YESAYA 28 - Nanduk Ngget Tul Pidnak Wene

Isarael nap Samaria utara nggwe woragwi ereba na nggomo indidnak wene 28:1-6

¹ Inndi nden kaso yi nunggwi nap Isarael nap-nen ebem kinndi kek yugwi kunuwi siri ereba-ge mondok wolma-ge lag-o. Abage konak woraso iri-ge engen kerengen isi nggorabak unmukmu pidnak terabet yoso nggal, abage konak iri-ge lumu nde ma-o. Nde, nggweyak alim mbirik iri me ndobo iri na bem wiridnak o yot mot wiril laidnak iri me woragwi nap-nen inndi nden kaso yi nuruk, mondok inndi lak yosolat-nen ebem inndi kek tak pugwi o siri ereba-ge mondok lak ma-o.

² Nagawan Indo-nen-e ap mondok amawi, umbunu worak misik pil lobok yuwa-o. Nde, lobok yosolar-e, kwegemereya puk kil lobok yosolar-e, o ngen min-et lobok yosolat, talme nggok mbosolat yi ebe mabunuruk mboroso nggal-et lobok yuwa-o. Iri yosolar-e, o monmon-nen nggweyakma landera mbud tak onposo nggal, at-nen enpem mbud ma-o.

³ It ennggendumu enne kulugwi nap inndi nden kaso yi nuruk, inndi lak worali nap-nen inndi kek yugwi elem iri na-ge unuwok-nen yemnda o liri rak puwa-o.

⁴ It unuwi siri anggu obok mboroso-t nde, unu lak yosolat lumu yid iri na-ge mondok lak ma-o. Nde, lak yosolar-e, e ara engen ogwere yoso tarem-e awo worala-t nde, nandug-et ogwere yosoma karug-e, mbara nili iri na nggal-nen yusu-o.

⁵ Nde, Nagawan Indo Mondok Amawi Worak iri na-ge at ilirak minggirik iri me wolma ereba na enmanggim engen kerengen isi mondok kona nggorabidnak nggal kwat ma-o.

⁶ Nde, Nagawan Indo-nen-e ap enpem wene mbenarugwi nap ereba na-ge mot mor-et ap enpem wene mbenarugwi elem wok ondosolat, wim o silmu ngguma-o luk o siri yik karok woragwi ereba na kwiye kagwi buk elem wok ondosolat kwaruwa-o.

Yesaya-nen Mbal Pem Nagawan ene lomboksa yugwi Yewura ereba me woragwi inndi nden kaso yi ninggidnak ereba na inmin yidnak wene 28:7-13

⁷ Mbal Pem Nagawan ene lomboksa yugwi nap min tepan omborak min-e anggut engen amburu ndonggosa nonggolar-e, inndi lak lak yogolar-e, tula-ge ya landok nak nili-o. Nde, Mbal Pem Nagawan ene lomboksa yugwi nab-e Mbal Pem Nagawan-nen nabi nggal pem mirik inpidnak ereba na-ge kwara yebet kali bug-o. Nde, tepan omborag-e it-nen wene nggaruksa mbaruwa-o luk ap-nen wene mbenaruwakluk enpem pugwi-t nde, it-nen-e wene nggaruksa mbarurag-e meya-o.

⁸ Nde, it-nen idnak e ndamak pem oboksa-ge misik mbi we-o luk mondok lag-o. Oboksa sok nak-nen kibing kobong tak worasu-o.

⁹ It-nen an nebem ujwa mbarogolat-nen yogolar-e: ”Ar-e tarak mul indimin-o luk perasu-o? Iri-nen at-nen iri nggal-o luk aru yidnak ereba na mul unduwa-ge ta-nen kuluwa-o? At indi-nen-e nit yu-ge li marik nggeret kamo mbarak nggal-nen yili-o luk nenperasu, lak?

¹⁰ At-nen nit mul nondosolar-e ’Mondok yu-o. Iri-o’ yosolat, ’Mondok yu nggal kwarurag-o. Iri nggal kwarurag-o’ yak nondosolat, ’Siyak eralu yu nggal purag-o. Iri nggal purag-o’ luk nit mul nundurag-e ndag-er-a?” luk yili-o.

¹¹ Kit-nen nde an nene kulurak kinmbit ala-ge, Nagawan Indo-nen-e ap enlem nin nap kendam inpil lobok yuwama, mul kondogolar-e, enne na kulugwi buk pem mul kondogolat, wene na kit-nen kenaru buk pem mul kondogolat irit kwaruwa-o.

¹² Nagawan Indo-nen-e kit oboksa kenpabok kwarobokluk ”Kenpabok kwarer-o” yak kondosola-t nde, kir-e at ene-ge kuligit lak keya bigeb-o.

