YEREMIA 37 - Nanduk Ngget Tul Pidnak Wene

Sendekia-nen Yeremia emengen mbaridnak wene 37:1-10

¹ Nde, Mbabel Nagawan Nebukatnesat iri na-nen Yoyakim ambara Yoyakin iri na Yewura nagawan worasoma, wabosolar-e, ondolma-ge Yosia ambara Sendekia nde Yewura nap ennggendumu nagawan irit mendak pij-o.

² Iri rak pij-et nde, Sendekia min at-nen idnak yabu winde ereba na min we nap oboksa min-nen-e Nagawan Indo-nen an nebem posola, an-nen yak indidnak wene-ge ndak ndak kwarigit lak yiga-o.

³ Nde, Nagawan Sendekia-nen-e Selemia ambara Yukal min Masea ambara tepan ombo Sepania min-e an-nen it Isarael nap enlem oboksa enmanggim tepan Nagawan Indo Nenmbal Pem Nagawan emengen mbarurak yak nuruwakluk wirik inpil lobok yij-o.

⁴ Nde, ereya tarem-e an-e kamasa o kubu me nibigit lak, ap ennggendumu waring kasolat woragi-o.

⁵ Nde, it Mbabel nap-nen-e Yerusalem iri me-ge leget waga keya unpuruk worakmu, it-nen kologolar-e: ”Mesira nap san ombo-ge kinmin wim mbarurak Mesira-nen lobok yili-o” yogola kulurug-e, Mbabel nab-e keya buruk mbiriga-o.

⁶ Isarael Enmbal Pem Nagawan, Nagawan Indo-nen-e an yak norosolar-e:

⁷ ”Kat-nen Sendekia iri yak tosolar-e: ’Kit yongga kundurak Mesira nap san ombo lobok yili ereba-ge tundumu-nen nden karuk tuguruk enma mburuwa-o.

⁸ Iri yogola-ge, Mbabel nab-et tuguruk lobok yuwarik, kunuwi siri yu bem mbud yogolar-e, kan mbela lak tak puruk, urugwe nggwe rak kunpuwa-o.

⁹ Kit kinndi-nen yebet kagolar-e, Mbabel nab-e abu mbirikma-o. Abog-e mondok lobok yuwa bug-o luk yebet kudtak pug-o. Nagawan Indo an-nen kenaru rak kunpusu-o. Mondok ndemeret it iri-ge tuguruk lobog-et yuwa-o.

¹⁰ Kit-nen nde Mbabel nap inmin wim mbarogolat nggal-nen na it inmin wim mbatluk, san ombo oboksa unduruk, urugwe nggwe rak unpuruk, nde, erep unluk wolma-ge enpe marig-et mare worak mondok angin nak unuwi lijema mbinggirik wolma-t nde, it ereya na-net men yogolar-e, o siri yu na kan puruk, lak tak purak na ndak-net yusu-o’ luk yak ti-o” luk yak nirij-o.

Yeremia tenaga o kubu me pidnak wene 37:11-21

¹¹ Nde, Mesira nap san ombo Yerusalem panggo yogola-ge, Mbabel nab-e Yerusalem keya buruk mbiriga-o.

¹² Iri yogola-ge, an-e Mbenyamin nggweyak pem an nelem nap onnggweyak tomborogolat an wok niridnak nonggweyak iri na winde yurak mbirigi-o.

¹³ Iri yurak pem mborosolar-e, an-e Pak Tumende unu Mbenyamin iri na me wok yosoma-ge, san ombo iri me yabu wanugwi enanggul pem onowe iri na-nen tena nuburuk, an yak norosolar-e: ”Kar-e Mbabel nap ereba na enambigit yurak mburusu-a?” yak nirij-o. Nde, san ombo iri unu-ge Yeria. At iri-ge Anania ambara Selemia iri na-nen ndagij-o.

¹⁴ Nde, an-nen onggo yak tosolar-e: ”An-e wim nap enambigit yurak mburusu-ge mondok lag-o!” yak tosola-t nde, Yeria-nen-e an nene kuligit lag-et an tena nuburuk nimin mberarik, pemerinta yabu winde ereba na endam nibil mbirij-o.

¹⁵ Nibil mberamu-ge, it-nen-e insilepma kwarat nebem pogolar-e: ”Mbut wosa keya buruk, nagawan iri na-nen idnak engga mbaroso nap Yonatan iri na ama tu lesa per-o” yikma, iri na-t kwat nibiga-o. Nde, Yonatan uwi iri na-ge o kubu me rak pidnak sa-o.

¹⁶ Nde, an-e nggweyak arem ondoro misik konidnak iri na me nibil nggwikma, kwarat woragi-o.

¹⁷ Nde, misik tarem-e Nagawan Sendekia-nen-e an-e at eram wok nuburuk mburuwakluk ap inpil lobok yamu, nibil mbirigarik, at woraso sa iri me-nen Sendekia-nen kuraga an kin wok nobosolar-e: ”Nagawan Indo-nen kebem pidnak wene-ge worasu, lak?” yosoloma, an-nen onggo yosolar-e: ”Worasur-o. Nde, iri-ge nagawan kar-e kegera Mbabel nagawan iri na inggem kubuwa-o” luk yak tigi-o.

¹⁸ Yosoluk, an-nen nagawan iri na kin wok obosolar-e: ”An-e nagawan kat min kat keyabu wanugwi nap yabu winde min ap oboksa min-e no meya kwat kunpukmu-nen nagawan kar-e an-e o kubu me nibil nggwigen-o?

¹⁹ Ennesiget Mbal Pem Nagawan ene lomboksa yugwi nap kat-nen idnak nap-nen yak korogolar-e: ’Mbabel nagawan-nen-e nagawan kat kebem kore yogolat, o yu lak tak pogolat kwaruwa bug-o’ luk yak kiriga nap ereba na-ge ngge me worali-o?

²⁰ Nde, yawo-ge, nagawan kek tak wa-e. An-nen nggi yak kirimin wene yu kwara kuli-o, nab-o. Nagawan kat-nen-e an-e o kubu me Yonatan ama iri na me-ge tuguruk nibil mbururak pug-o. Nibil mburugunmu, wat yimin-o” luk yak tigi-o.

²¹ Yosolakmu, Nagawan Sendekia-nen yosolar-e: ”At yu-ge an woraso sa nuwi mborom yu me o kubu me purag-o” luk yak indij-o. Yak endamu, at-nen yid sa iri na me worala-ge, oroti-ge oroti konugwi sa iri na me-nen pempa mak norogolat worakmu, o siri ereba na me oroti oboksa lak yij-o.