YESAYA 41 - Nanduk Ngget Tul Pidnak Wene

Mbal Pem Nagawan-nen Isarael nap kwara yak indidnak wene 41:1-20

¹ Mbal Pem Nagawan-nen yosolar-e: ”O erepma nin me nan me woragwi nap wa-e, Kenne lak luk, an nene nak koler-o! Kenpem wene mbenarurak sa wok yurak pem mondok lid lud tak per-o. Iri rak puruk, lobok yogolar-e, kit konowene mbena yer-o. Meya-ge ta? Konag-e ta? Erem mbenaruwokluk, lambuksa wene mbenaruwog-o.

² Ombol nggwe yoso amawi worak mo luwaso (timur) nggwe woraso iri-ge ta-nen arem yabu wanosolat pempa ombol nggwe rak nak eberenak woraso-o? Ta-nen kwat obosola-nen yi nap ndi nap urugwe nggwe rak onposolat, nagawan nagawan-e yemndak unpuruk woraso-o? At agabo-nen ir-e mabe nggal tak onposo-o. Esan-nen ir-e magere engen o wija-nen puk yaga ndibi ndi rak poso nggal ndibi ndi rak onposo-o.

³ It muk eneyasolar-e, mondok kondok tak uburak meya me, nok muk eneyasolar-e, ijog-e mengesa nggweyak pem poso bug-o.

⁴ Ereba oboksa-ge ta-nen kwat oboso-o? Pem kwarugwi murugwi yeba-ge ta-nen ’Kwarurag-o’ yidnak pem kwarugwi-o? Nagawan Indo an-e o yu ndak wirigit lak ma nanduk-net woraso-o. Nde, worok tak puwa tarem na woramin-er-o.

⁵ An-nen kwarigi ereba-ge o erepma erepma woragwi-nen-e kaiga-o. Karug-e kwiye-nen wendet yogolat, yot kot mbogolar-e, ndok wutluk, lobok yili-o.

⁶ Ap oboksa-nen yongga yongga inndi eyak wat kerak mbili-o.

⁷ Iri kwarogolar-e, e bem kugwiwak ndak wurugwi nap-nen-e emas pem konugwi nap inndi eyak worogolat, nde, ndonggwid pem kugwiwak iri na nabena labuk makluk lel kagwi nap-nen-e paru bem puruk, lel kali nap ereba na erembel wanogolat-nen yogolar-e: ’Kit-nen yabu wanili-ge mondok konak lombog-o’ yogolug-e, tugup laksa wolmakluk posid kuruk pem amawi rak pili-o.

⁸ Alat nde, an ndegel nubugwi nap, an-nen len kinpidnak nap Isarael kir-e an nenggam Abarakam-nen wigarak-nen yili-o.

⁹ Kir-e nggweyak erep yobok tak sa ereba-nen ndok wat kinpil nosolat, mondok erepma nin sa nan sa ereba woragola, wene mbo konposolat yidnak-nen yusu-o. Iri luk, an-nen yosolar-e: ’Kar-e an ndegel noboso nap-nen yusu-o. Nde, an-nen len kibigi iri-ge keya kibimin pug-o.’

¹⁰ Kwiye yusu-ge meyog-o. An-e kat kimin worasu-o. Kwiye-nen pabok purak pug-o. An-e kat Kembal Pem Nagawan-nen yusu-o. An-nen kar-e tugup lak tak kobosolat, yongga korosolat, ninggi amawi bem yogo kuburuk woramin-o.

¹¹ Yu ker-o. Insilepma kebem pugwi nap ereba-ge urugwe nggwe rak onposola, innggiri yaga labuk ma-o. Kat kimin wim mbatli nab-e mondok pu sa lak tak inpimin-o.

¹² Kat-nen-e kat kebem kore yugwi nab-e onkore yugun-et nde, mondok eneyagun pug-o. Kat kimin wim mbarugwi nab-e pendaga lak tak unpuwa-o.

¹³ An-e Nagawan Indo Kembal Pem Nagawan me, kinggi kigit nggwe puksa tena kobosolat-nen yak kurusu-o: ’Kar-e kwiye yusu-ge meyog-o. An-net yongga kirimin-o’” yij-o.

¹⁴ Nagawan Indo-nen yosolar-e: ”Isarael wa-e. Kar-e kamawi lak, enlengen kopkap nggal-et nde, kwiye yusu-ge meyog-o. Kat yongga kurusu an yu-ge Nagawan Indo-net yusu-o. Isarael nap Enmbal Pem Nagawan Mondok Marak iri-ge kat kinmiri yoso-nen yusu-o.

¹⁵ Kar-e an-nen-e nggandum engen mbilarugwi e mbet ngget eyak anggat obo mberen worak nggal kwarak kibimin-o. Kubumu, kat-nen-e ndobo ereba al lebara ndamera yigit sa keya bosolat, ndobo amun ereba kat-nen yigisa imine nggal tak pugun-o.

