YESAYA 40 - Nanduk Ngget Tul Pidnak Wene

It-nen ebem inndi mbung mbung tak wolmomtak wene 40:1-11

¹ Kenmbal Pem Nagawan-nen yosolar-e: ”An nelem nab-e inndi yanggoner-o! Inndi yanggoner-o!

² Kit-nen Yerusalem nap inndi wi yabogolat-nen yak ondogolar-e: ’Ininggiyapma rak kunpuruk woragwi mende-ge lak yij-o. Kit-nen meya kwarugwi mende-ge an-nen nemberam tak pigi-o. Kit-nen meya kwarugwi oboksa ereba na bem-et Nagawan Indo an-nen angin worag-e mberen pem nambena kenpem pigi-o’ luk yij-o” yak ender-o.

³ Ene misik-nen nggoksa yosolar-e: ”Nembaga karu me Nagawan Indo mbururak tula yager-o. Nembaga karu me tula nggok Nenmbal Pem Nagawan amanggim marelengen nggal mot tak per-o.

⁴ Wondo oboksa kemek tak pogolat, ndobo amun min ndobo min oboksa ndamera ndak ndaksa yamuk tak pogolat, nggweyak amun ereba na-ge yamuk tak pogolat, nde, amun yud kud ereba na-ge ndeyara yamuk tak posolat ma-o.

⁵ Iri yosola-ge, Nagawan Indo abinal-e nam tak puwa-o. Iri yosola-ge, nggweyakma nap oboksa enlengen-nen kujwa-o. Ndemeret Nagawan Indo-net urul pusu-o” luk ene misik-nen yusu-o.

⁶ Nde, ene mbi-nen yosolar-e: ”Wene yu-ge wigarer-o!” yosoloma, an-nen kin wanosolar-e: ”No wene nde wigarimin-o?” luk yigi-o. Iri yosola, ene iri na-nen yosolar-e: ”Nggweyakma nap iri-ge tusuangge nggal-nen yusu-o. Engen isi puruk, yanem-et lak yoso-o.

⁷ Nagawan Indo-nen nde embem nde pu yaga pil lobok yosola-ge, tusuangge iri na nde umbuk yosolar-e, engen isi pidnak iri na-ge terabet yoso-o. Nde, nggweyakma nab-e ndemeret tusuangge nggal-nen yili-o.

⁸ Tusuangge iri na umbuk yosolar-e, engen isi pidnak iri na-ge terabet yoso-t nde, Nenmbal Pem Nagawan-nen yidnak wene-ge lak yigit lak, pem irit woraso-nen yusu-o luk wigarer-o” luk yusu-o.

⁹ Teram lagundik, konak wene yu-ge Yerusalem woragwi nap kuluwakluk wirik pi-o! Konak wene yu Sion woragwi nap yak ondosolar-e, kene nggoksa yak undurag-o! Yewura siri ereba me woragwi nap yak ondosolar-e: ”Kenmbal Pem Nagawan-e lobok yuwa-o” yak undurag-o!

¹⁰ Nagawan Indo Mondok Amawi Worak iri na lobok yosolar-e, o tenageyekluk amawi min lobok yusu-o. Nde, at-nen wisirik inpidnak nab-e at imin nduguluk lobok yusu-o.

¹¹ Ar-e wam yik karok woragwi nap-nen kwarugwi nggal wam kwarat ereba na kwara ndogorosolat, at ondomok-net ndak wat unpuwa-o. Lomba amarik ereba na-ge aringmu rak puruk, ija-ge yanggosa-t kona suluk mburuwa-o.

Isarael nap Enmbal Pem Nagawan iri-ge erep min ndak wururag-e mondok meya-o 40:12-31

¹² Ta-nen yi koma-ge inggi mok pem kenangga ndak woramu-o? Nde, mbal-e ta-nen inggi angga bem nak-nen irit ndak wosa pamu-o? Ta-nen ndak wosa wanugwi mende bem nggweyak ndak wosa posolat, ndobo amun min ndobo kek tak min-e ta-nen ndak wurugwi mende bem angin ndak woramu-o?

¹³ Ta-nen at-nen kwaruwakluk Nagawan Indo yak tosolat, ta-nen Nagawan Indo mul tosolat, nggomo worosolat kwaramu-o?

¹⁴ Nagawan Indo-nen-e enaru yugwi mende min yebet kagwi mende min mirik uburak pem-e ta kin wok ubusu-o? Nde, at-nen ndak ndak kwaruwaklug-e, ta-nen mirik pusu-o?

¹⁵ Nagawan Indo erengen pem-e yi ap ndi ap oboksa-ge yi tenggerengge misiget pem tenggesa mbidnak embe arem kenanggo nggal kasu-o. Angin ndak wurugwi mende bem kopkap luburak nggal o nggweyak terabi oboksa-ge angin-e iri nggal nde kasu-o.

