YESAYA 1 - Nanduk Ngget Tul Pidnak Wene

Yesaya

¹ Engga yu arem-e Yewura nap nagawan nagawan Usia min Yotam min Agas min Iskia min-nen Yewura tena woragola tarem Mbal Pem Nagawan-nen Yewura min Yerusalem min yak indidnak wene Amos ambara Yesaya imbiri bem nam tak posola, Yesaya-nen mbaridnak wene worasu-o.

Mbal Pem Nagawan-nen at ilirak nggomo ondosolat met inpidnak wene 1:2-20

² Nagawan Indo-nen yosolar-e: ”Mbal wa-e. Kwara kuli-o! O yu-ge wa-e. Kwara yebet ki-o! Li an-net nggok tak inpigi-net nde, an nimin wim mbatli-o.

³ Sapi wam-e at ombo iri na-ge aru-t woraso-o. Nde, kelerai-nen na at ombo iri na-net at-nen naso mende norak ondoro kona bidnak iri na-ge aru-t woraso-o. Alat nde, Isarael nab-e iri nggal-e lag-o. Ir-e mondok yebet kali bug-o” luk yij-o.

⁴ Meya yugwi nap kenlem kir-e meya nak yebet kagwi nap min meya yugwi nap min-e mondok kenabuwa worag-o! Kit-nen meya kwarugwi elem iri-nen konowak ngga waga mberak kunpuruk worasu-o. Kir-e Nagawan Indo na keya bogolat, Isarael nap Kenmbal Pem Nagawan mondok marak kit-nen erembel wanurak iri na-ge pelek yaga konmbol nggwe rak pigeb-o.

⁵ Noluk-nen kir-e eyak wat tenak nak worali-o? Kir-e angin worak mende mondok kwiye worak tuguruk kenpem purak kindingen-a? Kenanggul-e nggwat nggwat ud nak-nen kobong tak, nde, kinndi min kit-nen yebet kagwi min-e mondok wat yidnak worasu-o.

⁶ Kir-e kinmbirisu kuri-nen kunuwok abis kuri kenpe-ge kenpem nggat ponok tak mbi worali bug-o. Kit kenpem-e karum nak yud lud, mbut ondoro yal pal mep nak yolo rak worasu-o. Kindidnak ud ereba-ge marigit na lak, nggitlik pigit na lak, iri-nen obat amburu na pigit lak worali-o.

⁷ Kit kunuwi nggweyag-e mondok lak tak pogolat, kunuwi siri-ge kan puruk lak tak piga-o. Kit kenlengen pem-et enlem nin nap-nen konnggweyak wanogolat, yi mende ndi mende oboksa lak tak pogolat kwariga-o.

⁸ Nde, Yerusalem nak perak o siri ap-nen leget waburuk woragola nimik yurak meya nggal, anggut yapmu o sare worak nggal, ngguru nggeyo uwi yagidnak sa o lije worak nggal arig-et nak lonosa keya biga-o.

⁹ Nagawan Indo Mondok Amawi Worak iri na-nen nde ap erep nit nenmanggim nde mengga keya inpigit lak yid nggal-nen-e Sorom min Nggomora min lak tak inpid nggal mondok abu lak tak nenpeleb-o.

¹⁰ Yerusalem wa-e! Kat-nen idnak enne kulugwi nap min kat kilirak min-e Sorom nap min Nggomora nap min nggal kwat yili-o. Nagawan Indo-nen yak kundusu wene-ge kwara kuli-o. Nit Nenmbal Pem Nagawan-nen nggomo kurusu-ge kwara yebet ki-o.

¹¹ Nagawan Indo-nen yosolar-e: ”Kat kindi arem-nen-e kat-nen an namanggim pugwi mende kundugu kandugu perenak worasu ereba-ge an-e nindingen tak pusu-o luk yebet kasu, lak? Kat-nen an namanggim wosa kan pusu lomba min sapi usul omok min sapi kusi eyabi min lomba min kambing min iri-ge an-e mondok yik kudtag-e mondok nisili-o.

¹² Kir-e ta-nen yak kendamu-nen an nerembel wanurak lobok yogolar-e namanggim pugwi mende ereba oboksa purak waruk lobok yili-o? Ta-nen nggwer-o yak kondosola-nen an nama marak iri me-ge kunuwok pili-o?

^13-14 Wewesa kenarengge ereba-ge an namanggim purak waruk lobok yili-o. Ereba kan pili emben-nen an-e sok wurusu-o. Kit-nen waneya ngget arem nggogolat nggok sagili min we woragwi tarem (Sabat) yebet kali min kit-nen an kek tak nobogolat-nen kwarugwi kwarogolat ndok wutluk sagili min-e an-nen mondok yik kudtag-e nisili yusu-o. Kit-nen iri kwatli ereba oboksa-ge meya elem nde yogora keya bogolat, an nebem nde angin yaga keya bili-o. Iri nggal-e an nebem posoma, siri mboso-o.

