YEREMIA 9 - Nanduk Ngget Tul Pidnak Wene

¹ An nelem nap wim nap-nen indiga ereba na unpud yib-e kubu-nen lengge-nen kundugu yip tenak worayek-nen an nanggul-e yi kenanggugwi ondoro yi kobong tak nggal woralat, nde, niyip lengen-e yi ugul kundugu pempa so tenak woraso ereba na nggal-nen-e mondok konak lombog-o!

² An nde nembaga karu me ereba nde ap tula mborogolat nene yurak o lije nde kalepndik nggal-nen-e an nelem nap enaye-nen inggi mbara mbereyekluk, mondok keya unpuruk mbetleb-o. It oboksa-ge mondok mot mot kwarugwi buk, lugud perel kwarugwi nap-nen yili-o.

³ Pempa enesiget yurak nak lud tak puruk worali-o. It woragwi o oboksa-nen lud tak nak kwarugwi-ge mondok abu lak yosolat, lugud tak kwarugwi mende nak amawi kundusu-o. Nagawan Indo-nen yosolar-e: ”It an nilirak-nen-e an nimin-e ’At iri-ge nit Nenmbal Pem Nagawan-nen yusu-o’ luk nibirigit lak, kundugu kandugu meya nak kwat tenak worali-o” luk yij-o.

⁴ Enambiktak lombok-nen ennggamirak enne amburu abiyem-o luk kwara wolmomtag-o. Onowe onowot eneyabi minggirig-et nde, it-nen yidnak wene-ge enarem nggwigit lak yogolat, Yakup-nen kwarid nggal-et it-nen na kwarogolar-e, it eneyabi minggirig-et nde, enmberam lujwa-o. Ap oboksa-nen enesiget ennggamirak onpok pil nin me nan me waring kali-o.

^5-6 It oboksa-nen it na it-nen enmberam lagolat, misiger-o luk mbi-nen ndemeret mot mor-e yili bug-o. Enemnde-ge enesiget yugwi kwasa labuk yidnak me, it-nen meya kwarugwi iri keya burag-e meya yusu-o. Meya nak kwaril kwaral mborogolat, ap enmberam nak lagolat, iri nggal nak pempa mondok kundugu kandugu kwarogolat, Nagawan Indo-ge mondok abu abu mbo ibili-o.

⁷ Iri yogola karuk, Nagawan Indo Mondok Amawi Worak iri na-nen yosolar-e: ”An nilirak yu-ge mondok kona kopkap lak iminep mbara labuk makluk, logam abut mbarugwi nggal it inndi kasolat enabut mbarimin-o. Nde, an nilirak meya nak kwarogolat woragwi ereba-ge ereb-e no mende nggal kwat inpimin kene?

⁸ It-nen wirik pugwi wene-ge ap mondok lak tak unpurak mare ninggis nggal-et wirik pili-o. Iri yogolar-e, ebe lak enesiget wene ereba na nak wirik pili-o. Nde, it-nen yili wene-ge mondok konak nak ap inndi wanurak nag-et wirik pili-t nde, ndemerer-e ap enare purak mende nde wirik pili-o.

⁹ Ap enlem yu nggal enpem it-nen kwarugwi ndak ndak onggo pigit lak keya inpimin-a? It-nen kwarugwi onggo-ge mondok pimin-er-o. Nagawan Indo an-net wene yusu-o” luk yij-o.

¹⁰ Yosoloma, Yeremia-nen yosolar-e: ”Wam tusuangge taroso sa ereba min ndobo bem min-e umbuk merek lesa labuk yosolat, ap na iri nggwe mbirigit lak yogolat ala karuk, an-e abuwa-nen yip tosolat, tabun pimin-o. Nde, iri me-ge wam ene na mondok kuligit lak yogolat, towe mena na ndegera mborosolat, lak yij-o” luk yigi-o.

¹¹ Nagawan Indo-nen yosolar-e: ”Yerusalem iri-ge tudsa ngguru rak pil lobok yumu, ndakngge kura woraso ondoro kwat ma-o. Nde, Yewura siri ereba-ge enpe woragit lak, o kugun ma-o” luk yij-o

¹² Yosoloma, an-nen kin wanosolar-e: ”Nagawan Indo wa-e. Noluk-nen kar-e o yu-ge nembaga nggal amburu lak, usu nggwara keya bugunmu, ap-nen na iri nggwe-ge nigit lak ma-o? Ap erep-nen-e: ’O yu iri nggal kwarak pid iri-ge erem-e yu nggal pem-nen ndowaga kwarak pamu-o’ luk enaru momtak mbi worali-a? ’Iri bem-nen kwarigi-o’ luk, at-nen ap erep yak unduwakluk, mbena yak tigen nab-e ta-o?” luk kin wanigi-o.

¹³ Yosolakmu, Nagawan Indo-nen onggo yosolar-e: ”Iri nggal kwat yid iri-ge an nilirak-nen an-nen mul indidnak wene ereba na kwara yebet kagit lak yogolat, an-nen yidnak yidnak kwarigit lak yogolat, an-nen enpem pidnak ereba na wanigit lak yogolat yiga iri-nen ndowaga kwat yij-o.

¹⁴ Nde, ir-e mondok wene kulugwi buk, nanduk onmborak-nen mul indidnak ereba na-t kwarogolar-e, kugwiwak Mbaal erembel wanugwi-o.

