YESAYA 2 - Nanduk Ngget Tul Pidnak Wene

Pem irit yamuksa wolmomtak wene 2:1-5

¹ Mbal Pem Nagawan-nen Yewura min Yerusalem min nggomo ondosolat, wene Amos ambara Yesaya ebem pid wene-ge yu-o:

² Nde, abok woragolar-e, ndobo amun Nagawan Indo uwi worak worasu iri na-ge munduruk abu-t lujwarik, ndobo amun min ndobo yok nggok ereba na min anggul pem tugup lak nggasesa menluk keya buwa-o. Nde, iri yosola-ge, ap enlem oboksa-nen nggwid nggwid nggubunuruk at ama iri me mburuwa-o.

³ Nde, it-nen yogolar-e: ”Isarael Embal Pem Nagawan uwi Nagawan Indo ondobo bem worak iri na me lujwog-o. Mondok nit-nen kwarurak iri-ge at-nen mul nunduwa-o. Mul nondosola-ge, at-nen mul nundusu iri na imbirik nag-et mbururag-o. Nagawan Indo-nen mul ondoso wene iri-ge Yerusalem nak-nen lobok yoso-nen yusu-o. At wene-ge Sion iri me-nen yusu-o” luk yuwa-o.

⁴ At-nen-e ap enlem oboksa ennggendumu enpem wene mbenarosolat, ap enne lombok ennggendumu wene nggaruksa mbarosolat kwaruwa-o. Nde, wim pugwi eneyalawi-ge nden kaga yabu wanugwi kagweyap tak puwa-o. Nde, it wim pugwi posid wuru-ge kabo tusuangge mbarugwi rak puwa-o. Ap enlem erep-nen-e ap enlem erep inmin wim puwa bug-o. Iri-nen wim nggurak pem lid lud tak puwa bug-o.

⁵ Kit Yakup-nen wigarak wa-e. Nagawan Indo eyaya bem-et mborogolat wolmog-o. 2:6–4:6 Pasal yeba arem-e Mbal Pem Nagawan-nen-e inndi kek tak woragolat meya nak kwarugwi nap enpem angin worak mende poso wene mbarak worasu-t nde, unluk wolma nap ereba na kwat unpurak urul posolar-e, ir-e marak onposolat, ngget tak onposolat ma wene na mbarak worasu-o.