YEREMIA 31 - Nanduk Ngget Tul Pidnak Wene

Isarael nap tuguruk enma lobok yurak wene 31:1-14

¹ Nagawan Indo-nen yosolar-e: ”An-e Isarael nap enlem oboksa Enmbal Pem Nagawan kwat yosolat, it na an nilirak kwat yurak tarem-e wog-et ma-o.

² Nde, it ap enemndam-nen kela mbiridnak nap ereba-ge nembaga karu me-nen enabuwa-ge kakmu-o. Nde, Isarael nap-nen kona yamuksa wolmomtak kore yogola-ge,

³ an-e erepma-net nde, inmbiri bem nam yukmu-o. Isarael nap wa-e. O nanduk-net an-e kit kenabuwa kaso me, an-e kenabuwa kaso elem mirik konposolar-e, pem irit kenabuwa kasolat woramin-o.

⁴ An-nen-e nanduk-nen woragwi nggal kek tak kunnu worak tak pimin-o. Kir-e tugurug-et erebana poba wanugupndik, kenalen pem ene rak pogolat kot kagub-o.

⁵ Kir-e Samaria iri me ndobo worak sa tuguruk anggut yabu wanugub-o. Nde, yaguwa nab-e ebe puwa-ge mbaruwar-o.

⁶ Nde, o siri yik karok pak tak woragwi nap-nen ndobo worak sa Eperaim-nen enne mbo bogolat-nen yogolar-e: ’Nagawan Indo Nenmbal Pem Nagawan eram lujwog-o’ luk yurak tarem-e mondok ndemeret wog-et ma-o” luk yij-o.

⁷ Nagawan Indo-nen yosolar-e: ”Nilirak Isarael nap inkijak kenalen-nen ndawi yer-o. It enlem iri-ge ap enlem ereb-e teberak unpuruk, it enlem yu-ge mondok ija-net yusu-o. At erembel wanogolat-nen ndawi yogolar-e: ’Nagawan Indo-nen-e at ilirak Isarael nap inmiri yosolat, it minggirik erep keya inpidnak worali oboksa inmiri yij-o’ luk ndawi yurag-o.

⁸ An-nen tuguruk it ereba-ge abare abam (utara) nggwe-nen wok unpuruk lobok yosolat, yi wi ndi wi-nen wok unpuruk ndok wosa inpimin-o. Enlengen ngguru min onowak ya landok nugwi min-et nde, it inmin lobok yuwa-o. Kweyap li nggeret waga nggwidnak min enabila la abu ogwere min na inmin-et lobok yuwa-o. It oboksa mondok enpe kwarat irit o yu me tuguruk lobok yuwa-o.

⁹ It tuguruk lobok yogolar-e, yip lengen-e yolo mbosolat irit lobok yogola, an-nen-e inndi yanggunil yanggunil lit unpuruk lobok yimin-o. An-nen wok unpuruk lobok yosolar-e, yi worak nggwe-t inmin lobok yosolat, it unuwok abis pijaksa wosa mbigit lak, konak lobok yurak yamuk tak tu nggwe-t inmin lobok yimin-o. An-e Isarael nap ineid kwat yimin-o. Nde, Eperaim iri-ge an nambara manggiya-nen yusu-o” luk yij-o.

¹⁰ Nagawan Indo-nen yosolar-e: ”Ap kenlem oboksa wa-e. Kwara koler-o! Kulurug-e, kenpem pimin wene-ge yi koma eyak ponok nggwe yak ender-o. Nde, an nilirak ndibi ndi rak inpigi ereba na-ge ndok worak unpuruk, lomba yik karok woragwi nap-nen onlomba ndugurugwi nggal, kwara ndegel onposolat woramin-o.

¹¹ Nde, Isarael nab-e enlem enmawi worak nap ininggiyapma-nen inmiri yosolat, wisirik inpigi-o.

¹² Nde, ir-e an-nen wok ondoso mende wok indidnak nggandum min amburu min anggut amburu min sapi min lomba min ereba na bem-e entare yek tak pem-et Ndobo Sion yu me lobok yogolar-e, enalen-nen ndawi bem-et lobok yuwa-o. Yik kudtak amanggim engen kerengen uwi yi worak sa yagidnak nggal, it iri-ge mondok ndak nak irit wolma-o.

¹³ Iri tarem-e kweyap ndugum-e kot kagolar-e, enalen pem irit kot kujwa-o. An-nen inndi yanggonosola me, ap indi worak min ap sujwe min lambuksa-t enalen kagolat wolma-o. Inndi puru bera woragwi-ge an-nen nden yaga inndi yek tak woragwi rak onposolat, nde, inndi abi kalak woragwi-ge enalen pem woragwi kwarak onposolat kwarimin-o.