¹⁶ Libanon walma towe mena oboksa-t nde, Mbal Pem Nagawan amanggim wosa kan pogolar-e, ndag-e ma bug-o. Iri me woraso e-t nde, kan maburak kan wanogolar-e, mondok ndag-e ma bug-o.

¹⁷ Ap enlem oboksa-ge at erengen pem-e enpe-ge mondok lak, ebe lak mende nde yik kasu-o.

¹⁸ Iri ala karug-e, Mbal Pem Nagawan-e ta nggal nde at imin ndak wurugun-o? Kat-nen-e at nggal-e ta nde kasu-o?

¹⁹ Mbal Pem Nagawan iri-ge kugwiwak ndak wurugwi nap-nen ndak wiridnak mende ereba nggal-e lag-o. Kugwiwak iri-ge emas pem-nen muruksa ndak worak puruk, perak pem mendak pugwi ereba nggal-e lag-o.

²⁰ Ab-e emas min perak min onggo purak meya ala-ge, e nak mondok amawi pisa wanuruk, kugwiwak ndak woroso mondok aru nap iri na ogore yoso-o. Iri yosoma, at-nen-e wosa mburak puk kugwiwak irit ndak woroso-o.

²¹ Kar-e karu buk, lak? Kar-e koloso buk, lak? Kar-e nanduk-nen-e yak kurugwi buk, lak? O yu-ge mondok mondog-er-e iniksa-nen ndak wat yij-o lug-e yak kurugwi bug-a?

²² Nde, ndak worak pid nab-e nggweyak kumbungen ombol nggwe teram eid me-ge at koreyak woraso sa koreyak worasu-o. Nde, nggweyakma woragwi nab-e sil nggal mbel eneyasu-o. At-nen-e mbal iri-ge sum abak nggal wigara yemarak posolar-e, o lije sum wi wiridnak nggal nenasa bamu-o.

²³ At-nen-e enmawi worak nagawan-e enmawi lak tak posolat, it-nen o tena woragwi nab-e enmawi ereba na-ge lak tak poso-o.

²⁴ It ereba-ge yakwi mende nggeret yagidnak imiril nggeret kondoso iri nggal-nen yusu-o. Nagawan Indo-nen nde emnde age pu yaga pil lobok yosola-ge, embem-nen umbuk luk, aid kuri engen pukuruk mbiridnak nggal, pukuruk mburuwa-o.

²⁵ Kat-nen-e Mbal Pem Nagawan Mondok Marak iri nggal-e ta nde yik kasu-o? Kat-nen-e at imin-e ta nde ndak wurugun-o?

²⁶ Kar-e kerengen mbal nggwe lik karuk, kwara lombot pi-o! Wonaru ereba-ge ta-nen ndak worak pamu-o? Mbal Pem Nagawan-net san ombo nggal ereba-ge obo nesa poso-o. Wonaru ereba oboksa wonarag-e ar-e aru-o. Oboksa unu yarak woralat, arik tak unnu luk wene mbo onposo-o. Nagawan Indo amawi-ge mondok nggok me, wonaru ereba misiger-o luk lak momtag-e meya-o!

²⁷ Iri ala-ge, Isarael wa-e. Kar-e noluk-nen: ”Nagawan Indo Nembal Pem Nagawan-nen-e an-nen anggun panggun kasu yu-ge neyasu bug-o” luk peraruk, kindi kabak yosolat, kumud kasu-o? Kat-nen wolmomtak na at-nen nggok tak pigit lak yosolat, kat kwat kuburak ereba na kwara mbenat kubusu bug-o luk eberasu-a?

²⁸ Kar-e wene yu-ge karu buk, kuligit lak woraso-a? Nagawan Indo iri-ge pem woraso Mbal Pem Nagawan o yu ndak worak pid iri na-net yusu-o. Ar-e ababok lak yosolat, amawi lak yosolat mondok yoso buk-nen yusu-o. At-nen yebet kaso-ge ap-nen yebet kudtag-e meya-o.

²⁹ At-nen-e enmawi lak min enpabok lak min enmawi rak poso-o.

³⁰ Nde, ap sujwe-ge enpabok lak, ndeyak yili-o. Li ab-e enpabok lak yogolat, mbud yili-o.

³¹ Alat nde, ap Nagawan Indo ebem wat tak worali nab-e enmawi ngget irit wok unduwa-o. It iri-ge towe ud isiyamu-nen kudsa mondok teram abu pubu mburusu iri nggal pubu mburuwa-o. Ir-e pong kil mborogolar-e, enpabog-e lak ma bug-o. Ir-e tula mborogolar-e, ndeyak ma bug-o.