YESAYA 30 - Nanduk Ngget Tul Pidnak Wene

Mesira nap inmin urul piga-t nde, ebe kwat yigit lak wene 30:1-7

¹ Nagawan Indo-nen yosolar-e: ”Yewura nap ennggendumu enne kulugwi nab-e an nimin eyak witli me, mondok enabuwa worag-o. It iri-ge an nindi-nen peragit lak, it inndi-nen pidnak nak langgal luk mbitli-o. It iri-ge an nindi-nen peragit lak, ’Ereba na kwarul-o’ luk urul pogolat ininggi amburu pili-o. Iri kwarogolar-e, it meya yidnag-e kwarat ligik lasu-o.

² It Mesira mborogolar-e, an nindi peragit lak ma-t nde, it inndi nak-nen mbitli-o. It-nen-e ’Mesira nagawan iri-nen yongga nunduwa-o’ luk perarug-e, inndi-ge at ebem nak wat tak pili-t nde,

³ Mesira nagawan iri na-nen-e it inndi abi sud mud tak puwa-o. Nde, it inndi-nen peragolar-e: ’Mesira nap-nen ninmiri yuwa-o’ luk inndi wat tak pili iri-ge yugwi rugwi ma-o.

⁴ Yewura-nen wirik inpil mbiridnak nab-e o siri Soan min Anes min Mesira uwi iri me wok yiga-t nde,

⁵ it Yewura nap inndi-ge ki nap ebe lak it yongga undurag-e meya-t nde, it inndi-ge Mesira nap enpem wat tak pidnak me, it oboksa-nen innggiri nde ma-o. It iri-ge konak tak nde nonpogolat, yongga nde nondogolat yuwa lamorok, no mende nggal yik neneyagwi nde kwat yiga-o” luk yij-o.

⁶ Nde, unta wam abare ena nggwe (selatan) worasu ereba wene-ge Nagawan Indo-nen-e yu nggal yij-o: ”Yewura-nen wirik inpil mbiridnak nap-nen it-nen idnak unta wam min enkelerai wam min ombolwak pem puruk, silobulo waruk mborogolar-e, o tula mondok enlengenwak lak tak purak nggwe, singa ndakngge min waro lese min waro naga isiyamu worak min worak ereba na nggwe-t waruk mbirigarik, waruk mbiriga ereba na-ge ap enlem mbi-nen it yongga undurag-e meya-t nde, ’Yongga nunduwa-o’ luk endam piga-o.

⁷ Mesira nggal-nen yongga undurak iri-ge ebe lak-nen yusu-o. Iri ala karuk, an-nen Mesira unu yarosolar-e ’Naga abiru nggelak eyak lak’ luk unu yarigi-o” luk yij-o.

Yidnak yidnak kwarugwi buk enlem 30:8-18

⁸ Abok woragolat-nen it-nen meya kwarugwi-ge iri nggal-o luk enaru wolmomtak pem-e Mbal Pem Nagawan-nen-e an nimin yosolar-e: ”An nilirak-nen meya kwatli-ge engga misik pem mbari-o” luk yak nirij-o.

⁹ It iri-ge Mbal Pem Nagawan imin-e eyak nak worogolat, ennesiget nak yogolat, Nagawan Indo-nen enpem pidnak wene-ge mondok kulugwi bug-o.

¹⁰ It-nen Mbal Pem Nagawan ene lomboksa yugwi nap inmin yogolar-e: ”Mondok kenne lak wolmer-o. Ndemeret wene-ge nir-e yak nundurak pug-o. Alat nde, nit-nen kulurak ninndi-nen pidnak wene nak yak nundurag-o. Nir-e yeba mende nag-et kwat tenak wolmomtak me, keya nenper-o.

¹¹ Ndak kenpe-o. Ndegera mberer-o. Kir-e Isarael nap Enmbal Pem Nagawan mondok marak iri na owene pem ndak sil pal neneyerenak worali meyog-o” luk yili-o.

¹² Iri yogola karuk, Isarael nap Enmbal Pem Nagawan mondok marak iri na-nen it yak ondosolar-e: ”Kir-e anggun panggun kagolat, enmberam lagolat yurak mende ereba na bem nde kinndi-ge ebem wat tak pogolat, an-nen yak kundusu wene-ge keya bili-o.

¹³ Iri kwatli bem-e kir-e meya kwatli-o. Kir-e kerep leget mot wiril laidnak nde ndamera mbeyekluk yenggeng tak worasu iri na nggal worali-o. Nde, misik tarem-e mimo ndamera yigisa labuk yugub-o.

¹⁴ Nde, kit abog-e nggweyak yimbe ndamera ndibi ndi yosoma, telak siyag-et tet kan ngen wanogolat, yi kenanggogolat yurak tet wanugwi buk iri na nggal yenggana abapnosa ndibi ndi yugub-o” luk yak indij-o.

¹⁵ Nagawam Indo Mondok Kek tak, Isarael nap Enmbal Pem Nagawan mondok marak iri na-nen at ilirak yak ondosolar-e: ”Kir-e meya kwarugwi keya buruk, wene lak kindiyabu wolmer-o. Iri kwarogola-ge, an-nen kinmiri-t yimin-o. Kit-nen nde yamuksa-t woragolat an nebem-et kinndi wat tak puruk woragola-ge, an-nen amawi rak kunpurak worala-t nde, kit-nen-e kinsili yili-o” luk yak indij-o.

¹⁶ Alat nde, kit-nen wene mbarogolar-e: ”Wim nap endam-nen kura wam ijok nggat worak pem kore luk, kwiye mburul-o” luk yili-o. Iri yili iri-ge ob-er-o! Ndemeret pong-et kagub-o! Kit kinndi-nen peragolar-e: ”Nit-nen idnak kura wam yu-ge ijok nggat worag-o” luk perali-t nde, kit muk kiniyujwa ereba unuwok nggari me, mondok terak minik-net yusu-o.

¹⁷ Kir-e wim nap misiget nak kagub-et nde, ap seribu-t (1.000) nde kwiye mburugub-o. Nde, wim nap lima nde eneyagolar-e, kit pidsa kwiye mburugub-o. Nde, kit-nen idnak ap kere ereba na-ge oboksa ndi yogolat, ndobo bem ereba bendera sindik pugwi e misik arig-et nak sindik wolma-o.

¹⁸ Iri kwarugub-et nde, Nagawan Indo-ge kit kunpud kudtak tarem iri na towarak worasu-o. Nagawan Indo, Mbal Pem Nagawan iri-ge mondok ndak ndak nak kwaroso me, kit kenabuwa yurak iri-ge ar-e mondok lud tak puruk worasu-o. At ebem inndi mbung mbung tak worali nab-e enalen kagolat wolmag-o. 30:19-33 ayat yeba arem-e Mbal Pem Nagawan-nen at ilirak yane witli ereba na konak tak unpurak wene urul yak indidnak wene min Asiut nap enpem nggin yurak wene min mbarak worasu-o.