YESAYA 33 - Nanduk Ngget Tul Pidnak Wene

Yongga unduwakluk tepan yidnak wene 33:1-9

¹ Nit nunuwim nab-e mondok enabuwa worak-nen yusu-o! It iri-ge ap-nen-e nden unpugwi bug-et nde, ap nden unpugwi-o. It iri-ge ap-nen-e onmbol pem lagwi bug-et nde, ir-e ap onmbol pem lagwi-o. Alat nde, iri nggal nden onpogolat, onmbol pem lagolat kwaruwa-t nde, abok nggwe-ge it nde nden onpogolat, enmberam lagolat kwaruwa-o.

² Nagawan Indo wa-e. Nenabuwa yi-o. Nit-nen ninndi kebem mbung mbung tak woragwi-nen yusu-o. Kat-nen-e kup nggal keyam nggal nggetlel nunpuruk woralat, ninndi kabak yogola tarem-e kat-nen ninmiri yi-o.

³ Nde, kat pugarosolat, kene o nggu nggal iri na bem mba yak ondosola-ge, ap enlem oboksa-nen enariktak nggilarak mbu ndibi ndi ma-o.

⁴ Ab-e sil oro kwarat nggal enpem mbud yogolat, it enarengge mende-ge kugun waruk ndi yuwa-o.

⁵ Nagawan Indo-ge mondok kek tak-nen yusu-o. Yi mende ndi mende oboksa at inggiyapma nak worasu-o. At-nen-e Yerusalem iri me-ge mot mot kwarugwi nak nggok tak posolat,

⁶ yamuksa woragwi elem at ilirak wok ondosolat ma-o. It inmiri yurak mende-ge inndi nggat nggat worak elem min enaru yugwi elem min Nagawan Indo indi aye kagwi elem min iri-net yusu-o.

⁷ Ap enmawi worak kwiye lak ereba na-ge ”Yongga nindi-o” luk, enne mbo yili-o. Nde, ap lambuk tak unpuwakluk inpil lobok yidnak nap ereba na-ge mondok inndi puru-nen yip tili-o.

⁸ Nde, tula tula nggok ereba na-ge mburukmu-ge, it lak tak unpurak ala, keya buruk ap misiger-o luk mbi-nen tula iri nggwe-ge mbitli bug-o. ”Irit kwarimin-o” luk, urul pidnak wene ereba na-ge kwarigit lak yogolat, ”Ob-o” luk inndi misiget yidnak ereba na-ge keya bogolat kwatli-o. Iri kwarogolar-e, it na it-net ennggamirak enne kulili bug-o.

⁹ O ereba na-ge keya bikma, pena lasolat, nde, o Libanon wal ereba na-ge merek yele mbosolat, Saron Mbirik alim worak iri na-ge nembaga karu nde kwat yosolat, Mbasan min Karamel Ndobo bem min-e engga kerengga lera ngguruk yosolat kwarusu-o.

Nagawan Indo-nen at imin sirid nap ”Yu nggal kwat kinpimin-o” luk nggomo indidnak wene 33:10-16

¹⁰ Nagawan Indo-nen ap enlem iri na yak ondosolar-e: ”Yawo-ge an-e men yosolat, namawi nuk kamin-o.

¹¹ Kit-nen ’Iri nggal kwarul-o’ luk wene mbatli-ge ebe kwat yusu bug-o. Kit-nen kwatli mende oboksa-ge ebe lak nak kwatli-o. Kit-nen kinsilepma yugwi-ge kit kondomok nok kunpurak kanduk nggal nde kwat yusu-o.

¹² Kir-e kerep yigisa mabe rak puwokluk yugu bidnak nggal, kir-e egere isile worak ndara kan pugwi nggal-nen yili-o.

¹³ Erepma woragwi nap-nen na irit, koroga woragwi nap-nen na irit, an-nen kwaridnak wene kulurug-e, an namawi iri na-ge enaru mag-o” luk yak indij-o.

¹⁴ Nde, meya yugwi nap Sion woragwi nap-nen kwiye-nen lele yogolat-nen yogolar-e: ”Mbal Pem Nagawan-nen nggaruksa mbaroso wene-ge kan amare pempa lasolat nak woraso iri na nggal-nen yusu-o. Nde, nit nennggendumu-nen-e lak tak poso kanduk iri arem-et lembe luk wolmomtag-e ndag-er-a?” luk yili-o.

¹⁵ Kit-nen nde ndemeret wene nak yogolat, konak nak kwarogolat kwarogola-ge, iri arem-et lembe luk wolmomtak iri-ge ob-er-o. Kir-e no bem-nen lesa wanimin isilobulo lak nap enarengge ondoro rak purak pug-o. Lugud tak kwarogolat, uang wanurak pug-o. Kit-nen-e ap wururak pem wene mbatli nap ereba na inmin-e wene mbarurak pug-o. Iri-nen meya erep kwarurak pem wene erep na wanurak pug-o.

¹⁶ Kit-nen nde iri kwarogola-ge, kinmiri mbarak, konak irit woragub-o. Pak arem ngenwama woragwi nggal woragolat, nunggwi mende min yi min abu lud tak ma nak woragub-o.

Abok woragolar-e, mondok enalen pem konak wolmomtak yidnak wene 33:17-24

¹⁷ It-nen yik kagolar-e, nagawan misik kek tak woralat, at-nen tenagidnak wi-ge o nggweyak nggok irit tena worala kagub-o.

¹⁸ Pemerinta enmanggim kenpem tol nggi yugwi nap kit-nen enaye kagwi min enlem nin nap-nen yidnak yidnak kwaruwakluk yik keneyarok woragwi enlem nin nap ereba enaye kagwi min ereba na-ge lak yosolat, obok nak yeberak woragub-o.

¹⁹ Kir-e ap enlem nin nap inndi kek tak, kit kenaru buk wene bem yak kundugwi ereba na-ge abog-e mondok eneyagup pug-o.

²⁰ Nit-nen Nagawan Indo ndegel obogolat nggok sakwi sa o siri Sion yik ker-o. Yerusalem yik ker-o! Yerusalem iri-ge keratluk waruk mburugwi buk o lije nggal owak sindidnak na kona wanigit lak, kere na pok yigit lak ebis me, iri me woragolar-e, mondok konak, kirimbi laksa wolmomtak irit ma-o.

²¹ Iri me-nen-e Nagawan Indo-nen-e at-nen idnak abinal-e mirik nunpuwa-o. Nir-e yi nggok isimbe elpa elpa iri na eyak pem woragola, wim nap-nen yi koma bem nindil lobok yurak na meya ma-o.

^22-23 It-nen idnak yi koma ereba arem yi mende ndi mende lid lud tak pidnak ereba na-ge ebe lak mende nde kwat ma-o. Kona mburuwakluk o wija-nen wat kaso sum ereba na-ge wesera wigak tak purag-e meya ma-o! San ombo ap kere kwarat ereba na enarengge mondok kwarat nit-nen ndena wanogolar-e, ap onowak wat, yidnak woragwi tet ininggem ma-o. Iri tarem-e Nagawan Indo ar-et nennggendumu nagawan kwat yosolar-e, at-nen tena nonposolat, ninmiri yosolat ma-o.

²⁴ Nit wulmul sa nennggendumu-nen mbi andi-nen yane mbi worogolat wolma bug-o. Meya kwarugwi oboksa amberam tak puwa-o.