YEREMIA 38 - Nanduk Ngget Tul Pidnak Wene

Yeremia yi mbun konidnak eberek yidnak arem woragid wene 38:1-13

^1-3 Nagawan Indo-nen an yak norosolar-e: ”Kebem pusu wene yu-ge ap oboksa yak indi-o” luk yu nggal yij-o: ”O siri yu-ge an-nen-e Mbabel nap san ombo ininggem pimin-o. Iri yumu, it-nen urugwe nggwe rak kunpuwa-o. Nde, ta-nen nde o silmu wolma nab-e wim pem-nen ondogolat, nere bem-nen wat yogolat, kugwi bem-nen wat yogolat kwaruwa-o. Alat nde, ta-nen nde tebe luk Mbabel nap enambigit mburuwa nab-e unduwa bug-o. Enkap ndaguwa-o” luk yid iri na an-nen yak ondosola-ge, Matan ambara Sepasa min Pasiut ambara Nggendalya min Selemia ambara Yukal min Malkia ambara Pasiut min-nen-e an-nen yigi wene ereba na oboksa kuliga-o.

⁴ Nde, it yabu winde ereya na nagawan eram mbogorolat-nen yogolar-e: ”Ap yu-ge mondok wururag-o. At yu-nen wene iri nggal yidnak pem san ombo min o siri yu me worali nap erep min oboksa enmawi lak tak pusu-o. At-nen-e ab-e yongga undusu bug-o. Are, lak tak unpurak wene nde yusu-o” luk yiga-o.

⁵ Yogoloma, Nagawan Sendekia-nen onggo yosolar-e: ”Ob-o. At iri-ge kit kinndi-nen kwat uburak peraigep irit kwat eber-o. An-nen meyog-o yak kundurag-e meya-o” luk yak indij-o.

⁶ Yak ondosoloma-ge, an-e tenaga wok nuburuk, kere yela nagawan ambara Malkia-nen idnak yi kenanggugwi nggweyak emnde mbaridnak nagawan woraso sa o mborom iri na me mberak nibiga-o. Nde, yi emnde mbaridnak iri-ge eberek yidnak, miril nak kobong tak iri na me miril arem mberak nibikma, mbigi-o.

⁷ Iri nibiga-t nde, Sundan nap misig-e nagawan woraso sa iri me yabu wanosolat woragij-o. Nde, ap iri unu-ge Ebet-melek. Nde, at-nen kulidnggal-e yi mbun mbaridnak iri na arem nibil nggwidnak wene kulij-o. Nde, nagawan iri na-ge Pak Tumende unu Mbenyamin iri na me koreyak worasola,

⁸ Ebet-melek iri na-ge iri na me mberarik, at-nen nagawan iri na yak tosolar-e:

⁹ ”Nagawan mondok kek tak wa-e. Ap ereba-nen kwariga iri-ge mondok meya-t kwariga-o. It-nen-e Mbal Pem Nagawan ene lomboksa yoso nap Yeremia na-ge yi mbun mbaridnak arem mberak piga-o. Nde, o siri yu me-ge nunggwi mende-ge mondok lak yidnak me, Yeremia iri-ge nere-nen iri me wat ma-o” luk yij-o.

¹⁰ Yosoloma, nagawan-nen Ebet-melek ebem posolar-e: ”Yeremia iri awo wat yigit lak ma, kar-e kenan nap inmin mburugundik, yi mbun mbaridnak arem-nen waga pil lumer-o” luk yak tij-o.

¹¹ Yosoloma-ge, Ebet-melek iri na-ge ap kenan inmin mbirigarig-e, nagawan woraso sa yi mende ndi mende ndok wosa pugwi iri na me mbiriga-o. Mbirigarik, sum umbuk ereba na iri na me-nen wanurug-e, sum umbuk na-ge kere bem yela an neram yi mbun mbaridnak iri na me mberak piga-o.

¹² Nde, Ebet-melek-nen yak norosolar-e: ”Sum umbuk mberak pil ngguwaige ereba na-ge kere-nen kaboro turuk tak puwa naru, kere mak mak karing lapmu purag-o” luk yak nirij-o. Yosoloma, an-e Ebet-melek-nen yak nirid iri na-t kwarigi-o.

¹³ Iri na kwasa yi mbun mbaridnak sa-nen lit yaga wesu bem nibil luwarug-e, nagawan woraso sa o mborom iri na me nibikma, woragi-o.

Yeremia-nen indi uwi ya buwakluk Sendekia-nen nggi yidnak wene 38:14-28

¹⁴ Nde, misik tarem-e Nagawan Sendekia-nen-e ap enpem pamu, wok nuburuk nimin mborogolar-e, Nagawan Indo ama nggugwi pak tumende mberen keya buruk, kenan tak pogolat iri na me nibil mbirikma-ge, at-nen an yak norosolar-e: ”An-nen nde kat kin wok kobosola-ge, onggo-ge nam-et nak yak nururag-o. Mondok kura burak pug-o” luk yij-o.

¹⁵ Yosoloma, an-nen onggo yosolar-e: ”An-nen nde mondok ndemeret yak korosola-ge, nagawan kat-nen-e an-e nurugun-o. Nde, an-nen nde kat nggomo kurumu-ge, nagawan kar-e an-nen nggomo kirimin iri na ndak ndag-e kwarugun pug-o” luk yak tigi-o.

