YEREMIA 36 - Nanduk Ngget Tul Pidnak Wene

Mbaruk-nen Nagawan Indo ama-nen engga ket mbet tak misik kuluwakluk wonaridnak wene 36:1-10

¹ Yosia ambara Yoyakim iri na Yewura nap nagawan menluk ombol nggwe olengen empat pem Nagawan Indo-nen an yak norosolar-e:

² ”Kar-e engga ket mbet nggitlik misik wanuruk yugundig-e, Yewura min Isarael min iri-nen ap enlem oboksa min onowene yak kirigi ereba na oboksa mbari-o. Iri mbarosolar-e, nanduk Nagawan Yosia-nen o tena woragid kuri-nen yawo kuri ereya woragolat-nen mondok nandug-et an-nen kat kimin wene yosolat-nen yak kirigi wene-ge oboksa engga bem pi-o.

³ Erep-nen-e Yewura nab-e an-nen it enpem lak tak onposo mende pil lobok yimin wene iri na kirimbi kulurug-e, it-nen meya kwatli keya buruk, kondok yuwa nde ma-o. Iri yogola-ge, an-nen-e it-nen idnak meya min it-nen meya kwarugwi min-e namberam tak pimin-o” luk yij-o.

⁴ Iri bem-e an-nen-e Neria ambara Mbaruk iri na wene mbo ubukmu, Nagawan Indo-nen an yak nirid ereba na-ge oboksa nene bem yosolat, Mbaruk-nen-e engga ket mbet nggitlik iri na bem mbarij-o.

⁵ Iri rak puruk, an-nen wene Mbaruk ebem posolar-e: ”An-e Nagawan Indo ama-ge ’Mondok nggurak pug-o’ yak niridnak me,

⁶ ap nunggwi mende ninggit lak, tepan nak yugwi tarem wok yosola-ge, kar-e Nagawan Indo ama mbiri-o. Mburugundig-e, an-nen nene bem yosola, kat-nen mbarigen iri na-ge mondok kuluwakluk kene nggoksa wonarurag-o. Iri yosola, it oboksa-nen Nagawan Indo-nen an nebem pid wene ereba na kwara kuluwakluk wonarurag-o. Nde, engga iri wonarosolar-e, ap Nagawan Indo ama iri me wolma nap oboksa min Yewura nap unuwi siri nin me nan me-nen lobok yidnak nap min-nen kene kulurak sa-nen wonarurag-o.

⁷ Nde, Nagawan Indo-ge isilepma kwarat onposolar-e, enpem mbud ma wene kuluruk, erep-nen-e ir-e Nagawan Indo eram tepan yogolat, it-nen yi meya ndi meya kwat tenak worali ereba-ge keya buwa nde ma-o” luk yigi-o.

⁸ Yosoloma-ge, Mbaruk iri na-ge at-nen kwarurak ebem pigi iri na ndak ndag-et Nagawan Indo-nen yidnak wene ereba na-ge Nagawan Indo ama-nen wonarij-o.

⁹ Nde, Yewura nap nagawan Yoyakim iri na-nen o tena woralat tarem waneya sembilan, nde, olengen lima iri bem-e ap oboksa-nen Nagawan Indo-nen enabuwa kujwakluk mburu ninggit lak woragolat, tepan yiga-o. Iri yogolar-e, Yerusalem woragwi nap oboksa min Yewura nggweyak pem o siri ereba me-nen lobok yidnak nap oboksa min-e tepan yiga-o.

¹⁰ Iri kwarogola tarem iri-ge Mbaruk-nen-e an-nen yigi wene ereba na oboksa-ge engga ket mbet nggitlik iri na bem-nen kuluwakluk wonarosola, ap oboksa kuliga-o. Nde, engga iri na wonarosolar-e, nagawan iri-nen idnak engga mbaroso nap Sapan ambara Nggemaria iri-nen engga mbaroso wi Nagawan Indo ama iri na me-nen wonarij-o. Nde, engga mbarugwi wi iri-ge Nagawan Indo uwi mborom abam nggwe ambigit Pak Tumende unu Ngget iri na eralu irit woragij-o.