¹⁴ Nde, tepan omborag-e nunggwi mende kwarat ndak yaga wok ondosolat, nde, an nilirak-nen ukwe mende-ge oboksa wok ondosolat kwarimin-o. Yu-ge Nagawan Indo an-net yusu-o” luk yij-o.

Nagawan Indo-nen Isarael nap unpud kaso wene 31:15-22

¹⁵ Nagawan Indo-nen yosolar-e: ”O Arama-nen-e inndi kalok luk, inndi puru bera yogolat yip togola, kulili-o. Nde, kwe Arakel-e ilirak lak yidnak me, unpud-nen yane worosolat yip tosolar-e, indi yanggunurak isili yusu-o.

¹⁶ Yip tusu keya buruk, ndong yosolat, kiyip lengen ndowarosolat kwari-o! Kat-nen kilirak enmanggim kirigak mbij-e we-t kababok lak yusu-ge lag-o. Onggo-ge wanugun-er-o. Kat kilirag-e unuwim nap enma-nen lobok yuwa-o.

¹⁷ Kat kilirag-e tuguruk enlem ma lobok yuwa me, kar-e abog-e mondok konak irit woragun-o. Nagawan Indo an-net yigi-o” luk yij-o.

¹⁸ Nagawan Indo-nen yosolar-e: ”An-nen kolosolar-e, Isarael nab-e mondok inndi puru min-et yogolar-e: ’Nagawan Indo wa-e. Nir-e wanggo rak pigit lak wam nggal-et nde, kat-nen-e nir-e kat-nen yidnak yidnak kwarugwi mirik nonposola, yawo-ge tuguruk nden karuk, kat keram lobok yurak lud tak worali-o. Iri ala karug-e, Nagawan Indo Nenmbal Pem Nagawan wa-e. Tuguruk wok ninpi-o.

¹⁹ Kar-e abu nenmberam tak kibige iri na-ge niri nera iri kwarige-o luk yebet kaige-o. Kat-nen angin worak nenpem pigenma-nen perak ninndi puru yogolat, yandu wandu mbige-o. Nir-e nunsujwe bem-et meya kwarigerik me, nir-e ninnggiri yaga nenpa nggoso labuk yij-o’ luk yiga-o.

²⁰ Isarael wa-e. Kar-e nera kabuwa worak-nen yusu-o. Nera nindi kundik, nindi kumburak-nen yusu-o. Pempa an-e kat kebem kore yusu-t nde, nindi andi-nen pempa nindi-ge kebem-et worasu-o. Kar-e an-nen kwat kobosolar-e, mondok kabuwa min-et kwat kibimin-o.

²¹ ’Tula-ge iri-o’ luk, yenggerak purak mende pogolar-e, e sindil lobok yogolat, kit nanduk mbirigep tula iri na kore yer-o. Isarael nap wa-e. Tuguruk lobok yer-o. Nanduk-nen woragwi kenlem ma tuguruk lobok yer-o.

²² An-nen yidnak yidnak kwarugwi buk kenlem yu-ge wa-e. Kir-e mepme-nen kinndi mberen kwat tenak woragwi iri-ge keya bugub-o? Nggweyakma yu me an-nen misik mende ngget mbi ndak wosa posolar-e, ki mul mul nin nggal-et kwami-nen ap kura unpugwi nggal-et kwarak pigi-o” luk yij-o.

Abok Isarael nap konak enalen pem ndak wolmomtak yak indidnak wene 31:23-40

²³ Nagawan Indo Mondok Amawi Worak, Isarael nap Enmbal Pem Nagawan-nen yosolar-e: ”An nilirak nde tuguruk nanduk-nen woragwi nggal kek tak unnu worak tak pumu-ge, o Yewura min Yewura siri oboksa min ereba na me-nen-e ap-nen yogolar-e: ’Nagawan Indo-nen-e at arig-et nak woraso ondoro Yerusalem ndobo marak iri na imbiringgat tak puwag-o’ yogola kuluwa-o.

²⁴ O Yewura min Yewura siri oboksa min ereba na me-ge ab-e yabu wanugwi nap min wam ndugurugwi nap ensapi min onlomba min na wolmar-o.

²⁵ Nde, it enpabok lak nab-e an-nen enmawi rak posolat, nde, nere-nen ndowaga enpabok lak yidnak nab-e an-nen inmbitsa mak ondosolat kwarimin-o.

²⁶ Iri tarem-e ap-nen yogolar-e: ’Mondok nggaruksa nene lug-e, namawisa nebem pil pel yaga labuk yusu-o’ yuwa-o.

²⁷ Nagawan Indo an-nen yusu-o. O Yewura min Isarael min-e ap min wam min an-nen kobong tak pimin tarem-e wok ma-o.