¹⁶ Iri rak puruk, kat-nen pil yaga keya onposola, kimamo-nen waruk mborosola-ge, o wija-nen nin me nan me ndibi ndi rak unpuwa-o. An-e kat-nen idnak Nagawan Indo ala karuk, kar-e kalen kagun-o. An-e Isarael nap Kembal Pem Nagawan Mondok Marak ala karuk, kar-e kindi kek yugun-o.

¹⁷ An nelem nap inmbiri lamut iri-nen yi kore yogolat, yi nere-nen enma umbuk yosolat kwarogola-ge, Nagawan Indo an-nen-e it-nen tepan yuwa-ge enne ereb-e nggarimin-er-o. Isarael nap Enmbal Pem Nagawan an-nen-e it keya inpimin pug-o.

¹⁸ An-nen kwarosolar-e, ndobo usu nggwarak pem-et nde, yi wirik posolat, mbirik yamuk tak ma-t nde, yi ulusu pilana mbo bil luwaso rak posolat kwarimin-o. Nembaga karu me-t nde, yi ugup yenggera pil lobok yimin-o. Nggweyak le rak arem-net nde, yi pilana pil luwamin-o.

¹⁹ Nembaga karu me-t nde, wariya uwi yagosolat, e murut min akasia min uwi yagimin-o. Nembaga karu-t nde, wal tak posolar-e, e eru min mberangan min wariya min wirik pimin-o.

²⁰ Iri yumu, ap oboksa-nen karuk, enaru luk-nen an nimin yogolar-e: ’Iri-ge Nagawan Indo abam-net kwaramu-o’ luk yuwa-o. It-nen kwara lombot puruk-nen yebet kagolar-e: ’Isarael nap Enmbal Pem Nagawan Mondok Marak iri na-nen kwaridnak pem-net kwat yamu-o’ luk yebet kujwa-o” luk yij-o.

Nagawan Indo-nen kugwiwak ereba na inmin ”Kenmawi kayeg-o” yak indidnak wene 41:21-29

²¹ Nagawan Indo Isarael nap ennggendumu Nagawan iri na-nen kugwiwak ereba na yak tosolar-e: ”Kit konowene mbi yer-o! Mabin puruk-nen kwarugwi iri-ge nam-et yer-o!

²² Kwat yosola nenaru yuwok-nen lobok yugupndik: ’Abog-e iri nggal kwat ma-o’ luk urul per-o. Nanduk-nen kwat yidnak wene ereba na-ge nit nenaru yuwok-nen ’Ebe-ge iri nggal-o’ mbena yer-o.

²³ Kir-e ndemeret mbal pem nagawan nggal-net yili-o luk nenaru yuwok-nen abok-nen kwat ma iri-ge yak nender-o. Nit-nen kit-nen kwarugup iri karuk, wi yuwok-nen konak ala na, meya ala na kwaret nag-o.

²⁴ Ndemerer-e kit min kit-nen kwarugwi min iri-ge mondok ebe lak-nen yusu-o. Kit entembel wanugwi iri-ge mondok sok wururak mende-nen yusu-o.

²⁵ Mo luwaso (timur) nggwe-nen ap misik arem yabu wanigirik, abare (utara) nggwe-nen kenpem kore yil lobok yuwakluk wene mbo ibigi-o. Nde, lobok yosolar-e, enmawi worak nab-e ujok-nen yemnda miril tak unpuwa-o. Nggweyak yimbe konoso nap-nen mimi nggweyak ijok-nen al lebarusu iri na nggal enal lebara keya unpuwa-o.

²⁶ Iri kwarurak wene-ge kwat yosola-ge, ’Yid iri na-ge kwat yid yur-o’ luk yuwokluk, kit kennggendumu-nen-e ta nggal-nen abuwokma-nen ’Iri kwaruwa-o’ luk urul pigepma-o? Alat nde, kit kennggendumu misik-nen mbi ’Iri nggal kwat ma-o’ luk urul pigit lag-o. ’Iri nggal kwat ma-o’ luk kit-nen mbi yogola, ap-nen na mbi mondok kuligit lag-o.

²⁷ Nandug-er-e Nagawan Indo an-nen wene-ge Sion woragwi nap enmanggim wirik pukmu-o. An-nen-e konak wene wigaroso nap Yerusalem wirik pukmu-o.

²⁸ Kugwiwak ereba na ennggendumu an-nen lombot onposoma-ge, misiger-o luk mbi tet ene worak kagit lag-o. Iri-nen wene onggo yurak na meya kagi-o.

²⁹ Ndemeret kugwiwak ereba-ge ebe lak mende-t kagi-o. Ereba-ge ininggi-nen kwaridnak amawi lak, at-nen kwarurag-e mondok amawi lak meya kagi-o” luk yij-o.