¹³ Kit iri kwarigep iri bem-nen Nagawan Indo-nen mul kondosolar-e: ”Mondok yu-o. Iri-o” yosolat, ”Mondok yu nggal kwarurag-o. Iri nggal kwarurag-o” yak kondosolat, ”Siyak eralu yu nggal purag-o. Iri nggal purag-o” luk mirik kunpusu-o. Iri-nen ndowaga kit nak-nen mborogolar-e, wosa mbogolar-e, mep tak konposolat, sabu arem ngonok yogolat, kamat kunpuruk mborogolat ma-o.

Yerusalem iri me kerep mondok owak ndum purak yidnak wene 28:14-22

¹⁴ Ap nggweyel unpugwi nap Yerusalem iri me woragwi nap tena unpuruk woragwi nap wa-e. Nagawan Indo-nen yak kunduwa wene-ge kwara koler-o.

¹⁵ Kit-nen yogolar-e: ”Nir-e wat yugwi elem min ’Iri nggal kwat nunpurag-o’ luk urul purug-e, ap watluk ndok wiril mbugwi sa imin ninndi misiget tak pigerig-o” luk yili-o. Kit kinndi-nen peragolar-e: ”Nir-e nenkap ndagurak pem-e nenesiget enmberam lul yu bem-net lak tak onposo mende abok lobok yuwa iri-ge nenpem-e mbuwa bug-o” luk yebet kali-o.

¹⁶ Iri kwatli iri bem-e Nagawan Indo Mondok Kek tak iri na-nen yosolar-e: ”Abok an-nen-e o mabin tugup lak wat kudtak puk iri-ge Sion iri me-t pimin-o. Kerep mondok amawi worak onggo nggok irit ebem wene mbara posolar-e: ’Ta-nen nde mondok indi an nebem wat tak puruk wolma-ge urugwe nggwe rak puwa bug-o’ luk yaga mbarak kerep irit pimin-o.

¹⁷ An-nen-e mot mot nak kwarugwi elem iri na-ge o ndak wururak kere rak pimin-o. Ndemeret lud tak nak kwarugwi-ge owak ndak wurugwi kere kwarak pimin-o” luk yij-o. Kerep talme mbuwasolar-e, kit-nen ebem kinndi-nen ”Ninmiri yuwa-o” luk wat tak worali enmberam laso mende ereba-ge mberena lak tak puwa-o. Yi ebe wasolar-e, kit-nen kurak yugwi kondoro min-et mberena lak tak puwa-o.

¹⁸ Iri kwarosolar-e, kit-nen wat yugwi elem min ”Iri nggal kwat nunpurag-o” luk urul pigep min ap watluk ndok wiril mbugwi sa imin kinndi misiget tak pigep min ereba na-ge yugwi rugwi mbuwa-o. Iri yuwama-ge, lak tak onposo mende lobok yosolar-e, yigisa liring tak kunpuwa-o.

¹⁹ Kir-e anggun panggun mende pempa kenpem mbosola, pempa anggun panggun nak kerenak woragub-o. Woragolar-e, lengge-nen kuplila-nen kubu-nen kenpem mbosolat wolma-o. Nde, kit-nen nde Mbal Pem Nagawan-nen yak kindidnak wene iri na yebet kagolar-e, kir-e kwiye-nen lele yugub-o.

²⁰ Kir-e ap nene yugwi ondoro porosa konidnak sa nene yogolat, mbungsa nene yurak na meya, embem sum mboronggo me, muruksa nene yurak na meya, iri na nggal kwasa woragub-o.

²¹ Nagawan Indo-ge Ndobo Perasim pem men yid nggal-et men ma-o. Nagawan Indo-ge at indi-n pidnak iri na kwarosolar-e, Nggibeon mbirik iri me amawi kundid nggal irit amawi kunduwa-o. At indi-n pidnak kwaruwa iri-ge nggweyakma nap-nen-e yebet kudtak puk irit kwaruwa-o. At-nen-e at-nen kwaroso mende kwiye worak irit, wi yurak mende irit kwaruwa-o.

²² An-e yi wi ndi wi oboksa meya rak purak wene Mbal Pem Nagawan Mondok Amawi Worak iri na-nen mbaridnak wene-ge kuligi-o. Iri ala-ge, kit-nen-e an-nen kinndi yeberak pusu wene yu-ge pusururak pug-o. Pusurugupmu-ge, kit-nen mengga mbururag-e mondok meya nde kwat ma-o. 28:23–29:24 ereya arem-e Mbal Pem Nagawan-nen at ilirak enpem mbud yurak wene min at ilirak inmiri yurak wene min urul pidnak wene mbarak worasu-o.