¹⁶ Yak tosolakmu, Nagawan Sendekia iri na-nen mbik mbok yak norosolar-e: ”Mbal Pem Nagawan uruk na woraso, Mbal Pem Nagawan-nen nunluk wolmomtak elem wok nondoso iri na owag-o. An-nen-e mondok kirimin pug-o. Iri-nen kat kuruwokluk yili nap-nen kuruwakluk, kiminep wesera na ininggem kibimin pug-er-o” luk owak mbarij-o.

¹⁷ Yosoloma, an-nen Nagawan Sendekia yak tosolar-e: ”Mbal Pem Nagawan Mondok Amawi Worak, Isarael nap-nen erembel wanugwi Mbal Pem Nagawan-nen-e yu nggal yak kirij-o: ’Kat-nen nde mborosolat, Mbabel nagawan iri na-nen idnak ap yabu winde ereba na enambigit tebe yil mborosola-ge, kar-e kirigit lak keya kobogolat, o siri yu na kan pigit lak keya bogolat ma-o. Kat na irit, kogwela inmin-e kenkap nggarig-et woragub-o.

¹⁸ Alat nde, kat-nen nde it enambigit tebe yigit lak yosola-ge, o siri yu-ge Mbabel nap ininggem yosolat, kan puruk lak tak puwa-o. Kat na mondok mengga mburugun pug-o’ luk yak kirij-o” luk yak tigi-o.

¹⁹ Yosoloma, Nagawan Sendekia-nen yosolar-e: ”An-nen kwiye kwarat kasu-ge it Mbabel nap-nen nit nab-et nde, Mbabel nap enambigit mbiriga ereba ininggem nubuwama, andi bandi rak nubuwa iri nak kwiye kasu-o” luk yij-o.

²⁰ Yosoloma, an-nen onggo yak tosolar-e: ”Nagawan kar-e kegera it ereba ininggem kubuwa-ge lag-o. An-e kat nak perak Nagawan Indo-nen yidnak yidnak kwari-o luk mondok kemengen mbarusu-o. Iri kwarosola-ge mondok wene lag-o. Nagawan kat na mondok kuruwa bug-o.

²¹ Alat nde, nagawan kat-nen nde enambigit tebe yigit lak yosola-ge, abok-nen kwat yurak iri-ge Nagawan Indo-nen nabi nggal pem-nen nam tak posola kagi-o.

²² Nabi nggal pem yik kaginggal-e, Yewura nagawan woraso sa woragwi kweyap erep ereba na-ge ndegel unpuruk, Mbabel nagawan iri-nen idnak ap yabu winde ereba na endam wok unpuruk mborogola, kweyap ereba na-nen yogolar-e: ’Nagawan iri na-ge at anggamirak imin panggarak ereba na-net amberam laruk, yemndak ibiga-o. Yawo-ge at iri na-ge ijok mboroksa mirilmu yubuk yosola-ge, it oboksa-nen-e keya ibiga-o’ luk yil yil mborogola kagi-o” luk yak tigi-o.

²³ Yuruk, tuguruk an-nen yosolar-e: ”Kat kogwerak kilirak oboksa Mbabel nap endam waruk mburuwa-o. Nagawan kat na mondok mengga mburugun pug-o. Nagawan kar-e Mbabel nagawan-nen tena kuburuk, o siri yu na kan mbela lak tak puwa-o” luk yak tigi-o.

²⁴ Yak tosola-ge, Nagawan Sendekia-nen yak norosolar-e: ”Kar-e mondok kuruwa-o luk, nit nenmberek nak-nen yili wene yu-ge ap misiger-o luk tet yak undurak pug-o.

²⁵ Nde, it yabu winde ereba na-nen nde nit nenmberek wene mbariga-o yogola kulurug-e, kat keram lobok yogolar-e: ’Kir-e no wene mbarigeb-o? Ndak yi-o. Kat-nen nde wene yigep ereba na oboksa yak nondosola-ge, mondok kurul pug-o’ luk yak kuruwa nde ma-o.

²⁶ Iri yogola-ge, kat-nen an nemengen mbarosolar-e: ’An-e tuguruk o kubu me nibil mburugunmu, iri me-nen wat yurag-e nimbir-o’ luk yak undugun na-e” luk yak nirij-o.

²⁷ Iri yak neramu worasoma ereya na-net it yabu winde ereba na lobok yogolar-e, an kin wok nibiga-o. Iri yogola-ge, an-nen-e nagawan-nen yurak nebem pid ereya na-t yak indigi-o. Iri yak ondosola-ge, an min nagawan min-nen wene mbarige wene-ge ap misiger-o luk tet kuligit lak me, it-nen yi lik ndi lik mbi kwarigit lag-o.

²⁸ Nde, an na-ge nagawan woraso sa iri na me-t tena nuburuk irit worakmu, o Yerusalem siri iri na-ge wim nap-nen mengga waniga-o. 39:1–51:64 Tiga belas pasal ya arem-e o Yerusalem na-ge Nebukatnesat inggem yosolat, Yewura Nagawan Sendekia na-ge Mbabel kamat uburuk mborogolat, Yeremia na-ge wesera keya biga-o. Nggendalya iri-ge Yewura nap ngguberenot mendak piga-t nde, abok nggwe-ge ap-nen wiriga-o. Iri ala, Yewura nap ereb-e Mesira uwi kwiye mborogolar-e, Yeremia na-ge lembesa imin mbiriga-o. Pasal 46-51 arem-e Nagawan Indo-nen-e ap enlem kwarat enpem angin worak purak wene yosolar-e, Mesira min Mbabel min na enpem angin worak mende purak wene min mbarak worasu-o.