Engga ket mbet tak iri na pemerinta yabu winde ereba na kuluwakluk wonaridnak wene 36:11-19

¹¹ Sapan ambara Nggemaria-nen ndagid Mikaya iri na-nen kolosolar-e, Mbaruk-nen-e Nagawan Indo-nen yidnak wene-ge engga ket mbet iri na bem-nen wonarosola, kulij-o.

¹² Kulurug-e, nagawan woraso sa engga mbarugwi sa iri me ap pemerinta yabu winde ereba na-ge wene mbarukmu mbirij-o. Nde, iri me-ge Semaya ambara Ndelaya min Akmbot ambara Elnatan min Sapan ambara Nggemaria min Anania ambara Sendekia min engga mbaroso nap Elisama min ap yabu winde erep min-et iri me woraiga-o.

¹³ Mikaya iri na mborosolar-e, Nagawan Indo ama-nen Mbaruk-nen engga bem wonarosola, kulid wene ereba na oboksa yak indij-o.

¹⁴ Yak ondosoloma-ge, it pemerinta yabu winde ereba na-nen-e Kusi ambara Selemia ambara Netania-nen ndagid Yewuri iri na yak togolar-e: ”Mbaruk eram mburugundik, Mbaruk imin lobok yosolar-e, engga ket mbet mbarak at-nen wonarid engga iri na min-et nendam waruk lobok yuwag-o” luk yaga wirik pikma, mberarik, Mbaruk na imin lobok yosola-ge, Mbaruk-nen-e engga iri na min-et waruk lobok yij-o.

¹⁵ Waruk lobok yosoloma, it-nen Mbaruk yak togolar-e: ”Nab-o. Kore luk, engga ket mbet mbarak iri-ge nit ninmbiri bem wonari-o” yogolikma-ge, Mbaruk-nen-e it-nen yidnak iri na-t kwarij-o.

¹⁶ Engga iri na wonatluk keya bosoloma, it-nen-e kwiye yogolat nerengenma kerengenma mburuk, Mbaruk yak togolar-e: ”Wene yu-ge nir-e mondok nagawan yak tul-o” luk yiga-o.

¹⁷ Iri yogoluk, it-nen Mbaruk kin wok obogolar-e: ”Wene yeba oboksa-ge nggesa mbarigen-o? Yeremia-nen yak korosola, mbarigen, lak? Yak nindi-o” luk kin wok ibiga-o.

¹⁸ Yogoloma, Mbaruk-nen onggo yosolar-e: ”Ndemerer-o. Engga yu bem mbarak worasu yeba-ge oboksa Yeremia-nen ene bem yosola, an-nen-e amburu luruk pem engga ket mbet yu bem mbarigi-o” luk yij-o.

¹⁹ Yosoloma-ge, it-nen yak togolar-e: ”Kat min Yeremia min-e mondok kurak yurag-o. Ap-nen kit kura woragwi sa enaru ma-o luk, mondok mbik mboksa-t kura wolmomtag-o” luk yiga-o.

Nagawan iri na-nen engga ket mbet tak iri na kan pidnak wene 36:20-32

²⁰ Nde, it pemerinta yabu winde ereba na-nen-e engga iri na-ge engga mbaroso nap Elisama iri na woraso sa iri na me piga-o. Puruk, mbirigarig-e, iri na wene-ge oboksa nagawan iri na yak tiga-o.

²¹ Yak togolikma-ge, nagawan iri na-nen-e Yewuri iri na-ge engga ket mbet mbarak iri na wil mburuwakluk wirik ibij-o. Yosoloma, Yewuri na mberarik, engga ket mbet iri na Elisama woraso sa-nen waruk lobok yarig-e, engga iri na-ge nagawan min pemerinta yabu winde eralu mendak worali ereba min-nen kuluwakluk wonarij-o.

