YESAYA 32 - Nanduk Ngget Tul Pidnak Wene

Mot mot nak kwaroso nagawan 32:1-8

¹ Nagawan misik menluk, mot mor-et o tena worala, enne kulugwi nap ereba na-nen mot mor-et kwarogolat wolmomtak tarem-e wog-et ma-o.

² It ereba na-ge o wija min kwegemereya min aye-nen indipma nggugwi ondoro nggal irit wolma-o. It ereba-ge yi nembaga-nen ene worak mboroso nggal, nggweyak lerak nggwe-nen kerep nggulok ndibe nggal irit wolma-o.

³ It unuwokma worali nap ereba na-nen ukwe peraidnak mende enlengen karug-e, kagit lak nggal ma bug-o. Eneyanggo-nen kulurug-e, kwara-t yebet iniyujwa-o.

⁴ Nanduk inndi-nen ukwe ukwe langgal luk mbiridnak nap-nen-e inndi-nen kwara yebet karuk, tusuruk min-et kwaruwa-o. Ap enma mbarak enne tusuruk min yugwi-ge motsa kona yogolat ma-o.

⁵ Ap wid indi worak nap imin-e ap indi pindong tak nab-o yuwa bug-o. Ap enmberam laso nap imin-e mot mot kwaroso nab-o na yak tuwa bug-o.

⁶ Ap wid-nen-e indi lak wene nak wirik posolat, meya kwarurak nag-et yebet kaso-o. Nde, ap-nen kwaroso min at-nen yoso min ereba-ge Mbal Pem Nagawan nggweyel uburak mende nag-et yoso-o. Ar-e ap nere woragola na mak ondoso buk, ap yi nere woragola na yi mak ondoso buk-nen yusu-o.

⁷ Ap enmberam laso nab-e at-nen meya kwarurak iri na-ge indi-nen yebet karuk-nen meya kwaroso-o. At-nen insilobulo lak nap ereba na enare bosolat, it enarengge it-nen wanurak mende ereba na wanuwa naru, tu nggulurak pem-e mbawi worosolar-e, enesiget wene yoso-o.

⁸ Alat nde, ap indi ngarak konak-nen-e konak nag-et yebet karuk, kwarosolat na konak iri na-t kwaroso-o.

Enpem wene mbenatluk, tuguruk woragwi nggal wolmomtak wene 32:9-20

⁹ Anggun panggun kagwi buk, konak kumud lak woragwi kweyap wa-e. An-nen yusu wene yu kwara koler-o.

¹⁰ Yawo kir-e kunmud lak kona worali-t nde, olengen misik worarug-e, anggut engen mbarurak na lak yosolat, engen kerengen erep na abu lak yuwama, kinndi nde kabak ma-o.

¹¹ Kir-e yanem min-e anggun panggun kagit lak, kunmud lak konak worali-t nde, yawo-ge kwiye-nen lele mber-o. Kunsum yonggora mbo buruk, karung sum kunpugulwak pem ketsa yutluk wolmer-o.

¹² Kit keneyapmu yagidnak mende arim nak mbiridnak min kenengen anggut ut nggok nak poso yabu min ereba na ubud mondok yip togolat wolmer-o.

¹³ An nelem nap onggweyag-e linggat min isile worak erep min nak ngguruk, larok yij-o. Kir-e kenma kenalen pem woragwi ereba na min kunuwi siri kenalin kenalen pem woragwi ereba na min ubud-nen mondok yip togolat wolmer-o.

¹⁴ Iri-nen nagawan uwi-t nde, keya bogolat, o siri iminep ma-t nde, anengen kererak woraso iri na-ge kol luk, ap tubo yuwa-o. Nde, ap-nen ap lobok yuwa naru yik karok woragwi ndobo min o mot wiril laidnak min ereba na-ge ndamera nggweyak min panggara keya buwama, abu abu irit lak wolma-o. Nde, iri na me-ge kelerai wam erengen kege-t nde ijok posolat, lomba wam tusuangge taroso sa nde kwat ma-o.

¹⁵ Alat nde, tuguruk Mbal Pem Nagawan lobok yosolar-e, at amawi bem-nen kwarosolar-e, nembaga karu-t nde, amburu worak tak puruk, yabu rak puwa-o. Nde, yabu ereba-ge ebe-ge kwarat puwa-o.

¹⁶ Nde, yi wi ndi wi oboksa-nen mot mot, lud tak nak irit kwarogolat wolma-o.

¹⁷ Ap enambiktak lombok-nen ndemeret lud tak, mot mot nak kwat tenak woragola-ge, pem irit yamuksa enalen pem nak irit woralik nalik wolma-o.

¹⁸ Iri na me woragolar-e, Mbal Pem Nagawan ilirag-e unmud lak, kona yamuksa irit wolma-o.

^19-20 Yagidnak pem kulurak yi na kwarat worasolat, konowam na tusuangge nil-e lerag-et nin me nan me ereba waring kasolat kwaruwa me, kit oboksa-nen kenalen pem woragub-o. Alat nde, kit kunuwim nab-e walma kerep talme mboso nggal enpem mbosolar-e, unuwi siri-ge yigisa keya buwa-o.