YEREMIA 7 - Nanduk Ngget Tul Pidnak Wene

Nagawan Indo ama-nen Yeremia-nen aid wene yidnak wene 7:1-15

^1-3 Nagawan Indo-nen yak norosolar-e: ”Kar-e an nama mburugundik, Yewura nap-nen an nerembel wil nggugwi pak tu mende iri na me mendak woralar-e, wene yu yak indi-o: ’Kit-nen woragwi kenpage iri-ge mondok nin tak per-o. Kit-nen iri nggal kwarogola-ge, Nagawan Indo Mondok Amawi Worak, Isarael nap Kenmbal Pem Nagawan an-nen-e yu me pem irit wolmer-o luk yak kindimin-o.

⁴ Enesiget yugwi nap-nen yogolar-e: ”Nir-e yamuksa worali yu-ge ndemeret Mbal Pem Nagawan uwi-net yusu-o!” luk watsa kenan pem-et yogola-ge, ndemerer-o luk, kulurak pug-o.

⁵ Kit-nen woragwi min kit kenpage min-e nden yaga keya buruk, kanggamirak inmin-e mondok mot mot nak kwat kerak mbogolat wolmer-o.

⁶ Kir-e enlem nin nap min li marik mul min kweyap togwe min anggun panggun tak unpurak pug-o. O yu me woragwi meya kwarugwi buk nab-e mondok undurak pug-o. Kit-nen mbal pem nagawan nin-e erembel wanurak pug-o. Kit-nen iri kwarogola-ge, lak tak kunpuwa-o.

⁷ Kit-nen nde kit-nen woragwi min kenpage min nin tak pogola-ge, an-nen konmborak pem wok indigi o yu me-t pem wolmer-o luk yak kindimin-o.

⁸ Alat nde, kit-nen enesiget wene iri na bem kinndi wat tak pili iri-ge wewesa pili-o.

⁹ Nde, kir-e yariya wanogolat, ap worogolat, unun onkwe worak inmin meya kwarogolat, kenesiget ”Iri nggal kwarosola kagi-o” luk owak mbarogolat, Mbaal kugwi amanggim pogolat, kit-nen kenaru buk kugwiwak ereba na erembel wanogolat kwatli-o.

¹⁰ Iri kwatlug-et nde, an neram an nama yu me lobok yogolar-e: ”Nir-e konak worali-o!” yogoluk, tuguruk meya mbilaro ngin mende ereba na kwatli-o.

¹¹ Kit-nen yik kagolar-e, an nuwi yu-ge ap nden unpugwi nap woragwi ondoro rak pili, lak? Kit-nen kwatli ereba oboksa-ge an-e kasu-o.

¹² Kir-e o Silo siri nanduk an-nen an nerembel wanuwakluk lenak pigi iri na me mburugupndik, an nilirak Isarael nap-nen meya kwaridnak pem o iri kwarak pigi iri nak ker-o.

¹³ Kir-e mondok pempi pempa an-e wene yak kenderenak worala-t nde, kir-e mondok kulurak kinsili yigeb-o. Kir-e meya iri oboksa kwat tenak woragolar-e, an-nen wene yak kondosola-ge, nene ereb-e mondok nggarugwi bug-o.

¹⁴ Iri yogola karuk, an nuwi kit-nen kinndi ebem wat tak puruk woragwi, an-nen kit min konmborak min wok kindigi yu-ge an-nen nanduk o Silo kwarak pigi iri na nggal-et kwarak pimin-o.

¹⁵ Nde, an-nen konowe konowosi Isarael nap sera wirik inpigi iri na nggal-et kir-e an neram-nen sera wirik kinpimin-o’ luk yak indi-o” luk yak nirij-o.

At ilirak-nen wene kulugwi buk 7:16-28

¹⁶ Nagawan Indo-nen yosolar-e: ”Yeremia wa-e. It ap yu-ge tepan enmanggim yurak pug-o. It yongga unduwakluk, an neram mondok tepan yurak pug-o. Lembesa nemengen mbarurak pug-o. An-e tepan yugun-e mondok kulimin pug-o.

¹⁷ Nde, Yewura o siri ereba me min Yerusalem tula tula ereba me min it-nen kwatli-ge kat kondomok kerengen-nen kasu irir-o!

¹⁸ Li marik-nen-e kan nggara ndok worogolat, ap-nen-e kan mabogolat, kweyap-nen-e oroti kwarurak omok worogolat iri kwarugwi ereba-ge it-nen kugwiwak misik, it-nen unu misik yarogolar-e, Aid Arem Woraso Kwe Nagawan yili iri na amanggim kwarugwi-o. Nde, it-nen an nindi ngari yaga keya buwoklug-e, anggut amburu ereba na-ge mbal pem nagawan erep amanggim pugwi-o.

¹⁹ Alat nde, iri kwatli iri-ge ndemeret an nindi kala keya bili-ge lag-o. It enambikpebe inndi nde kala keya bogolar-e, it nde innggiri kali-o.

²⁰ Iri kwatli iri bem-e Nagawan Indo Mondok Kek tak an-nen-e an nisilepma mondok kwiye worag-e an nerembel wanugwi o yu min ap enpem min it-nen parugu woragwi urugup worak oboksa min e min yapmu woraso mende min ebem mberak pimin-o. Nde, an nisilepma-ge mondok nigi yoso buk kanduk nggal amare yirip wirip tenak wolma-o” luk yij-o.