¹⁵ Kit kininggi iri-nen ap wurugwi me, kit-nen nde tepan yuwokluk kininggi nuk karuk tepan pempa kundugu yugub-et nde, nombol wok kunduruk woramin-o.

¹⁶ Kit meya yidnag-e mondok masa mbek tak puruk wolmer-o. Kit-nen yi meya ndi meya kwatli ereba-ge keya buruk, ndong yer-o. Tugurug-e mondok meya kwarurak puk na-e. Kuligeb-a?

¹⁷ Yawo-ge konak nak woragwi tel korogolat, mot mot nak kwarugwi nggok tak pogolat, anggun panggun tak unpugwi mende iri-ge mondok lak tak per-o. Li mul ineid iniya lak kwat unpurak yidnag-e ndak ndag-et kwat unpurag-o. Kweyap togwe onowene-ge kona-t mbarogolat it enambigit yurag-o” luk yij-o.

¹⁸ Nagawan Indo-nen yosolar-e: ”Wene yu lak tak puwog-o. Kir-e meya kwarugwi iri na-nen ndowaga mimi kan ngen nggal-et nde, an-nen-e masa yeben mbin mare nggal loro mbereng tak kinpimin-o. Kit meya yidnag-e kwarat angin worag-et nde, kit meya yidnag-e abu abu nemberam tak pimin-o.

¹⁹ Kit-nen nde an-nen yidnak yidnak kwarogola-ge, kit kunuwi nggweyak pem-nen mboroso mende konak ereba na nonggolat woragub-o.

²⁰ Alat nde, kit-nen an nimin wim mbal tenak woragola-ge, yak kendeyeg-o. An-e Nagawan Indo-nen yak kundusu-o. Kir-e mondok wim pem-nen kunduwa-o” luk yij-o.

Wene tarugwi o siri 1:21-31

²¹ O siri yu-ge nandug-e tugup lak woraso na-t nde, yawo-ge terak mbabi yil noso kwe nggal kwat yusu-o! Nde, nandug-e o siri iri me woragwi nab-e mot mot lud tak nak kwarogolat woragwi-t nde, yawo-ge o siri iri na me-ge ap wurugwi nap nde worali-o.

²² Yerusalem wa-e. Nanduk kar-e perak onggo kek tak nggal-et woraigen-et nde, yawo-ge ebe lak mende nde kwasa labuk yusu-o. Nandug-e kar-e anggut amburu nggal kundu konag-et woraigen-et nde, yawo-ge we yi nggal kundu lak yidnak worasu-o.

²³ Kit-nen idnak enne kulugwi nab-e wene eyak worogolat, yariya wanugwi entep kwarogolat, yi mende ndi mende min tol min lesa wanogolat kwatli-o. Wene mbenarugwi sa-nen wene mbenarogolar-e, li mul ineid iniya lak ereba na onowene kona mbarurak keya bogolat, kweyap togwe onowene konurak yak ondogola na kwara enne kuligit lak yogolat kwatli-o.

²⁴ Iri kwatli iri-nen ndowaga Isarael nap Enmbal Pem Nagawan, Nagawan Indo Mondok Amawi Worak iri na-nen yosolar-e: ”Nuwim nap wa-e. Kit-nen kwat nibili onggo kwat kunpumu, kit-nen-e an numburugwi ngari rak pugup pug-o.

²⁵ Ap-nen perak ndemeret ebe nak lena keya bogolat-nen kwatli iri na nggal-et an-nen-e kit kwat kinpimin-o. An-nen kit iminep mbarak konposolar-e, kit kenpem worasu yi meya ndi meya ereba oboksa an-nen-e lak tak pimin-o.

²⁶ An-nen kit wok kondosolar-e, nanduk nggal-et ap enpem wene mbenarugwi nap min nggomo kundugwi nap min irit wok kindimin-o. Iri yumu, ap-nen Yerusalem unu yogolar-e: ’Tugup lak, mot mot woragwi siri-o’ luk yuwa-o” luk yij-o.

²⁷ Nagawan Indo iri-ge mot mot nak kwaroso me, at-nen-e Yerusalem min ”niri nera-o” luk kondok yili nap min-e inmiri yuwa-o.

²⁸ Alat nde, meya yugwi nap at imin eyak wat tenak worali nab-e at-nen unduwa-o. Nde, at keya ibili nap oboksa-ge mondok lak tak unpuwa-o.

²⁹ Nde, ir-e e ereba na erembel wanogolat, eneyabu ereba na kugwiwak amanggim nak yakolat yiga-nen ndowaga innggiri nde kujwa-o.

³⁰ It iri-ge e nggok engga umbuk le yidnak nggal kwat yogolat, yabu yi bem amburu rak pugwi buk nggal kwat ma-o.

³¹ Kanduk tinggiringgi mbara mborosolat, wiringga umbuk kan pagoso iri na nggal, ap enmawi worak kek tag-e it ondomok-nen meya kwarugwi ereba na-net lak tak unpuwa-o. Nde, iri kwasa lak tak unpuwa iri na-ge ap misiger-o luk-nen mbi nuguruwa bug-o.