YESAYA 11 - Nanduk Ngget Tul Pidnak Wene

Lambuk tak onposo Nagawan lobok yuwa wene 11:1-9

¹ Ndaut-nen wigarag-e e ndaridnak undugul iri nggal-nen yusu-o. E ndaridnak undugul pem-nen isit laso iri nggal, Ndaut-nen wigarak enpem-nen nagawan misik men ma-o.

² Nagawan Indo indi-ge at ebem woralat, indi ngarak, indi nggat nggat worak tak ubuwa-o. ”Yu nggal kwarurag-o” luk kwaroso abam irit kwarak puwa-o. Mbal Pem Nagawan indi-n pidnak aru yosolat, at indi aye worak irit wolma-o.

³ At indingen-e Nagawan Indo-nen yidnak yidnak kwarurak nak nggok tak poso-o. At-nen ap enpem wene mbenarosolar-e, at-nen yik kaso bem na irit, ap-nen yidnak pem nak na irit, ndag-et nak enpem wene mbaroso bug-o.

⁴ Nde, insilobulo lak nap enpem wene mbenarosolar-e, mot mor-et mbenarosolat, ap nggeyok tak it-nen kwarurak enmawi lak nab-e mot mor-et it enambigit mbiring yosolat, ap-nen lugud tak kwaridnak nab-e at-nen yidnak pem-et angin worak enpem pogolat, meya kwaridnak nab-e abu abu lak tak unpuwa-o,

⁵ Yi kwarugwi ndi kwarugwi bem-e at-nen kwarosolar-e, mondok tugup lak, mot mot irit kwat tenak wolma-o.

⁶ Insilepma worak ndakngge-t nde (serigala), lomba imin lambuksa woralat, masan tutul ndakngge isilepma worag-et nde, kambing imin mbinggirik woralat, sapi marik na singa ndakngge amarik min tusuangge tarosolat, li marik na isilepma worak ereba na imin nogolat wolma-o.

⁷ Sapi wam-e insilepma worak beruang min lambuksa tusuangge tarogolat, amarik na beruang min pud tak woragolat, singa-t nde, sapi-nen kwaroso nggal nggandum mbato ariwak nujwa-o.

⁸ La marik misik-nen waro lese imin-et keyari posola-t nde, yilik ubuwa bug-o.

⁹ Mbal Pem Nagawan Ondobo marak Sion iri bem-e meya mende min lak tak onposo mende min mbi wolma bug-o. Yi koma yiriwak ena ud yi koma-nen kobong tak pid iri na nggal-et, yi wi ndi wi oboksa-nen Mbal Pem Nagawan owene nak kwarat enaru wolma-o. 11:10–27:13 Pasal yeba arem-e Mbal Pem Nagawan-nen-e Isarael nap min Yewura nap min entalu woraiga enlem nin nap-nen tena woragidnak wi enpem angin worak mende purak wene mbarak worasu-o. Iri-nen Mbal Pem Nagawan erembel wanugwi ndawi mberen min Mbal Pem Nagawan ilirak-nen yane worogola, inmiri yuwa wene min-et mbarak worasu-o.