²¹ Nagawan Indo-nen yosolar-e: ”Nilirak wa-e. Kit-nen an namanggim pugwi mende wosa ebis-et kan pogolar-e, erep an namanggim pidnak ereba-ge kit norag-e ob-o luk yidnag-et worasu-t nde, Nagawan Indo an-nen yak kendeyeg-o. Mondok oboksa kondomok mer-o!

²² Nanduk konmborak Mesira-nen wesera inmin lobok yosolar-e, an namanggim wosa kan pogolat, namanggim erep pogolat-nen kwarogolat wolmomtak wene-ge an-nen mul indigit lag-o.

²³ Alat nde, an-nen enpem posolar-e, an-e it Enmbal Pem Nagawan kwat yosolat, nde ir-e an nilirak kwat yogolat kwat yurak pem ’Kir-e an-nen yidnak yidnak nak kwarurag-o’ luk iri nak yak undukmu-o. Iri-nen it-nen enalen worak wolmakluk, ’An-nen kenpem pidnak ereba na nak kwarogolat wolmomtag-o’ luk yak undukmu-o.

²⁴ Alat nde, it-nen-e kwara kuligit lak yogolat, yebet kagit lak yogolat kwariga-o. Iri yogolar-e, it ondomok wene kulugwi buk, inndi amawi iri na-nen yidnak yidnag-et kwarogolar-e, konak nggal-e kwarigit lag-o. Are, ebem lud nde meya kwariga-o.

²⁵ Nanduk konmborak Mesira-nen lobok yiga kuri yawo kuri woragolar-e, an-nen-e an ndegel nubugwi an nene lomboksa yugwi nab-e kit kendam wirik enperenak irit woraso-t nde,

²⁶ it enne-ge kwara kologolat, kwara yebet kagolat mbi mondok kwarigit lag-o. Are, konmborak-nen kwarugwi-ge te nggal-et nde, kit-nen-e wene kulugwi buk, keneyanggo lag-e terak minik ombol nggwe irit kwat yigeb-o” luk yij-o.

²⁷ Iri luk, Nagawan Indo-nen yosolar-e: ”Iri bem-e, Yeremia wa-e. Wene yeba oboksa an nilirak ereba-ge yak undugun-et nde, kat-nen yak undugun wene-ge kwara kuluwa bug-o. Kat-nen wene mbo unpugun-et nde, onggo kene erep mondok nggaruwa bug-o.

²⁸ Iri ala karuk, kat-nen yak ondosolar-e: ’Kir-e Nagawan Indo Kenmbal Pem Nagawan-nen yidnak yidnak kwarugwi buk kenlem-o’ nak yak indi-o. It iri-ge it-nen kwarugwi bem onggo angin worak enpem pidnak ereba na bem-e inndi-ge kwara wanili bug-o. Ndemeret an-nen yidnak yidnak kwarugwi elem-e it enarem-e lak yosolat, enemnde bem-nen iri wene yurak tet mondok lak yidnak worasu-o” luk yij-o.

Inom Mbirikmu-nen meya nggok kwaridnak wene 7:29-34

²⁹ Nagawan Indo-nen yosolar-e: ”Yerusalem woragwi nap wa-e. Kondomok kunpud yip ter-o! Kenanggulsu labena mbo ber-o! Nagawan Indo an-nen abu keya kinpigirik, yawo nisilepma kenpem pusu me, o ndobo worak sa ereba me ndobo wolak pem-nen yip lilan ndawi bem wanogolat wolmer-o.

³⁰ Nde, it Yewura nap-nen meya kwarogolar-e, it unkugwiwak an-nen nisili kasu ereba na-ge it-nen-e an nama piga-o. Iri nggal kwarogolar-e, an nuwi na-ge emben to rak pili-o.

³¹ Wam wosa kan purak ondoro misik koniga unu-ge Topet iri-ge Inom Mbirikmu iri me it inlirak wosa kan purak ondoro koniga-o. Nde, iri kwariga iri-ge an-nen ’Iri nggal kwarer-o’ na yak indigit lag-et nde kwariga-o. Iri-nen iri nggal kwarurak wene na an narem-nen na mondok yebet kaso bug-et nde kwariga-o.

³² Iri bem-e, ondoro iri unu yogolar-e, ’Topet’ yogolat, ’Inom Mbirikmu’ yogolat yili-t nde, unu iri yigit lak yurak tarem-e wog-et ma-o. Iri yosolar-e, unu-ge ’Unlusu Mbarugwi Mbirik’ yuwa-o. Ap yapma unpurak ondoro lak me, nggweyak iri me-ge ap yapma unpugwi ondoro nde kwat ma-o.

³³ Nde, ontogwag-e towe amanggim nunggwi mende nde kwat yosolat, ndakngge isilepma worak amanggim nunggwi mende nde kwat yosolat ma-o. Nde, iri na nujwa naru mondok sera wirik puwa bug-o.

³⁴ O yu me-ge o lid amburu lak usu nggwara labuk ma-o. Nde, Yewura o siri oboksa-nen Yerusalem tula tula-nen enalen-nen enne lek kagwi min kwe wanogolat tarem enalen-nen enne lek kagwi min ereba na-ge an-nen lak tak pimin-o” luk yij-o.