YEREMIA 52 - Nanduk Ngget Tul Pidnak Wene

O Yerusalem siri wim nap ininggem mbid wene 52:1-11

¹ Nde, Sendekia iri na-ge woralar-e, olengen dua pulu satu (21) bem-e Yewura nap nagawan men yij-o. Nde, Yerusalem iri me nagawan woralar-e, olengen sebelas irit woragij-o. Nde, ija unu-ge Amutal. Nde, ija iri-ge o Lipna nap Yeremia ara-o.

² Nagawan Sendekia-nen na Nagawan Yoyakim-nen meya kwaroso nggal-et Nagawan Indo erengen pem irit meya kwat tenak woragij-o.

³ Nagawan Indo-nen-e Yerusalem woragwi nap min Yewura nap min enpem isilepma kwarat posolar-e, tuguruk nggetlel inpigit lak, at eram-nen abu sera wirik inpij-o. Nde, Sendekia iri na-ge Mbabel nap Nagawan Nebukatnesat iri na imin eyak worosola-ge,

⁴ Sendekia iri na nagawan men yarik, olengen sembilan tak posoma-ge, Nebukatnesat iri na at-nen idnak san ombo oboksa inmin lobok yosolar-e, waneya sepulu, tanggal na sepulu-t iri bem-e Yerusalem inmin wim mbarosolat enpem kore yij-o. Iri yogolar-e, o Yerusalem siri ombol nggwe it unuwi lije-ge worogolat, kut ondogolat kerep pak leget wiriga-o.

⁵ Kut wat unpuruk irit worakmu, Sendekia iri na-nen o tena woralar-e, olengen-e sebelas pem wok yij-o.

⁶ Nde, tanggal sembilan, waneya empat iri bem-e olengen na iri na arem-et ap oboksa-nen nunggwi mende mondok lak yosolar-e, mondok nogoro nggok irit enpem mbosola ereya na-net

⁷ Yerusalem pak leget na-ge wim nap-nen ndamorogola karug-e, Mbabel nab-e o siri iri na lop lop tak woragola-t nde, Yewura nap san ombo oboksa-ge kubu-t nde, kwiye-nen Yareren mbirik ereba na nggwe kwiye mbiriga-o. Nde, it iri na mborogolar-e, tula-ge nagawan iri-nen yik kudtak amanggim engen kerengen yagidnak iri na nggwe-nen kerep leget ponok ponok kundik pidnak sa tumende iri na nggwe-nen mbiriga-o.

⁸ Alat nde, Mbabel nap san ombo-nen-e Nagawan Sendekia iri na-ge muk kil mbigarik, Yeriko mbirikmu-nen tenaiga-o. Iri yogola, at-nen idnak san ombo oboksa-ge at keya buruk, ndi yiga-o.

⁹ Nde, Nagawan Sendekia iri na tenagurug-e, o Iripla Amat nggweyak pem iri me Nagawan Nebukatnesat eram pil mbiriga-o. Iri yikma-ge, Sendekia iri na-ge angin worak wene ebem pij-o.

¹⁰ Nde, o siri iri me-net Sendekia na erengen pem-et ilirag-e indiga-o. Iri-nen Yewura nap pemerinta yabu winde ereba na min-et oboksa indiga-o.

¹¹ Iri rak purug-e, Sendekia iri na-ge erengen tegera keya buruk, kamat luk, Mbabel waruk mbiriga-o. Iri me-nen-e o kubu me pil nggwikma, mbepme mbirigit lak irit worasoma wat yij-o.

Nagawan Indo uwi iri na yigisa lak tak pidnak wene 52:12-23

¹² Mbabel Nagawan Nebukatnesat iri-nen o tena woralat olengen sembilan belas, waneya-ge lima, tanggal sepulu iri bem-e ap misik unu-ge Nebusarandan iri-ge Yerusalem lobok yij-o. Nde, at iri-ge Nebukatnesat nggomo woroso, nde, at yik karok woragwi san ombo enanggul pem woraso irit woragij-o.

¹³ Nde, at Nebusarandan iri na-nen-e Nagawan Indo uwi min o nagawan woraso sa min Yerusalem iri me-nen ap yok nggok unuwi ereba min oboksa kan puruk keya bij-o.

¹⁴ Nde, san ombo owosirak inmin lobok yid ereba na-nen-e Yerusalem pak leget ereba na-ge ndamera ngguru rak piga-o.

¹⁵ Iri rak purug-e, iri me yi mende ndi mende kwarugwi enaru nap minggirik ereba na min insilobulo lak nap min it Mbabel nap enambigit mbiridnak nap min it ereba na oboksa-ge Nebusarandan-nen-e kwel unpuruk, Mbabel mbirij-o.

¹⁶ Alat nde, ap erep mondok enlengenma lak ereba na-ge Yewura iri me keya inpij-o. Keya onposolat-nen yabu enpem posolar-e: ”Kir-e anggut yabu wanogolat, yabu erep min-et wanogolat wolmer-o” yak indij-o.

¹⁷ Nde, Nagawan Indo ama woraso posid tembaga o owak min nggweyak koma min tembaga-nen konidnak yimbe nggok iri na min Mbabel nap-nen-e ndamera keya buruk, tembaga ereba na oboksa-ge mberek turuk, Mbabel mbiriga-o.