¹⁵ Iri bem-e, Nagawan Indo Mondok Amawi Worak Isarael nap Enmbal Pem Nagawan an-nen kwarimin wene yu kwara kuli-o. An-nen an nilirak mak ondosolar-e, ngari worak mende mak ondosolat, ninggis mende yi kenangga mak ondosolat kwarimin-o.

¹⁶ An-nen-e it iri-ge ap enlem it min onmborak min-nen eneyagwi buk nap ennggendumu ndibi ndi rak inpimin-o. An-nen it enpem mbud yurak san ombo inpil lobok yosolar-e, mondok pendaga lak tak inpimin-o” luk yij-o.

Yerusalem woragwi nap-nen ”Yongga nindi-o” luk Nagawan Indo wene mbo ibidnak wene 9:17-26

¹⁷ Nagawan Indo Mondok Amawi Worak iri na-nen at ilirak yak ondosolar-e: ”O yu me-nen kwat yusu mende yeba-ge kwara yebet kudtag-o. Iri lug-e ndag-et nak yip lilan wanugwi kweyap lobok yuwakluk wene mbo unpurag-o. ’Lobok yer-o’ yak undugupmu, lobok yuwarik, tabun puruk woragolat, yip lilan wanogolat ndawi yuwag-o” luk yij-o.

¹⁸ Nde, Yewura nap-nen yogolar-e: ”Nit nunpud yip lilan wanogolat ndawi yuwak-nen ’Ndag-et yer-o’ yak ender-o. Iri yogola kuluruk, nit niniyip lengen yoso mbosolar-e, nit nenlabengen piri rak puwag-o” luk yiga-o.

¹⁹ Nde, Sion-nen-e yip togola kulili-o. Yip togolar-e: ”Nir-e lak tak nonpogolat, ninnggiri yaga keya ninpiga-o. Nit nunuwi-ge nir-e mondok keya burag-o. Nit woragwi nunuwi-ge ap-nen mijara nari wari rak piga-o” luk yij-o.

²⁰ Nde, an-nen yosolar-e: ”Kweyap oboksa wa-e. Nagawan Indo-nen yidnak wene kwara koler-o! Kinligwami-ge yip togolat-nen yugwi ndawi mul undurag-o. Nde, kennggamirag-e tabun puruk woragolat, yip lilan wanugwi ndawi mirik unpurag-o.

²¹ Nde, wat yugwi elem-e kebet uru belak (jendela) nggwe ngguwagarik, nagawan woraso sa nggwij-o. Nggosolar-e, tulabiyem-nen li marik marik indij-o. Nde, ap sujwe-ge silmu-nen indij-o.

²² Iri rak enpamu, eneyak ngen liring kaidnak nggal nin me nan me ontogwag-e kasa ereba liring kuring worali-o. Nggandum mbato mbara keya buruk, ndok wirigit lak, liring nak kaidnak nggal worali-o. Nde, yu-ge Nagawan Indo-nen kenmanggim yidnak wene mondok nebem pidnak irit yak kindigi-o” luk yak indigi-o.

²³ Nagawan Indo-nen yosolar-e: ”Ap enaru indi tenggerak-nen-e at indi nggat nggat worak iri na bem indi kek yurak pug-o. Amawi worak nap-nen-e amawi iri na bem indi kek yurak pug-o. Nde, insilobulo worak nap-nen-e insilobulo iri na bem indi kek yurak pug-o.

²⁴ Ta-nen nde yi mende ndi mende bem indi kek yurak ala-ge, at-nen an aru yosolat, yebet neyasolat, an-nen pem irit enabuwa kasolat, an-nen mot mor-et ’Iri nggal kwarurag-o’ luk watsa posolat kwaroso wene ereba na bem-net indi kek yosolar-e ob-o. Ereba oboksa kwarogola-ge, an-e nindi alen tak pugub-o.’ Nde, an-e Nagawan Indo-nen yak kindigi-o” luk yij-o.

^25-26 Nagawan Indo-nen yosolar-e: ”An-nen Mesira nap min Yewura nap min Erom nap min Amon nap min Moap nap min enanggulsu porosa mbarugwi nap nembaga woragwi nap min enpem-angin worak mberak purak tarem-e wog-et ma-o. It oboksa-nen iniye ambesap mbariga-t nde, inndi ambesap mbarigit lak, inndi ambesap mbarugwi ut mimirik we iniye ambesap nak mbaridnak me, it enlem nin nap na irit, Isarael nap na irit iniye ambesap mbarugwi buk nap-net yili-o” luk yij-o. 10:1–13:27 Empat pasal ya arem-e kugwiwak erembel wanugwi wene min kugun wok unpuruk mbururak wene min Nagawan Indo-nen at ilirak inmin-e ”Irit kwat kinpimin-o” luk urul pid wene min mbarak worasu-o. Iri-nen Nagawan Indo-nen-e Yeremia yak tosolar-e: ”Ap-nen kwaruwokluk yili-o” luk obok yak tid wene min at ilirak-nen at indi puru rak pugwi wene min mbarak worasu-o. Nagawan Indo-nen na irit, Yeremia-nen na irit, Isarael nap yak ondogolar-e: ”Kinndi kek yogolat, meya kwarogolat yili meyog-o” luk yak indiga wene min-et mbarak worasu-o.