiga nag-o. Mondok mbi wagit lag-o. It na-ge kolpo tal nigi yoso nggal mondok lak yiga-o.

¹⁸ Nagawan Indo-nen yosolar-e: ”No manggim-nen nanduk-nen kwat yidnak wene ereba kindi yeberak wolmomtag-o. Iri-nen nanduk-nen kwaridnak ereba na tena wolmomtag-e wewesa-nen yusu-o.

¹⁹ An-nen ngget nin kwarimin mende iri kwara lombot posolat wolmin-o. Yawo-ge tel kurusu-o. Tel kurusu yu-ge kar-e kasu buk, lak? An-nen nembaga tula ombolwak posolat, nembaga karu me yi wirik pil lobok yosolat yimin-o.

²⁰ Towe mena erengen kege-nen na an kek tak nubuwa-o. An-nen len inpigi nilirak ereba na nujwakluk, an-nen nembaga ereba me yi wirik pimin ereba na karug-e, serigala ndakngge min towe unta min-nen-e an nerembel wanuwa-o.

²¹ It iri-ge an nondomok namanggim-et nilirak kwarak unpukmu-o. It-nen-e ndawi bem an nerembel wanuwa-o” luk yij-o.

Isarael nap-nen meya kwarogolat woraidnak wene 43:22-28

²² Nagawan Indo-nen yosolar-e: ”Alat nde, Isarael kir-e an kek tak nobogolat, an nerembel wanogolat woragwi na-ge keya bigeb-o.

²³ Kit-nen-e konlomba wam-e an namanggim kan purak waruk lobok yigit lak yogolat, kit-nen an namanggim pugwi mende bem an kek tak nibili bug-o. Nde, an-nen-e kit angin tak konposolar-e: ’An namanggim wosa purak mende per-o’ yak kondosolat, kit anggun panggun tak konposolar-e: ’Emben worak kemenan namanggim per-o’ luk yak kindigit lag-o.

²⁴ Kit-nen-e emben konak mende an namanggim onggo pigit lak, an namanggim wam wutluk omok an nindi-n pidnak ndak tak pili bug-o. Alat nde, kit-nen perak meya kwarugwi yeba na bem an angin tak nibili-o. Kit-nen lugud tak kwarugwi ereba bem-nen an anggun panggun tak nibili-o.

²⁵ Iri yogola-t nde, Mbal Pem Nagawan an-net kit meya yidnag-e namberam tak pusu-o. An-e ap meya yidnak namberam tak poso-t me, kit meya yidnag-e namberam tak pusu-o. Kit-nen meya kwarugwi-ge yeberak woramin pug-o.

²⁶ Nindi yeberak pogolat wolmer-o. Wene enpem mbenarugwi sa mburuwog-o. Kir-e ndemeret konak nab-er-o yuwaklug-e, kit-nen kwarugwi oboksa pugara nam tak per-o.

²⁷ Kit konmbo nandug-er-e meya-t kwaramu-o. Kit kennggendumu enne kulugwi nap-nen-e an nimin eyak worogolat woraiga-o.

²⁸ Kit-nen idnak tepan ombo ereba na-nen-e an nuwi iri na-ge emben to rak pikma-o. Iri yogola karuk, Isarael nab-e pesel unpuwakluk keya unpukmu-o. Nde, Yakup-nen wigarag-e mondok lak tak unpuwakluk keya unpukmu-o” luk yij-o.