²² Nde, iri tarem-e waneya sembilan o toro wok yidnak tarem me, nagawan iri na-ge kan tonggosolat, toro wok yidnak tarem-nen at woraso sa irit worasoma-ge,

²³ Yewuri iri na-nen-e engga iri na wonarosolar-e, obo kenan nggal empat nggal wonarosola-ge, nagawan iri na-nen-e kabo marik pem mbara marik mariksa engga iri na-ge kan ma pil nggwerenak irit worasoma, engga iri na-ge oboksa kan pij-o.

^24-25 Nde, iri na kan posola-ge, Elnatan min Ndelaya min Nggemaria min-nen-e: ”Engga ket mbet tak iri na-ge kan purak pug-o” luk nagawan na emengen mbariga-t nde, ar-e it enne kuligit kuligit kan pij-o. Nde, nagawan-nen na irit, it pemerinta yabu winde engga iri wonarosola kuliga nap-nen na irit, engga arem mbarak ereba na bem-e kwiye na mondok yigit lak, iri-nen ”Niri nera-o” luk, unmud na mondok kagit lag-o.

²⁶ Alat nde, nagawan iri na-nen-e at ambara Yeramel min Asiriel ambara Seraya min Apndel ambara Selemia min enpem posolar-e, an min an-nen idnak engga mbaroso Mbaruk min tena nunpurak yak indij-et nde, Nagawan Indo-nen kura ninpij-o.

²⁷ Nde, Nagawan Yoyakim-nen engga ket mbet tak an-nen nene bem yosola, Mbaruk-nen mbaridnak engga iri na kan pid ombol nggwe-ge Nagawan Indo-nen an yak norosolar-e:

²⁸ ”Engga ket mbet tak misik wanuruk, engga nanduk kan pid iri arem mbaridnak wene ereba na-ge oboksa engga nin iri bem mbarurag-o” luk yak nirij-o.

²⁹ Nagawan Indo-nen nagawan iri na yak tuwaklug-e, yu nggal yak nirij-o: ”Kar-e engga ket mbet mbarak iri na-ge kan pigen-o. Nde, kat-nen Yeremia kin wanosolar-e: ’Noluk-nen engga iri arem mbarosolar-e, Mbabel nagawan iri na lobok yosolar-e, o yu lak tak paga yigisa keya bosolar-e, yu me woragwi nab-e ondosolat, wam min-et lak tak posolat ma-o luk mbarigen-o?’ luk yigen-o.

³⁰ Iri bem-e, Nagawan Indo an-nen yak kurusu-o, Nagawan Yoyakim wa-e. Kat-nen wigarak-nen-e Ndaut-nen o tena woraso iri na ondolma-ge, mondok wolma bug-o. Nde, kat korogwag-e nggogora mbo kubuwama, lengge-ge mo kebem mbosolat, nde, kubu-ge lilangen kebem nggolosolat wolma-o.

³¹ Kat min kat-nen wigarak min kat keyabu wanugwi nap yabu winde ereba na min-e kit-nen yi meya ndi meya kwarugwi ereba na bem angin worak mende kenpem pimin-o. Nde, kat na irit, Yerusalem min Yewura min woragwi nap na irit, kit lak tak kunpurak kirimbi ereba na kwara yebet kagit lak yugwi me, an-nen-e lak tak onposo mende oboksa kirimbi yak kindigi ereba na-ge kenpem mberak pimin-o” luk yij-o.

³² Iri yosoloma, an-nen-e engga ket mbet nin misik waga an-nen idnak engga mbaroso Mbaruk iri na wok tigi-o. Wok tosolakmu-ge, an-nen nene bem yosola, engga nanduk iri na arem mbarid wene ereba na min iri-nen wene ereba na nggal wene erep yak niridnak min-et lombok tak paga mbarij-o.