²⁸ Nanduk an-nen enlem kona keya bosolat, tud tak posolat, it yigisa keya onposolat kwareyekluk yik eneyarok woragi iri na nggal-et yawo na tuguruk mendak onposolat, tugup lak tak onposolat kwareyekluk yik eneyarok woramin-o.

²⁹ Nde, iri tarem-e ap-nen yogolar-e: ’Ineid iniya-ge engen amak worak nonggola, inlirag-e eneyak olo yusu-o’ luk yugwi iri na nggal-e yuwa bug-o.

³⁰ Are, ta-nen engen amak worak nasola-ge, at ondomok eyag-et olo ma-o. Ap enambiktak lombok-nen meya kwaridnak pem-et wat ma-o” luk yij-o.

³¹ Nagawan Indo-nen yosolar-e: ”An-nen Isarael nap min Yewura nap min inmin kondosolat urul ngget nin yak undurak tarem-e wog-et mao.

³² Nde, an-nen urul ngget yak indimin iri-ge nanduk it onmborak Mesira-nen lit unpuruk lobok yosolat yak indigi iri na nggal-e lag-o. Nde, an-e it unun nggal kwat yigi-t nde, ir-e an-nen it inmin urul yak indigi iri na-ge ndak ndak kwarigit lak yiga-o.

³³ Nde, an-nen Isarael nap inmin ngget urul yak indimin wene-ge yu-o: An-nen idnak imiri mbarak pidnak wene-ge it inndi arem posolat, it inndi bem mbarosolat yimin-o. Nde, an-e it Enmbal Pem Nagawan kwat yosolat, ir-e an nilirak kwat yogolat ma-o.

³⁴ It iri-ge nggok-nen marik-nen oboksa an-e enaru yuwa me, it ennggamirak ennggendumu misik-nen Nagawan Indo an it-nen enaru makluk mul undurag-e lag-o. Nde, it-nen lugud tak kwarugwi-ge an-nen meme rak onposolat, nde, it meya yidnag-e an-nen namberam tak pimin-o. Nagawan Indo an-net yigi-o” luk yij-o.

³⁵ Nde, mo iri-ge o lengge rak puwakluk Nagawan Indo-nen ndak worak pamu-o. Nde, waneya min wonaru min iri-ge kubu yaya rak purak ndak worak pamu-o. Nde, yi koma-ge nden penden tak posola, nggeyok peyok nggurabu mbusu-o. Nde, at unu-ge Nagawan Indo Mondok Amawi Worak irir-o.

³⁶ Nagawan Indo-nen watsa urul posolar-e. nggweyakma yu me-nen pem kwat yoso yeba kwat yik tenak worasola-ge, Isarael nap na woragwi ndak ndag-et enlem Isarael irit wolma-o.

³⁷ Nde, misik tarem ndak wurugwi mende bem mbal ndak worogolat, nggweyak yiriwak yu iri nggal-o luk lombot pogolat nggal-nen-e iri yogolat tarem iri-nen Isarael nab-e it-nen meya kwarugwi bem-et an-nen keya enpeleb-o. Nagawan Indo an-net yigi-o.

³⁸ Nagawan Indo-nen yosolar-e: ”Yerusalem siri yu oboksa an namanggim an nuwi siri tuguruk pogolar-e, O Mot Ananel kuri-nen lingsa Pak Tumende unu Unggutmu iri na bem wosa pil mbururak tarem-e wog-et ma-o.

³⁹ Pak Tumende Unggutmu iri me-nen watsa mburuwarik, ndobo Karep kuri wok luk, iri me-nen kwanangga o Nggoa bem kundugu pil mburuwa-o.

⁴⁰ Ap yapma onpogolat, eneyak ngen mbo bogolat kwarugwi sa mbirik iri na oboksa min yabu Yi Waru Kindoron eyak nggwe worasu kuri-nen Pak Tumende Kura Wam kuri mo luwaso (timur) ambigit iri na min oboksa an namanggim lenak wolma-o. Nde, Yerusalem siri iri-ge tuguruk tud tak pogolat, yigisa keya bogolat mondok kwaruwa bug-o” luk yij-o. 32:1–35:19 Empat pasal ya arem-e Nebukatnesat iri-nen o Yerusalem na ebem mbud yekluk lop lop worak worala, Yeremia-nen-e at ondomok uwi siri iri me nggweyak onggo bij-o. Iri kwarid iri-ge abok-nen it konak kwat unpurak iri na ut momorosolat onggo bij-o. Iri-ge Nagawan Indo-nen yosolar-e: ”Yerusalem iri-ge yigisa lak tak puwa-t nde, abok nggwe Isarael nab-e tuguruk enma Yerusalem mburuwa-o” luk yidnak wene min mbarak worasu-o.