¹⁸ Iri-nen erep waniga-ge: nggweyak tege min wam wosa kan pugwi sa mabe yarak pugwi min Mbal Pem Nagawan ama tal pakwi mende min Mbal Pem Nagawan amanggim wam wosa pogolat wam eyabi kenangga pugwi embe min emben konak mende kan pugwi yarak woraso embe min iri-nen Nagawan Indo erembel wanogolat-nen kwarugwi murugwi silobulo tembaga-nen konidnak mende ereba na min-et oboksa mburunuruk mbiriga-o.

¹⁹ Iri-nen emas min perak min-nen konidnak embe marik marik min kan ngen ndamugwi ondoro min Nagawan Indo amanggim wam wosa kan pogolat eyabi kenangga pugwi ondoro min mabe ondoro min tal owak min emben konak mende kan pugwi ondoro embe ereba na min anggut amburu Nagawan Indo amanggim kilik purak yarak pugwi ondoro ereba na min ereba na oboksa-ge Nebusarandan ondomok-nen wanij-o.

²⁰ Nde, Nagawan Indo uwi wiridnak Nagawan Salomo-nen tembaga-nen konid mende-ge yu-o: o owak mberen min nggweyak koma min yi kenangga woraso ondoro nggok min yimbe ebem watsa woraso sapi ndak worak duabelas min ereba na-ge mondok angin kwarat me, angin ndak wururag-e meya yij-o.

^21-22 Tembaga-nen konidnak o owak mberen ereya-ge ebe-ge ndak ndak nag-o. Mberensa-t mor-e delapan meter-o. Nde, abare ndak worag-e 5,3 meter-o. Nde, arem nggwe-ge ijawa-o. Eraret mambu-ge tuju pulu lima (75) milimeter-o. Nde, o owak ereya na-ge eraret abam nggwe-ge anggulwak mor-e 2,2 meter-o. Nde, anggulwak ndak worak piga ereya na bem-e tembaga bem kere lara mendaga puruk, engen ndelima ndak wosa piga-o. Nde, ereba oboksa-ge tembaga bem-nen konidnag-o.

²³ Nde, tembaga kere bem panggara ndelima engen ndak wosa o owak ereya na anggulwak pem pidnak ereya na-ge seratus (100) pidnag-et nde, ena nggwe-nen lik kagolar-e, sembilan pulu enam (96) nak kagwi-o.

Yewura nap Mbabel wok unpuruk mbiridnak wene 52:24-34

²⁴ Nebusarandan-nen erep kwarij-e, tepan ombo kek tak Seraya min at indipma tepan ombo Sepania min ap kenan Nagawan Indo uwi tumende yik karok woragwi nap min

²⁵ iri-nen nagawan nggomo wurugwi nap o silmu worali nap enpe tuju min san ombo onowe min san ombo-nen yabu wanugwi engga mbaroso nap san ombo indipma iri na min ap nggok nak enpe enam pulu (60) ereya na min tena inpij-o.

²⁶ Tena unpurug-e, oboksa wok unpurug-e, Nagawan Nebukatnesat eram o siri Iripla,

²⁷ o Amat nggweyak pem inmin mbirij-o. Inmin mberamu ereba me-nen-e andi bandi rak unpuruk, indiga-o. Iri nggal kwasa Yewura nab-e kamat unpuruk mbirigarik, mbo unpugwi sa ereba na me inpil mbiriga-o.

^28-30 Inpil mbiriga nap oboksa-ge 4.600 irir-o. Nde, Nebukatnesat-nen nanduk abok pendaga wok unpuruk mborosolar-e, at-nen o tena woralat tarem olengen-e tuju bem nandug-er-e 3.023 irit inmin mbirij-o. Nde, imbirik olengen delapan belas pem-e Yerusalem woragwi 823 irit inmin mbirij-o. Nde, Nebukatnesat-nen o tena woralat tarem olengen dua pulu tiga (23) bem tak posola tarem, Nebusarandan-nen ab-e 745 inmin mbirij-o.

³¹ Nde, Yoyakin iri na mbo unpugwi sa Mbabel ibil mbiridnak worasoma, waneya duabelas, tanggal dua pulu lima (25), olengen tiga pulu tuju (37) bem Ewil-Merondak iri na-ge Mbabel nagawan men yij-o. Men yosolar-e, olengen iri na bem-et at-nen-e Yoyakin iri na abuwa kasolar-e, o kubu me-nen wisirik ibij-o.

³² Wisirik uburug-e, konag-et kwat obosolar-e, nagawan nagawan erep Mbabel iri me mbo inpidnak ereba na-ge kek tak onposolar-et nde, Yoyakin iri na perak terak minik irit kek tak ibij-o.

^33-34 Nde, at iri na yak togolar-e: ”Kar-e o kubu me woragolat-nen yirik woragwi sum keya buruk, we sum yutluk, nunggwi mende-ge nagawan woraso sa iri me-nen pempa nasolat wolmomtag-o” luk yak tiga-o. Iri-nen at-nen ukwe pidnak onggo purak na tol-e pempa wok togolar-et woraiga-o.