YESAYA 31 - Nanduk Ngget Tul Pidnak Wene

Mbal Pem Nagawan-nen Yerusalem nggetlel unpurak yidnak wene 31:1-9

¹ Yongga undurak pem Mesira iri me mburuwa nab-e mondok enabuwa worag-o! It-nen inndi ebem wat tak pili-ge Mesira nap san ombo kere kura wam ombol pem kore yugwi kwarat ereba na min kura wam amawi worak ereba na min wim koma kwarat ereba na min ebem nak inndi wat tak pili-t nde, Nagawan Indo Isarael nap Enmbal Pem Nagawan mondok marak iri na ebem inndi wat tak pogolat, at-nen yongga unduwakluk nggi yak togolat yili bug-o.

² Nagawan Indo iri-ge mondok indi nggat nggat worak me, at-nen kwarurak iri-ge ar-e aru-o. At-nen lak tak onposo mende pil lobok yosolat, meya kwarugwi nap min it yongga undugwi nap min ereba na ”Enpem angin worak pimin-o” yidnak iri-ge ndak ndag-et kwaroso-o.

³ Mesira nap iri-ge Mbal Pem Nagawan-e lag-o. Nggweyakma nap-net yili-o. It-nen idnak kura wam ereba-ge pem woraso amawi worag-e lag-o. Ndak worak pidnak mende-net yusu-o. Nagawam Indo-nen kwarosolat tarem-e it iri na yongga indili nab-e unuwok abis pijaksa mbud yogolar-e, it iri na min-et wosa mbuwa-o. Iri kwarogolar-e, it mberensa-t mondok lak tak unpuwa-o.

⁴ Nagawan Indo-nen an yak norosolar-e: ”Singa-nen at naso mende wutluk ele-nen usuru ndere yosoma, wam yik karok woragwi nap-nen wuruwag-o luk inni enne mbidnag-et nde, silembe yusu iri na nggal, an-e Sion Ndobo iri na imiri wim mbarosolat nusuru ndere yimin-o.

⁵ Towe-nen amarik imiri yosolat uwima tuburusu iri na nggal Nagawan Indo Mondok Namawi Worak an-nen na Yerusalem nggetlel obosolat, imiri yosolat kwarimin-o” luk yij-o.

⁶ Nagawan Indo-nen yosolar-e: ”Isarael nap wa-e. Kir-e an nimin wim mbarogolat, an nimin meya kwatli-o. Alat nde, yawo-ge tuguruk nden karuk, an neram lobok yer-o!

⁷ Kit kininggi-nen perak min emas min pem kugwiwak meya ndak wirigep ereba kit pidsa-nen mbo burak tarem-e wog-et ma-o.

⁸ Asiut nab-e wim pem-nen lak tak unpuwa-o. Alat nde, ki nap enmawi bem-nen lak tak unpuwa bug-o. Asiut nab-e wim pukmu wim silmu-nen kwiye ndi ma-o. It ennggendumu ap sujwe ereba na-ge ap ndegel unpugwi nap tak unpuwa-o.

⁹ Nde, Asiut nagawan-e kwiye-nen mburuwa-o. Nde, at-nen idnak san wari ereba na-ge kwiye kwarat yogolar-e, wim nggogolat-nen pugwi bendera-ge keya buruk mburuwa-o” luk Nagawan Indo-nen yij-o. Yerusalem iri me-nen amanggim wam wosa kan pogolat-nen kek tak pugwi Nagawan Indo iri na-nen yij-o.